أمن المطارات والأداء الدبلوماسي البريطاني وبؤس الأداء الاعلامي الغربي والأداء السياسي المصري

Mohamed Zaki Elsheemi
البوست ده طويل شوية بس ملخص الموضوع كله بتاع الطائرة من حيث أمن المطارات والأداء الدبلوماسي البريطاني وبؤس الأداء الاعلامي الغربي والأداء السياسي المصري الخ، نقدر نقول انه غطي تقريبا وجهة نظري كاملة في الموضوع ده بنسبة تتجاوز 90% يمكن بس مع فارق مرتبط بتحليل سياسي مرتبط بروسياوبعض تفاصيل أخري في الرأي السياسي وتحميل المسئولية لشخص واحد أحيانا حتي لو كان الرئيس الأسبق مبارك ، أو تحليل سياسي مرتبط بالوضع الداخلي عموما،فأنا مضطر اعمله نسخ ولصق عشان هو مش معمول بابلك
written by
Mina Monier
(((طيب أعتقد الجو هدي شوية عالأقل عالنت فدي مناسبة إني أقول كلمتين في موضوع الطيارة الروسية باختصار.
لو عايز تناقش الكلام اللي هقوله بعيداً عن التشنج والسعار أهلاً وسهلاً.
الكارثة بتاعت الطيارة كشفت حاجات كتير جوة وبرة مصر، أنا حابب أشير إليها بالإضافة إلى خبرتي الشخصية.
1- خبرتي مع مطارات مصر والعالم:
1.1 في 6 اكتوبر 2009 انا كنت مسافر من القاهرة إلى بيروت. في مطار القاهرة دخلت على جهاز كشف المعادن ولسة هخش أمين شرطة قال لي كل سنة وانت طيب (عشان 6 اكتوبر!) ، اديته 20 جنيه ليس بنية انه مايعدنيش من الجهاز ولكن اتقاءً لغلاسته ، لكن هو عداني من غير ما أفوت في الجهاز.
1. 2 في 18 أبريل 2010 كنت مسافر لندن من مطار القاهرة ودخلت على جهاز كشف المعادن، الجهاز صفر فعلاً لأن كان في جيبي مفاتيح. أمين شرطة تاني أو ظابط ابتسم وقال لي إيت إيز زا موبايل (كان شعري طويل حبتين فجايز افتكرني خواجة) نو بروبلم .. وعداني.
1. 3 في 30 ديسمبر (رأس السنة) 2010 كنت مسافر من مطار بوسطن لوجان إلى هيثرو في لندن. مطار بوسطن لوجان دا اللي طارت منه الطيارتين اللي ضربوا برجي التجارة العالمي. المهم كان فيه في شنطتين سوائل كتير (برفيوم وحاجات تاني) ومخدتش بالي ونسيت أطلعهم من الهاندباج .. ومفتكرتش غير وانا في هيثرو لما كنت لسة بنقل من هيثرو إلى القاهرة والضابط لقى السوائل دي وطلب من أرميها. يعني مطار بوسطن بجلالة قدره فاتت دي عليه.
1. 4 في 16 ديسمبر 2012 كنت مسافر من لوتن (لندن) إلى هامبورج (ألمانيا). كان وقت الكريسماس وبردو قلت على سبيل الدعابة لنفسي : هعمل عبيط ومش هطلع السوائل وهشوف هيحصل ايه.. محصلش حاجة.
عشان الناس اللي مسافرتش أو بتسافر قليل، موضوع السوائل دا في غاية الخطورة. يعني ماينفعش تخش طيارة بسوائل بكميات تتجاوز مع بعضها جزء من اللتر (مش فاكر اد ايه بالظبط) لأنك بالسوايل دي ممكن تعمل قنبلة فممنوع.
انا شخص بيسافر كتير، شفت اجراءات شديدة جداً في مطارات كتير، واحياناً في نفس المطار اللي شفت فيه فضايح كالمذكورة أعلاه.
هل انا بذكر الأمثلة دي عشان أبرر التسيب بتاع مطارات مصر؟ لأ لأن التسيب في مصر لا يمكن مقارنته، مش بس المطارات لكن الحياة العامة لأن الفرد المصري محتاج صيانة أصلاً. انا بذكر الأمثلة دي عشان أوضح حاجة مهمة وهي إن نفس اللي طلبوا تشديد الإجراءات في مصر معندهمش أي إجراءات مشددة في مطاراتهم. ودا يخليك تتساءل ، ماذا عن مطارات زي مطارات افريقيا وجنوب شرق آسيا وغيرهم ... لو كان الموضوع تسيب من مطار شرم الشيخ ، فبالأحرى معظم مطارات العالم محتاجة مراجعة. ودا يخلي الواحد حتى لو بيفرض حسن النية في الخواجات (على عادة المصريين اللي عندهم ما يشبه بعقدة الخواجة
) فلازم يبقى فيه أسئلة حول النية السياسية ورا الجو الرخيص اللي حصل دا.
