Mohammed Haffz.
***************
على هامش أحداث الأمس
==============
■ امبارح كان يوم حافل بالأحداث والتصريحات والمشاهد الهامة ، واللي كلها حصلت لايف قدام عينيا أثناء إنعقاد الندوة التثقيفية للقوات المسلحة بمناسبة يوم الشهيد ، و كل حدث منهم محتاج عشرات المقالات عشان نديها حقها من الدراسة والتحليل ، وعشان كده هنكتب عنها تلغرافات سريعة كمجرد عناوين ورؤوس موضوعات
.
■ أثناء حديث السيد الرئيس لاحظنا انه يمكن للمرة الأولى بيتكلم ويذكر صفته الأصلية كمدير للمخابرات العسكرية وأعاد التأكيد على الجزئية دي أكتر من مرة ، وأعتقد انه هنا بيبعت رسائل لكل الأطراف المعنية خارجيا وداخليا بيفكرهم فيها هما بيلاعبوا مين ..وبيقولهم خللوا بالكوا.. انتوا مش بتلعبوا مع واحد من مقاطيع قهوة البورصة بتوع وسط البلد ..أنتوا بتلاعبوا مدير المخابرات اللي كاشف كل أوراقكم وعارف كل حيلكم الشيطانية وعنده الخريطة الكاملة لكل تحركاتكم أنتوا واللي مشغلكم
◆ الرئيس امبارح كمان عرى مؤامرة يناير بشكل صريح لما أتكلم عن أحداث محمد محمود وماسبيرو وغيرهم ، وأتكلم عنها بشكل واضح لا لبس فيه ووصفها بالمؤامرة لما قال ان المخطط كان هدفه اسقاط الدولة مش اسقاط النظام ، وشتان الفرق بينهما
.
■ أما درة الأحداث وأكثرها بهجة ونشرا للطاقة الايجابية ، فكان ترقية اللواء كامل الوزير لرتبة الفريق وتعيينه وزير للنقل والمواصلات .. وهنا لابد لنا من وقفة
◆ يمكن ما شوفتش حدث زي ده أجمع عليه المصريين وأسعدهم زي اللي حصل مع الفريق كامل الوزير.. ولأنه رجل استثنائي فكانت طريقة ترقيته للرتبة الأعلى استثنائية ومفرحة ، وكذلك كانت طريقة تكليفه بالمنصب الوزاري استثنائية بشكل احتفالي مبهج يليق بتاريخ الرجل وبمسيرة انجازاته الحافلة
◆ يمكن تكون دي أول مرة نصحى نلاقي مصر كلها بتتكلم عن وزارة النقل ووزيرها.. مع ان حدث زي ده في العادة مش بيلاقي اهتمام كبير من الناس لأنها وزارة خدمية مش وزارة سيادية وكمان هي وزارة خدمية من الدرجة التانية لأنها مش بتمس حياة المواطنين اليومية زي وزارة التعليم أو التموين مثلا ، ويمكن لأول مرة في تاريخ مصر نلاقي الاهتمام بتعيين وزير أكتر من الاهتمام بتغيير الحكومة بأكملها ، وفي الظروف العادية لو كنت سألت أي مواطن عادي عن اسم وزير النقل في أي عهد من العهود السابقة والحالية فغالبا مش هتلاقي كتير عارفينه ، لكن النهاردة لو سألت أي مواطن عادي هتلاقيه عارف ان الفريق كامل الوزير هو وزير النقل والمواصلات الجديد وهتلاقيه بيتكلم عنه بكل فخر واعتزاز وأمل في تطوير هذا المرفق الهام ، فهنيئا لهذا الرجل بحب الناس واهتمامهم وربنا يوفقه ويعينه على المهمة الصعبة اللي أُلقيت على أكتافه ... وهو لها باذن الله
.
■ أما الحدث الأصلي واللي كتير مننا نسي يتكلم عنه في غمرة فرحتنا بالفريق كامل الوزير فهو احتفالية يوم الشهيد ، واللي كلنا شوفنا فيها نماذج رائعة من عظيمات مصر من زوجات وأمهات شهدائنا الأبطال ، وشوفنا إزاي مدى صمودهم وثباتهم بل واعتزازهم بأبناءهم الشهداء الأحياء عند ربهم يرزقون واللي كانت أرواحهم بترفرف على القاعة وفي سماء مصر كلها .
◆ والمشهد المؤثر بالفعل كان مشهد احتفاء الرئيس الانسان بزوجات وامهات الشهدا الأبطال ، وخصوصا لما شوفناه وهو بيبوس إيد وراس السيدة العجوزة اللي تخطت عتبة المائة عام من العمر واللي قدمت اتنين من ابناءها شهداء في سبيل الله والوطن في السبعينات ..فهنيئا لها بما قدمت من فلذات كبدها ليسبقوها إلى الجنة في مقعد صدق عند مليك مقتدر.. وهنيئا لنا بهذا الرئيس الانسان .