تقرير يديعوت أحرونوت
رغم الخيانات و توصيل اخبار هجوم مصرى وشيك عن طريق حاكم عربى سافر اسرائيل فى السر و قابل جولدا مائير و حذرها من ان مصر و سوريا بيحضروا للهجوم و ان الهجوم حا يكون يوم 6 اكتوبر و ما غلطش غير فى ساعة الصفر (الرئيس السادات حكى ان اى خبر أو معلومه مهمه كانت بتتعرف كانت طوالى بتوصل من اطراف عربيه لإسرائيل فى ظرف دقايق)، لكن رغم كده بداية الحرب كانت مفاجاءه لإسرائيل.
وضحت تقارير أفرجت عنها هيئة أرشيف الدوله فى إسرائيل عن محضر اجتماع عاصف عقده مجلس الوزرا الإسرائيلى بعد 25 ساعة من اندلاع حرب أكتوبر، نشرها جورنال " يديعوت أحرونوت " الإسرائيلى فى سنة 2010 فى الذكرى 37 لحرب اكتوبر، إن القياده الاسرائيليه حصلها ارتباك كبير بعد ما عدا الجيش المصرى قناة السويس و ان فى ضهرية 7 اكتوبر اتعمل اجتماع عاصف بناء على طلب من جولدا مائير و شرح موشى ديان ازاى المواقع و التحصينات الاسرائيليه على طول خط قناة السويس وقعت واحده ورا التانيه فى ايدين المصريين و اكد ان خط بارليف وقع و انتهى امره و اقترح ان الجيش الاسرائيلى ينسحب لغاية منطقة المضايق بعمق 30 كيلو بعيد عن قناة السويس و ان الاسرائيليين يسيبوا الجرحى بتوعهم فى المواقع اللى بقت فى ايد الجيش المصرى، موشى ديان وصف الهزيمه " يوم القيامه " و قال: إكمننا مش حا نقدر ننقذهم فمضطرين نسيبهم و ننقذ اللى ممكن انقاذه فى المواقع التانيه و اللى يقدر منهم يفلت و يوصل المواقع الاسرائيليه يبقى يعمل كده و اللى عايز يستسلم للقوات المصريه يستسلم، و لازم نفهمهم اننا مش قادرين نوصل ليهم فيا إما يحاولوا يتسللوا أو يستسلموا " فردت عليه جولدا مائير و قالت " فيه حاجه انا مش فاهماها، انا افتكرت اننا حا نهاجمهم أول ما يعدوا القناه، فإيه اللى حصل ؟ " فقالها ديان: " راحت لهم دبابات لكن كان عندهم (المصريين) غطا مدفعى فدمروا دباباتنا و الطيارات مش ممكن تقرب بسبب الصواريخ. 1000 فوهة مدفع سمحت للدبابات المصريه انها تعدى القناه و منعتنا من اننا نقرب. دى الطريقه و التخطيط و تلت سنين تجهيز و استعدادات ". رئيس الأركان دافيد إليعازر اقترح تلت خيارات. الأولانى: نشر فرقتين لبنا خط دفاعى مؤقت، لصد الهجوم وبعدها شن هجوم مضاد، و وضح انه مش واثق من قدرة الخط الدفاعى ده على الصمود و صعب عمل هجوم مضاد. التانى: حشد قوات الجيش الإسرائيلى على طول خط المضايق في عمق سينا، لكن وصف الإختيار ده بإنه حا يكون مكلف جداً. الإختيار التالت اللى عرضه هو شن هجوم على و التقدم، على اساس انه تتقدم الفرقتين اللى بيقودهم أبراهام أيدين (بيرن) و أريل شارون. لكن شرح ان دى مقامره لإن مفيش عندهم غير فرقتين عسكريتين ما بين تل أبيب و قناة السويس، فإ1ا فشل الهجوم على القناه حا تتدمر تلت فرق اسرائيليه و فى ظرف يومين و لا تلاته ممكن الحرب تتنقل لجوه اسرائيل.
بعد رئيس الأركان الاسرائيلى ما استعرض التلت سيناريوهات اقترح شن هجوم مضاد لكن مش عبر قناة السويس لكن ضد حشود القوات المصريه اللى عدت القناه لترجيع الموقف زى ما كان قبل ما يعدى المصريين القناه و شرح: " جايز بمساعدة 200 ولا 300 بابه و بدعم جوى نقدر نكسر القوه المصريه اللى عدت القناه و نرجع تانى لخط الجبهه. لو العمليه دى نجحت حا نبقى فى وضع كويس و لو فشلنا الخساره مش حا تكون فادحه و حايبقى لسه عندنا قوه تمكنا من الانسحاب للمرات و نتحصن هناك ". القوات الاسرائيليه حاولت فعلاً تنفيذ العمليه و قامت معارك دبابات ضخمه بتعتبر من أعنف معارك الدبابات من وقت الحرب العالميه التانيه. لكن اسرائيل فشلت فى انها تعمل خرق فى تكتل القوات المصريه و قدر المصريين انهم يدمروا اعداد ضخمه من الدبابات الاسرائيليه [3].
