Mohammed Haffz
**********************
قناة الجزيرة .. شكرا على حسن تعاونكم ... تسريباتكم تفضحكم
==================================
من خلال متابعتي للدفعة التانية مما يسمى تسريبات لاتصالات ضابط مخابرات حربية وهو بيقوم بتوجيه الاعلاميين والفنانين للتأثير في الرأي العام المصري بخصوص قضية القدس، فهمت واتأكدت تماما من خيوط المؤامرة اللي قناة الخنزيرة بقالها يومين شغاله عليها بمنتهى الفرحة ، واتأكدت برضه إن قناة الخنزيرة هي نفسها اللي ورا هذه التسريبات المزعومة ..
وخلوني في البداية أقولكم ان المكالمات مش مفبركة فنيا .. يعني مفيش حد هنا عمل تقليد للأصوات ببرنامج مثلا.. و يعني برضه انه فيه شخص اتصل بالفعل بالاعلاميين والفنانين وكلمهم ..يعني برضه المكالمات حصلت ، ممكن يكون اتلعب فيها بمونتاج مثلا.. لكن هي حصلت
لكن في نفس الوقت اتضح لي إن الموضوع برمته - ومن خلال سماعي لكامل التسريبات المزعومة - مفبرك موضوعيا .. ومالوش أساس من الصحة
إزاي ؟
فيه شخص مجهول مزعوم أتصل بالناس دي وأوهمهم انه ضابط مخابرات (حربية) وعمل معاهم الحوارات دي ، ثم قام بتمرير المكالمات للخنزيرة وتوابعها في الأناضول
والاستنتاج ده بينته على الأدلة المنطقية الآتية :
.
● نوعية الصوت في المكالمات بتوضح ان صوت الضابط المزعوم هو اللي أعلى وأوضح من صوت باقي المتحدثين على الطرف الآخر ، بما يؤكد أن تسجيل المكالمات تم من هذا الجانب .. يعني مفيش (طرف تالت) ركب الخط وقام بالتسجيل للطرفين المتحدثين ، وطبعا مش منطقي ان ضابط مخابرات هيقوم بتسريب حاجة زي كده تبوظ شغله وتهدد مستقبله الوظيفي وتفضحه وتفضح الجهاز اللي بينتمي إليه
.
● وأصلا المخابرات الحربية مش هي المختصة بدارسة توجهات الرأي العام أو التأثير فيه.. المخابرات الحربية تختص بالمهام المعلوماتية الاستطلاع في كل ما يخص الشئون العسكرية ، أي داخل نطاق معسكرات القوات المسلحة ، ولا شأن لها أبدا بالحياة المدنية إلا فيما يتعلق بالجانب العسكري
.
● المضحك انهم بيقولوا ان الضابط المزعوم برتبة نقيب ، بينما في احد المكالمات نسمع هذا النقيب وهو بيقول للطرف الآخر.. هبقى أبعتلك السيديهاية مع (المقدم إمام) .. يعني ما شاء الله واحد نقيب والمساعد أو المراسلة بتاعه برتبة مقدم اللي هي رتبة أعلى منه برتبتين .. صدق اللي قالو انكوا شوية بقر
.
● طريقة كلام الضابط المزعوم مع المتحدثين على الطرف الآخر مش ممكن تتناسب مع طريقة وأسلوب كلام ضباط المخابرات بشكل عام .. مفيش ضابط مكن يقول للي بيجنده "هنفشخ ميتين أبوه" لأن أسلوب التجنيد والتوجيه لازم يكون ناعم ومهذب لأقصى درجة لضمان عدم وجود مقاومة من الطرف الآخر ، خصوصا وانت بتكلم ناس المفروض انهم من طبقة راقية ومن وجهاء المجتمع
.
● تحديدا في مكالمة الفنانة يسرا.. الباشا المخابرات وهو بيكلمها اكتشف واتفاجئ انها خارج مصر في مهرجان دبي .. يعني المخابرات بجلالة قدرها مش عارفة إذا كانت شخصية عامة زي يسرا موجودة في مصر واللا لأ ؟ ربنا يديم عليكوا نعمة الغبااااء
.
● فيه سؤال بيطرح نفسه .. هو ازاي تمكن هذا الشخص المزعوم من الحصول على أرقام تليفونات الفنانين والاعلاميين والتحدث معاهم .. والاجابة ببساطة ان هذا الشخص هو من العاملين في الوسط الفني أو الاعلامي ( معد برامج مثلا - مساعد مخرج - ريجسير) لأن هذه المهن هي اللي بتكون مهمتها التواصل مع الاعلاميين والفنانين دايما ، ومن الواضح ان هذا الشخص النصاب تم تجنيده بالفلوس من قبل قناة الجزيرة ، أو هو تطوع وعمل كده لأنه ينتمي لحظيرة خراف بني المرشد ، وبالتالي هو بيعمل ما يتوافق مع أفكاره الزرايبية ، ثم قام بتوصيله لقناة الخنزيرة وهي ما صدقت طبعا ، بل وقامت بتمرير الموضوع كله للنيويورك تايمز ذات التوجهات المعادية لمصر كما هو معروف .
.
● لاحظت دايما ان الشخص المنتحل لصفة الضابط وهو بيتكلم بقول للمتحدث على الطرف الآخر.. قناة (DMC) هتعمل معاك مداخلة بعد شوية وبيوجهه عشان يقول اللي هو عايزه ، وطبعا مفهوم ليه دايما الكلام على قناة (DMC).. لأنهم بيعتقدوا انها قناة مملوكة للمخابرات
.
● والسؤال هنا ..هل فيه حد عاقل أو حتى مجنون في مصر كلها ممكن يصدق أن الفنانة عفاف شعيب أو هالة صدقي أو حتى يسرا أو سعيد حساسين - مع كامل الاحترام ليهم جميعا - ممكن يأثروا في الرأي العام المصري وخاصة في قضية من الثوابت الوطنية المصرية ؟؟.. ليس هكذا تُطبخ الأكاذيب يا بـقــر
.
● والسؤال الأهم .. هل فيه حد مننا شاف أو سمع أي واحد أو واحدة من هؤلاء الفنانين والاعلاميين وهو يعمل مداخلة مع أي برنامج سواء في (DMC) أو غيرها وبيتكلم في القضية الفلسطينية وبيحاول يأثر في الرأي العام زي ما بتدعي الخنزيرة وتوابعها ؟
الاجابة عن السؤال ده لوحدها بتنسف مؤامرة الخرفان من أساسها ومن جميع أركانها
نشكركم على عظيم غباءكم .. والى اللقاء في جولات أخرى
موضوع: قناة الجزيرة .. شكرا على حسن تعاونكم ... تسريباتكم تفضحكم 
الخميس يناير 11, 2018 1:27 pm