2- عقدة الخواجة:
كتير من الأصدقاء بشوفهم بيتعاملوا مع الصحف البريطانية على إنها قرآن أو إنجيل. انا كشخص يحمل الآن الجنسية البريطانية وعاش قدر لا بأس به في هذا البلد، أقدر أؤكدلك إن الصحافة البريطانية خصوصاً على مستوى الحديث عن السياسة الخارجية لا تختلف كثيراً عن الصحافة المصرية باستثناء صحيفة أو اثنتين فيهم قدر لا باس به من الحرفية.
الإندبندنت والجارديان صحف يسارية مدفوعة وممولة من حزب العمال البريطاني ومليونيراته. في وقت ما صحيفة من الإثنتين عرضت نفسها على وزير خارجية قطر إنه يشتريها، لكنه اكتفى بنشر اعلان مدفوع الأجر للجزيرة قيمته تقريباً أد ميزانية الجريدة. هاتين الصحيفتين تتحركان بإشارة من الدافع.. أنا بسميهم عاهرات الصحافة البريطانية.
الصحف اليمينية تشمل الديلي مايل و الإكسبريس وغيرهم، ودي صحف يمولها أيضاً من لهم حسابات معاكسة للمذكورين أعلاه.
التليجراف والتايمز والأوبزرفر يحملون تاريخ طويل يتجاوز القرن على أكتفاهم فليهم ارث جيد لكن مازال حزب المحافظين لاعب أساسي في تشكيل توجهاتها.
هناك صحف صفراء بشكل بحت، توازي جريدة النبأ المصرية (على أيامي زمان النبأ دي كانت بتاعت الصور العارية وكدة) ودي زي الصن والديلي مايل المذكورة فوق.
تمام. كتير من أصحابي زي ما قلت بينشروا مقالات الجرانين دي على أساس إنها بتنشر كلام محقق وموثق والجو دا. الحقيقة انها ليست كذلك. أنا عملت في الصحافة لفترة وإلى وقت قريب كنت مسئول عن تحرير واعادة كتابة تقارير تابعة لوكالات ومراكز صحفية. كنت بشوف الدنيا ماشية ازاي من جوة: القصة كلها ان الصحيفة بيجيلها الأوامر من دافع الإعلانات بتوجه معين، ثم تقوم بالإتصال بشخص جوة الدول دي يديها ما يكفي لتحويل الرأي إلى "تقرير".
على سبيل المثال، أخبار إن ضباط في مطار شرم الشيخ كانوا بيرتشوا عشان يفوتوا الناس من جهاز كشف المعادن (الصور كانت مضحكة لأنها بتكشف ان الموضوع دا كله حصل بعد المرور من كشف المعادن وهم داخلي لل بوردينج) وواحد تاني بيلعب كاندي كراش وخبر ان طيارة عرفت تناور صاروخ .. كلها جاية من شباب ثوري نقي طاهر من بتوع 25 يناير اللي بيطالبوا بالحرية والجو دا. الشاب اسمه وائل حسين ، المتحدث بتاع 6 ابريل، وهو نفسه اللي بيبعت بردو لرويترز .. وهكذا. رنة موبايل على واحد مستعد يبيع شرفه بخمسين دولار يبعتلهم كلام فارغ يتنشر بالإنجليزي وشكراً.
الناس في مصر ابتدت تفوق إلى إن الصحف دي ، وهي أحسن حالاً من صحف في دول كتير زي ألمانيا أو امريكا، مش مصدر مصداقية، ودا شيء كويس.
3- الإنتماءات:
أول ما حصل إعلان بريطانيا إيقاف رحلاتها إلخ انا قلت لزميلة معايا في القسم: بريطانيا من حقها أن تحمي رعاياها ودي مش أول مرة ، ودول كتير عملت وهتعمل كدة. لكن المهم ردود الأفعال اللي جوة مصر مش اللي براها:
مكونات ثورة يناير وأعمدتها الأساسية لم تخفِ شماتتها في الموضوع: الإخوان المسلمين اللي جمعوا توقيعات البرادعي وحموا الميدان 10 أيام واختارهم الثوار لتشكيل حكومة عصام شرف وانتخبهم الثوار في رئاسة الجمهورية واللي سماهم الثوار (فصيل وطني وشركاء ميدان) قالوا نهاراً جهاراً إن المعونات لازم تقف واوروبا تتدخل عسكرياً وهرتلة تكشف طبيعة كراهيتهم لمصر.
الشباب النقي الطاهر شركاء الإخوان أيضاً كان موقفهم غير ملتبس والشماتة كانت مالية صفحاتهم ودا شيء له دلالة مش غريبة لو اتعمل
tracking record
لكل آرائهم من أيام الثورة المباركة.
