من قبل Adel Ansary.
................
#عزيزى_أدم
فاكر فيلم " الباشا تلميذ " " بسيوني بسيوني ؛D .. شوفت لما انجي عرفت إن بسيوني ظابط ؟ قالتله ايه ؟ انهارت وقالتله ليييه كدا ؟ ليه ادتني كل حاجه وف ثانيه خدت كُل حاجه ! دنا اتغيرت عشانك ! واتصدمت صدمة عُمرها .. ! هو انا عاوز اقول ايه ؟
عاوز اقولك ان سنة ١٩٥٠ كان في دكتور علم نفس اسمه " Curt Richte " .. الدكتور دا عمل تجربه غريبه شويه ؛ جاب شوية فيران ، و حط كُل فار منهم في جردل مصنوع من الازاز ، و ملي نُص الجرادل ميه
و ولع سيجارته و مسك ساعته ف ايده و فضل يحسب الوقت و يراقب الفيران و هي عماله تعوم في الجرادل .. كُل فار جوا جردل ..
طيب و ليه ازاز بالزات ؟ ؛ قالك عشان الفار ما يعرفش يتسلق و يخرج .. في فار قعد ٥ دقايق و استسلم للغرق ، و التاني ٤ دقايق .. اكتر فار فضل ؛ يقاوم الغرق ١٥ دقيقه و بعدين استسلم
الدكتور " curt " قرر يكرر نفس الحوار دا تاني ؛ بس بشوية تغيرات بسيطه .. حط الفيران جوا الجرادل الازاز تاني بس كان بيراقبهم .. و الفار اللي يحس انه خلاص هيغرق ؛ كان يطلعه و ينقذه و ينشفه و يسيبه يرتاح
كل الفيران عمل معاهم كدا اللي يحس انه هِمد وهيغرق يطلعه وينقذه قبل لما يغرق بشويه .. وبعد لما طلعم ونشفهم وارتاحوا .. قام شايلهم وراميهم في الميه تاني !
طبعًا احنا قولنا ان اكتر فار قاوم الغرق ؛ قعد ١٥ دقيقه و استسلم ! .. تخيلوا الفيران لما اترموا تاني قعدوا قد ايه ؟! .. أقل فار فيهم قعد يقاوم ٦٠ ساعه ! تخيلوا ٦٠ ساعه مش دقيقه ! ، و في فار منهم قعد يقاوم الغرق ٨١ ساعه !! يعني قعد حوالي ٤ ايام يقاوم الغرق من غير استسلام ..
اشمعنا يعني طولوا المرة دي في المقاومه اضعاف اضعاف المره الاولانيه ؟! .. قالك لأنه ف المره الاولي كانوا فقدوا الامل و استسلموا ؛ لكن ف المره التانيه لما طلعهم و انقذهم قبل الغرق و نشفهم و رماهم تاني كان عندهم امل ان في طوق نجاه هينقذهم .. بعد دقيقه بعد اتنين انشاله بعد ٨١ ساعه !!
عاوز اقول ان الأمل هو الخيط اللي ممكن يتعلق بيه اي انسان .. القشايه اللي بيتعلق بيها الغريق ..
اوعي تعشم حد و تديله الامل و تخلي بيه ؛ ممكن يقاوم الدُنيا و يتحدي العالم علشان عنده امل و ثقه فيك .. مُتفائل انك يستحيل تخذله او تخلي بيه ..
الفيران قعدت تقاوم ؛ علشان عندها يقين ان في حد هينقذهم .. الانسان ممكن يتغير ١٨٠ درجه لو انسان علقه بحلم " سواء جوازه .. شُغلانه .. يساعده يحقق حاجه معينه "
و الله ممكن ينام و يقوم يحلم باليوم ده ! .. متقولش لابنك لما تنجح هجيبلك كذا و ابنك ياكل الكتب ، و ترجع تخلف وعدك ! .. في ناس ممكن تعلق احلامها و طموحتاها علي كلمه و وعد منك !
و كمان حاجه تانيه ؛ ممكن الانسان قدراته تتغير و تبقي تهد جبال ؛ لو نفسيته حلوه .. انا امي ممكن تشيل البيت و تقلبه فوقه لتحته تنضيف ؛ لو ابويا باس دماغها و قالها الله يقويكي ! .. كده بيديها زقه و دفعه تقويها .. و بيشحن بطارية السعاده جواها ! ..
العيل الصغير بيصحي بصعوبه للمدرسه و بطلوع الروح .. بس يوم العيد بيصحي الفجر و ممكن يطبق ! من فرحته .. و ده اكبر دليل لحديث النبي " الكلمه الطيبه صدقه " !
ما هو مش صدقه من فراغ .. صدقه عشان بتقوي ، و الابتسامه صدقه عشان بتدفع لقدام ..
- تخيل دكتور الكليه طبطب علي كتف الطالب و قاله انا متاكد انك قدها ..
- تخيل واحد قال لمراته انا ما قدرش استغني عنك و جاب لها وردايه .. دي ممكن تولع ف البيت من فرحتها ..
اوعي تدي الامل لحد و تقطعه ؛ جايز تكون انت الحبل الوحيد اللي غيرك شادد فيه .. و اوعي تكون بايدك تفرح حد ، و تحزنه و تكسر بخاطره ؛ كده انت بتهده و انت مش داري ..
اوفي بوعدك و فرح اللي منك ؛ لأن ربنا هيحاسبك علي كدا يوم القيامه ..
الحُزن بيهد زي ماقال بن القيم : الحُزن يُضعفُ القَلب ، و يُوهنُ العزم ، و يضر الإرَادَة ، و لا شَيء أحبُ إلى الشّيطان من حُزن المُؤمن.. !
☆ و صالح سليم قال عن الوفاء بالوعد: "لا اعتقد ان هناك سبب حقيقي يجعل رجل حقيقي لا يوفي بوعده ؛ إلا شيء واحد" .. قالوله: "هو ايه ؟" .. قال لهم الموت ! 
) #اوفي_بوعدك
#فرح_غيرك ! ) #منقول
فيديو جودة عالية انقاذ فأر يغرق في مسبح
فيديو جودة عالية انقاذ فأر يغرق في مسبح انقاذ-فأر-يغرق-في-مسبح فيديو يوتيوب
ARABEEVIDEO.COM
موضوع: تذكر دائماً بأن الأمل هو الخيط اللي ممكن يتعلق بيه اي انسان .. القشايه اللي بيتعلق بيها الغريق .. 
السبت مارس 18, 2017 5:22 am
