[ندعوك للتسجيل في المنتدى أو التعريف بنفسك لمعاينة هذه الصورة]I Love EGYPT
إلى كل بناتى و أبنائى
و إلى .. Noran Adel
و إلى .. Mohamed Gamal Sallam
عزيزتى الشابة .. تتجوزى امتى ؟
ــــــــــــــــــــــــــــــــــــــــــــــــ
اتجوزي لما تحسي إنك ممكن تصحي من أحلى نومة في عز البرد عشان تعمليله كوباية شاي و انتي مبسوطة مش و انتي بتقولي بالسم الهاري..
اتجوزي لما تلاقي نفسك تقدري تستحملي عصبيته و تكشيرته..
اتجوزي لما تلاقي نفسك عايزة تخرجي و تمنعي نفسك من الخروج عشان تقعدي معاه..
اتجوزي لما تحسي إنك تقدري تضحكي على نكتُه البايخة ، و تلاقيها تعجبك..
اتجوزي لما تلاقي نفسك مختلفة معاه في الرأي بس مش عايزة تعبري عن رأيك عشان متضايقيهوش..
اتجوزي لما تلاقي نفسك مستعدة تضحي بشغلك عشان تقعدي في البيت تريحيه أو تسافري معاه لمكان بعيد..
اتجوزي لما تحسي إنك ممكن تطلعي من بيت أهلك اللي عشتي فيه مش أقل من 20 سنة عشان تعيشي معاه..
اتجوزي لما تحسي إنك قادرة تستحمليه زي ما ناعسة استحملت أيوب..
لما تحسي إنك قادرة تتنازلي عن جزء أحلامك وطموحاتك _أو حتى كلها_ عشان تبسطيه..
..
..
أما أنت عزيزي الشاب :
ــــــــــــــــــــــــــــــــ
اتجوز لما تحس إنها تكفيك عن كل ستات الدنيا .. و لما تحس إن أكلها حلو مش لازم يكون زي أكل مامتك .. و إنك تقدر تهزر معاها زي أختك .. و إنك شايفها حلوة أكتر من اى حد .. و إنك تقدر تحكيلها أسرارك زي زميلتك في الشغل..
اتجوز لما تشوفها راجعة من برة سودا و طرحتها معوجة و مرهقة و هلكانة و برضه تشوفها حلوة..
اتجوز لما تحس إنك تقدر تستحملها في حالات اكتئابها و نكدها و زعلها..
اتجوز لما تلاقي نفسك مش فارقة معاك هيه طويلة و لا قصيرة .. تخينة و لا رفيعة .. منكوشة و لا مسرحة ..
اتجوز لما تحس إنك تقدر تستحمل رغيها و لكَّها و صداعها حتى لو كانت بتحكيلك عن خط سير عفاف زميلتها من أول ما تصحى من النوم لحد ماتنام بالليل..
اتجوز لما تستحمل غيرتها .. و صوتها العالي و نرفزتها..
اتجوز لما تقدر تشاركها أحلامها و تساعدها تحققها و تشوف نجاحها من نجاحك..
اتجوز لما تلاقي نفسك خايف عليها و بتخاف تجرحها أو تأذيها..
..
..
من الأخر اتجوزوا لما تلاقوا "روح" تستريحوا لها ..
ـــــــــــــــــــــــــــــــــــــــــــــــــــــــــــــــــــــــ
الرسول عليه الصلاة و السلام بيقول: " الأَرْوَاحُ جُنُودٌ مُجَنَّدَةٌ ، مَا تَعَارَفَ مِنْهَا ائْتَلَفَ ، وَ مَا تَنَاكَرَ مِنْهَا اخْتَلَفَ "
سؤال: بعد ما فكرت في كل ده لاقيت إجابة سؤال (اتجوز ليه؟!!)
جـواب: اتجوز عشان تزيد أسباب سعادتي .. الجواز من وجهة نظري وسيلة لتحقيق السعادة مش هدف ..
الجواز سكة سفر لازم نسافر فيها واحنا مطمنين و مستريحين .. عشان محدش يقدر يرجع المسافة اللي مشيها من أول و جديد ..