للاسف لسه مش بنتعلم

للاسف لسه مش بنتعلم
---------------------
.
اتكلمنا كتييييير قبل كده عن طبيعة الحروب الجديدة اللى بتواجهها المنطقة بتاعتنا و اللى كانت سبب في تفكيك و سقوط دول .... و اختفاء دول أخرى من الخريطه الى الأبد .... قولنا و اتكلمنا و شرحنا ان التحدي الاكبر و السلاح اللى حافظ على بلدنا من التفكك هو الوعي و التكاتف خلف الدوله المصرية و عدم الوقوع في فخ الاعلام و الميديا و الاخبار المضروبة.
.
فمثلا في الأول من يوليو الماضي .... و للأسف و تحت ضغط الميديا و المواقع الاخبارية و طريقتها في صياغة الاخبار و طريقة دس السم في العسل ... كان فيه ناس كتير صدقت أو على الاقل شكت ان تم سقوط العريش و رفح في ايد داعش و ان الجيش تم سحقه هناك و انسحب و انها مسألة وقت حتى تضيع سيناء تماما .... في حين ان الوضع كان مختلف تماما و كان الجيش المصري بيسطر ملحمة و بيعلم العالم كله و بيديهم درس في كيفية مواجهة حروب الجيل الخامس و حروب الارهابيين .... و بعد ما كانوا مخططين و حاطين في بطنهم بطيخه صيفي ان محدش هيقدر يقف قدامهم زي ما محدش عرف يقف قدامهم و هم بيفتتوا العراق و سوريا و ليبيا .... كان الجيش بيعزمهم على صينية مكرونة باللحمة المفرومة في سيناء الحبيبة. ‏‎grin‎‏ رمز تعبيري
.
و لو رجعتوا بالذاكرة كام شهر بس .... حتلاقوا ان الهجمة الاعلامية دي كانت منظمة و مدروسة بعناية، و اللى كان مخطط ليها خبراء بالفعل ... عشان كده نجحت في البداية في خطف وعي الناس أو على الأقل اثارة قلقهم، بل و رعبهم ايضا .
.
و لو ركزتوا بقي شوية و افتكرتوا كده ايه هي المواقع الاخبارية و الشخصيات العامة و صفحات الفيس بوك اللى اشتغلت على الموضوع ده .... حتلاقوا انهم هما هما نفس الصفحات و الاشخاص اللى بيكونوا مختفيين و مش بتسمع ليهم صوت و فجأة بيطلعوا و يظهروا مع بعض في أي مصيبة أو شماته ضد مصر في وصلة عزف جماعي ضد البلد.... كلهم بيتكلموا مع بعض في نفس الوقت و في نفس الموضوع و بنفس التركيز و المفردات زي ما يكون ليهم قائد واحد بيدوس على زرار أو بيصفرلهم بالصفارة.... فيبتدوا ينشروا نفس الخبر و يركزوا عليه من نفس الزاوية المشوهة .
.
احنا بنفكركم بالكلام ده ليه ؟.... لأن القصة النهاردة بتتكرر بنفس أدواتها في موضوع سقوط الطيارة الروسية .... وهما هما نفس الأشخاص بيحاولوا يوهموا الناس ان مصر عامله عمله سوده و هما شمتانين فيها ... لا و النبي !!! طب بصوا بقي عشان المرارة خلاص بقت على آخرها الله يرضى عليكم .
.
البهوات الفاشلين اللى وزنهم في الشارع صفر و اللى ملهومش حاجة واحدة ناجحة توحد ربنا غير انهم بيتريقوا على بلدهم و بيشمتوا فيها في اي مصيبة كانوا هما اصلا السبب فيها بجهلهم و بسلبيتهم ... بيقولوا ان مصر فاشلة و هي مسؤولة عن الحادثة و بيزيطوا مع قرارات الشيطان الأعظم في بريطانيا بوقف رحلات الطيران الانجليزيه لشرم الشيخ و اللى بعدها اخدت روسيا نفس القرار ..... و عاملين فرح و زيطة خايبة و مش مقدرين ان مصر بتنضرب في مقتل في المكان الوحيد اللى السياحة فيه شغاله و لم يتأثر بكل حوادث الارهاب اللى بتحصل في مصر بقالها كام سنة.