أعتقد المشكلة الأساسية في مصر إن الخلاف بين مواطنيها مش خلاف حول سياسات ، أو مين يبقى رئيس جمهورية أو الخصخصة أو الفساد أو الأمور الداخلية دي... المصريين محتاجين يكونوا أكثر صراحة ويبتدوا يفتحوا ملف مهم: رؤيتهم لمفهوم الوطن. ودي نقطة مهمة لأن لما واحد زي علاء عبد الفتاح يطلع يقول أنا هرشح واحد بيؤمن بفكرة الخلافة، أو واحد زي محمد البرادعي يكون معاهم نشاط من 2009 وهو عارف ان رؤيتهم تتجاوز حدود "حفنة التراب العفن" يبقى المشكلة مش مشكلة فساد وحرية وقانون تظاهر: نحن أمام أسئلة يجب تحديد الإجابة حولها: هل فعلاً مصر الدولة المدنية الواحدة ذات السيادة أمر فعلاً غير مختلف عليه؟
4- نتكلم بقى في النقطة المهمة:
إيقاف الرحلات أو إجلاء الرعايا مش مشكلة. المشكلة كانت في إن فيليب هاموند (وزير خارجية بريطانيا) أصدر بيان فيه كلمات شديدة العنف والتجاوز وصلت إلى ايحاء بتدخل عسكري فعلاً حتى إن الصحف البريطانية التقطت الإيماءة وقالت صراحةً إن طائرات عسكرية في طريقها إلى مصر. وحتى الآن ، بحسب زعمها، رفضت الإفصاح عن المعلومات اللي عندها بالإضافة إلى اتخاذ قرارات فردية بخصوص ارسال الطائرات وكأن مطار شرم الشيخ دا طابونة مثلاً، مفهوش جداول وتنظيم للطائرات (ودا سبب اللخبطة امبارح إن مصر رفضت استقبال عدد أكتر من 8 طيارات من أصل 20)
الموضوع باختصار
bullying
لكن مش لمصر فقط وإنما لروسيا. الأصل في الأمور هو معركة بالوكالة على أرض مصر بين روسيا اللي تم الشماتة فيها على أوسع نطاق حتى إن صحيفة فرنسية نشرت كاريكاتيرات بتقول ضمناً اللي عملتوه في سوريا فشل وآدي حليفكم الجديد (مصر) انضربت فيه طيارتكم ، يا فشلة.
دا تحليل له تفاصيل كتير من ضمنها مكالمة كاميرون ببوتن نفس اليوم ، وهتلاقي منه في صحف عديدة والسبب فيه ببساطة كما قلنا إن مصر دخلت في المعركة الجديدة كطرف محسوب على روسيا.
السيسي خاض موقف شديد الصعوبة وامتصه ورجع مصر. فكان فعلاً من المقرف بالنسبة لي إني أشوف ناس سعيدة في إن السيسي يواجه الموقف دا ، وصوره وهو بيعرق مثلاً (رغم إنه طرقع لكاميرون في سؤال معين ) بقت دليل على فشله.
انا مش هناقش الكلام الصغير دا ، لكن فيه نقطة مهمة لازم تتقال: لما تكون بتردد كلام صغير فدا لأنك صغير.
البلد لما حالها يبوظ فدا على رأسك ، واللي كنت بتبخرلهم (آلهة الثورة) لما كانوا ماسكين البلد مرتين فشلوا ودمروها بما يكفي ولو عندك أدنى درجة من حمرة الخجل حاول تتماسك في كلامك وتشوف الوضع عامل ازاي.
مصر كلها بطولها وعرضها بتعاني من فشل وضعف الفرد في الإنتاج ، ودا بسبب عقود طويلة من حكم مبارك الهدام. النهاردة لو السيسي مشي ، وهو بالمناسبة الوحيد من كل الأسماء اللي على الساحة اللي كان بيؤمن بسيادة مصر (بالمقارنة بصباحي العروبي ومرسي بتاع الخلافة والبرادعي بتاع مرسي بتاع الخلافة)، مش هتتحل المشاكل..
المشكلة إنك فاكر إنك الوحيد اللي كويس ومظلوم في حين انك زيك زيي زي كتير جزء من المشكلة، اشتغل على نفسك، ولو عايز تروح تنضم لحزب ولا ائتلاف ويبقى ليك نشاط سياسي، حاول تبص لمأساة كفاءة الفرد المصري لبنة الدولة المتهاوية الأساسات قبل ما تحاول تسعى للحل العبثي بتاع الرئيس وحش والرئيس بيعرق وبيقول كلام عبيط ... خياراتك كانت أسوأ، خياراتك كانت بتجيب خونة. فحاول تفكر في بديل واقعي مش بس لرأس الهرم التنفيذي لكن لقائعدته.
والأهم من دا كله ، حاول متبقاش صغير في كلامك))))))