هاشم حسام هاشم
14 ساعة · تم تعديله ·
اجمل ماقرات عن السيدة المصرية الاصيلة ..
الست المصرية تتميز بقدرات رائعة في الشراء و الفصال، عندها مهارة إنها تاخد الحاجة أم 70 جنيه بـ 5 جنيه بس، وتحس في الآخر إن البيّاع غلبها.
الست المصريه هي الست اللي بتبدا حياتها الزوجية تتدهور لو فات على جوازها شهر بدون حمل.
الست المصريه هي الست اللي شايفه نفسها محسودة من جيرانها وطنط سوسو ونادية مرات خالو إبراهيم وأم حسين البوابة.
لست المصريه هي الست اللي بقالها 10 سنين بتطلب من جوزها يجيبلها ورد ولسه عندها أمل إنه يجيبلها لغاية دلوقتي.
الست المصريه الأكثر إيماناً بنظرية “مفيش حاجة بتخسر”، وتلاقي نص شقتها علب و برطمانات وكراتين فاضية.
الست المصريه اللي اسمها بيفضل سر وعيب وحاجة متتقالش لا قدام صحاب جوزها ولا بين زمايل ولادها.
الست المصريه بتروح المصيف علشان تفضل قاعدة على الشط تحضر الأكل لجوزها و ولادها و تناولهم الهدوم بعد ما بيطلعوا من البحر وتفضل سعيدة جداً
الست المصرية هي الوحيدة في العالم اللي عندها قدرة على أنها تشيل أنبوبة غاز على دماغها وتمشي بيها عشرات الكيلومترات وشايفة إنها حاجة عادية جدا
الست المصريه هي الست الوحيدة في العالم اللي ممكن تفضل لابسه أسود حزناً على جوزها اللي مات لغاية ما هي نفسها تموت.
الست المصرية هي أكثر سيدة في العالم بتقول لجوزها “طلقني” وهي لا تقصد معنى الكلمة
الست المصرية هي الست الوحيدة اللي بتبدأ تستعد للزواج من أول ما تتولد ولغاية ما تتجوز، تبدا أمها تشتريلها أطقم الحلل من و هي عندها 3 سنين
الست المصريه أكثر ست بتشتكي من عدم مساعدة زوجها ليها في أعمال البيت وفي الوقت نفسه بتعلم ابنها إنه راجل ومش المفروض يساعد مراته في شغل البيت
الست المصريه هى اللي قضت نص عمرها في المطبخ بتعمل حلل محشي و ملوخية و النص التاني بتغسل المواعين اللي عملت فيها المحشي.
الست المصريه هي أكثر ست مؤمنة بالحشمة جوه البيت وبره البيت.
الست المصريه هي الست المؤمنة بأن تربية الأبناء تتلخص في الجملة دي: “والله لما يجي أبوك لأقوله”.
الست المصريه هي الست اللي الخروج عندها يعني حلل محشي وصواني جلاش وكيكة وترمس الشاى
هي الست اللي مؤمنة بأن العيد يعني غسيل سجاجيد
الست المصريه دايما مصممة تبقى مع جوزها دنيا وآخرة
الست المصريه بتؤمن بنظرية إن الدايت أقوال لا أفعال
الست المصريه هي الست اللي لما تضحك شوية تخاف علشان ضحكت وتستنى مصيبة جيالها و تقولك خير اللهم اجعله خير
فاجمل تحية للست المصرية الاصيلة
[ندعوك للتسجيل في المنتدى أو التعريف بنفسك لمعاينة هذه الصورة]