.
و لو سلمنا جدلا و استبقنا الأحداث و قولنا ان حادثة الطياره حادث ارهابي .... هو محدش واخد باله ان كل حوادث الطيران الارهابيه في تاريخ الطيران كله كان وراها عمل مخابراتي دولي مش عمل أفراد ؟؟؟ .
وخدوا عندكم مثلا:
طيارة لوكيربي اللى تم تفجيرها فوق أوروبا و كانت طالعة من مطار اسكتلندا (البلد الاوروبي) محدش قال عنها دولة فاشله ... و مفيش دوله منعت الطيران و لا منعت اي دولة طيرانها هناك .... و من كام شهر اتقتل عشرات السياح الفرنسيين في مدبحة في تونس و بعدها فرنسا لم تمنع سياحها و لم تجليهم من تونس ... بل طلعت ببيان رسمي بتدعم فيه السياحة في تونس !!!!!.
.
و حتي الطيارة الاوكرانية اللى سقطت بصاروخ أوكراني و تم اذاعه فيديو بالصوت و الصورة من القمر الصناعي الروسي ساعة ضربها ... لم تقم اي دوله بمنع طيرانها فوق نفس المكان و كأن لم يحدث شىء!!!.
.
اللى ميشوفش من الغربال يبقي أعمى ... و اللى مش شايف ان انسلاخ مصر من تحت عباءة الغرب و طرد النفوذ الامريكي من المنطقة و اعادة النفوذ الروسي اليه لإحداث التوازن حيعدي بدون مقاومة و عقاب يبقي مش فاهم حاجه.... و اللى مش شايف ان الإستهداف هيكون بالتركيز على اقتصادها بضرب عملتها الصعبه ثم ضرب السياحة و تخريب مرافقها لزياده الضغط الشعبي عليها مع الضغط السياسي الخارجي زي الزول الخايب بتاع هلايب في مقابل سد النهضه يبقي خايب.
.
روسيا تم فرملتها من الدفاع عن أمنها و استرجاع أوكرانيا من النفوذ الغربي باسقاط الطائرة الاندونيسية فوق أوكرانيا ... و الآن بيتم افتعال أو على الأقل استغلال الحادث لمعاقبة روسيا و مصر بنفس الطريقة ... و اللى بيخدموا عليهم موجودين وسطنا عايشين و بياكلوا من خيرنا و بيروجوا للمخطط ده.
.
فيه حرب تكسير عضم دولية شغالة دلوقت.. بس احنا مش شايفين منها غير جزء صغير جدا وهو الجزء الظاهر من قمة جبل الجليد ، لكن ماخفي كان أعظم.... و اوعوا تفكروا ان القصة هي قصة شوية الصيع اللى اسمهم داعش و جاجش و الخيابة دي ... و لكن لكل حادث حديث .... و كل واحد بيعمل حاجه بيدفع تمنها في الوقت المناسب..... عامةَ كلها ايام أو يمكن ساعات و حاجات كتير حتبان و يمكن تتغير كمان .
.
الوعي يا مصريين .... الوعي و الثبات ... احنا دلوقتي في الفينال ... في آخر و أصعب مرحلة .... الثباااات .
.
*شير من فضلك
‫#‏تحيا_مصر‬
‫#‏الثبات_الإنفعالي‬
‫#‏تحيا_مصر_ماحدش_تانى‬
‫#‏الشعب_يدعم_الرئيس‬
‫#‏مصر_أم_الدنيا_وهتبقى_قد_الدنيا‬
‫#‏مصر_قلب_النظام_العالمى_الجديد‬
‫#‏كلام_في_الصميم‬
صفحة ‫#‏كلام_فى_الصميم‬