Shaban Mobarak
***************
لسة فيه أم بتنيم ابنها الرضيع على بطنه و ما تعرفش إن ده بيزود خطر الإصابة بالموت المفاجئ للرضع؟
لسة فيه أم بتشرب ابنها بيبي درينك الاعشاب يعنى ..رغم إن وزارة الصحة حظرت استخدامه ؟
لسة فيه أم بتعمل لولادها بيات شتوي من غير استحمام و لا خروج ..
و ما تعرفش إن قلة الاستحمام بتجيب جرب و قلة الخروج بتأثر على نفسية الطفل؟
لسة فيه أم بتعطي ابنها الرضيع مهدئات عشان ينام و مش عارفة إن ده ليه آثار سلبية على مخ الطفل ؟
لسة فيه أم ما تعرفش إن الخنفرة و الزغطة ظواهر طبيعية في الشهور الأولى ؟
لسة فيه أم ما تعرفش إن الرضاعة الطبيعية رقم واحد في أول ٦ شهور من عمر الطفل ، من غير اعشاب و لا ينسون و لا أكل و لا ميه ؟
لسة فيه أم ما تعرفش إن فيه جرعة تطعيم ڤيروس بي في أول ٢٤ ساعة من عمر الطفل ؟
لسة فيه أم ما تعرفش إن ڤيتامين ك حقنة بعد الولادة للطفل بيحميه من النزف و ڤيتامين د ٤٠٠ وحدة "ڤي دروب ٤ نقط " من أول يوم لعمر سنة يحمي من لين العظام ؟
لسة فيه أم ما تعرفش إن الصفرا مش عاوزة ڤيتامينات و لا لمبة نيون..عاوزة كشف و تحليل و متابعة أو حضانة ..
لسة فيه أم بتعرض ابنها للتلفزيون فترات طويلة و ما تعرفش إن ده بيعمل سمات توحد و فرط حركة؟
لسة فيه أم بتربط سرة المولود بحزام و ما تعرفش إن ده هيخليها تلتهب و إنها هتروح لوحدها في الغالب من غير ربطها ؟
لسة فيه أم بتضرب ابنها عشان بيبلل سريره و هو نايم و ما تعرفش إن الضرب بيزود الموضوع؟
لسة فيه أم بتكحل المولود و تغربله و ما تعرفش إن الرصاص في الكحل يضر الطفل و الغربلة تعمل نزيف في المخ ؟
لسة فيه أم قلقانه من قشرة الرأس للمواليد كل ما تشيلها بفرشاة و زيت زيتون ترجع و ما تعرفش إنها من سن ٦ شهور لسنة هتختفي تماماً ؟
لسة فيه أم بتعيط جنب طفلها لما يعيط جامد و يقطع النفس و يفقد الوعي ثواني و ما تعرفش إن دي نوبات حميدة و انفعالها الزائد بيخلي الطفل يزود فى عياطه كل مرة ؟
لسة فيه أم ما تعرفش تحمي طفلها ازاي من إنه يشرق في أكل أو ألعاب صغيرة بإنها تمنع المكسرات خصوصا الفول اسوداني و اللب و نشيل أي لعب صغيرة من قدامه و لو شرق تقلب الطفل على بطنه و تخبطه على ظهره خمس ضربات و ترجع تقلبه على ظهره و تضغط في نصف صدره خمس ضغطات
لسة فيه أم بنقلق لما تشوف بروز في ثدي الوليد و بعض نقاط اللبن و تعصرهم و ما تعرفش إن دي ظاهرة حميدة من هرمونات الأم و التعصير ممكن يعمل خراج للطفل ؟
لسة فيه أم ما تعرفش إن نوم الرضيع متقطع جداً و بيبدأ ينتظم عند ٦ شهور و تقلق لو الطفل نايم و خملان و مش راضي يرضع ؟
لسة فيه أم ما تعرفش إنه الكالسيوم مش ڤيتامين و لا يعطى روتين إلا مع تحليل دم يثبت نقص الكالسيوم و اخد الكالسيوم بدون داعي يترسب في الكلى
لسة فيه أم ما تعرفش امتى تقلق على تطور طفلها ؟
شهر ما بيتخضش من الصوت العالي ،شهرين ما ضحكش، تسع شهور ما قعدش ، سنة و نصف ما مشيش
لسة فيه أم ما تعرفش إن وزن طفلها بيتضاعف ٣ مرات في عمر سنة و طوله بيزيد بنسبة ٥٠٪ و مع كل زيارة للوحدة الصحية أو الطبيب لازم تقيس وزن و طول ومحيط رأسه
#منشن لغيرك واكسب ثواب
#منتدى_المركز_الدولى
رابط المادة::
موضوع: لسة فيه أم ما تعرفش...نصائح للأمهات 
الجمعة نوفمبر 23, 2018 4:32 pm