السادات قاد مصر فى حرب اكتوبر.
خلد المصريين ذكرى عبور عساكرهم قناة السويس فى 6 اكتوبر 1973.
شهادة إيلى زاعيرا
مدير المخابرات الإسرائيليه إيلي زاعيرا قال في كتابه " حرب يوم الغفران " إن خطة الخداع المصريه هى أكبر نجاح علي المستوي الاستراتيجى و بتكمن عظمة الخطه وسر نجاحها في الإدراك بإن عشان تنجح فى خداع الجيش الاسرائيلى لازم مصر كانت تخدع الجيش المصرى نفسه لغاية لحظة بدء الحرب و عشان ينجح السادات فى خطة خداع الجيش المصرى كان لازم هو و كاتمين اسراره المحدودين إنهم ينفذو تلت شروط، هى:
الأول: الحرص على إنهم يخلو توقيت الحرب سر دفين و إنه ما يتوزعش كأمر عمليات سرى جداً لغاية أخر ثانيه.
التانى: إلغاء اجراءات الحشد و الاستطلاع قبل شن الحرب لإن أعمال زى دى بطبيعتها بتكشف النيات.
التالت: عمل خطة حرب بسيطه و فعاله ما تحتاجش اجراءات أو تحركات معقده بتتطلب تغييرات فى أوضاع القوات المصريه على الجبهه.
بيقول إيلى زاعيرا: الجيش المصرى نجح فى استيفاء و تحقيق كل شروط المفاجاءه، و اكتر من كده إن كل مناوراته من سنة 1971 كان هدفها تحضير خطه بسيطه يفاجىء بيها الجيش الاسرائيلى
[2].
التأثير و النتايج
بطبيعة الحال الحرب كلفت مصر فلوس و ارواح و اتأثر إقتصادها و تطورها الاجتماعى بطريقه سلبيه، لكن الحرب دي كان ليها تأثير اقتصادى ايجابى كبير على دول
الشرق الاوسط المصدره للبترول، البلاد دى زاد دخلها من تصدير البترول بأسعار عاليه بعد ما إرتفع تمنه فى الأسواق العالميه بسبب الحرب و ظهر فيها الثراء الفاحش و بكده، على عكس مصر، استفادت من الحرب مادياً. فيه عرب عبر
عالمهم الافتراضى شككوا فى ان حرب أكتوبر كانت تمثليه!. و من جهه تانيه، النجاح و الانتصار الكاسح اللى حصل بالذات فى الايام الاولانية للحرب بدل الاحساس بالهزيمة اللي حصلت للجيوش المصرية و العربيه في حرب الست ايام سنة 1967. تحقيق مصر لنصر استراتيجى كبير و وقوف قواتها على أرض سينا فى شرق قناة السويس مهد الطريق لعملية السلام اللي حصلت بعد الحرب و كمان لتغييرات اقتصادية، زي سياسة الانفتاح في مصر و خروجها من تحت سيطرة
الاتحاد السوڤييتى اللى لعب دور كبير فى مساندة مصر و مدها بالسلاح و العتاد عشان تقدر تواجه تدفق السلاح الأمريكى المتطور على إسرائيل.
زى أى حرب كان فيه طرفين متصارعين: مصر و اسرائيل. هدف مصر الاستراتيجى كان تحرير سينا و ترجيعها لمصر و هدف اسرائيل كان الإحتفاظ بسينا ومنع مصر من تحريرها. بغض النظر عن المعارك و الاختراقات هنا و هناك و التكتيكات العسكريه، المحصله النهائيه هى إن مصر حققت هدفها الاستراتيجى و قدر جيشها انه يعدى قناة السويس و يقتحم خط بارليف و يصمد فى سينا على ضفة قناة السويس الشرقيه بعمق 15 كم وبإمتداد 168 كم، و ما قدرش الجيش الاسرائيلى رغم كل المساعدات الضخمه اللى وصلته عبر جسر جوى إنه يطلع الجيش المصرى من سينا.
بيقول المحلل
مأمون فندى إن نتايج أى حرب هى اللى بتحدد مين اللى انتصر و مين اللى انهزم. نتيجة حرب اكتوبر 1973 الرئيسية هى إن مصر استردت سينا. البروتوكول العسكرى بتاع معاهدة كامب ديفيد اللى مضت عليها اسرائيل بيوضح من غير أى شك مين اللى انتصر حيث إن البروتوكول بيقول إن الجيش المصرى بقى مسيطر على الممرات و المنطقه ألف اللى بتمتد جوه سينا من الشيخ زويد شمالاً لشرم الشيخ جنوباً
[5].
مع ذكرى النصر فى العاشر من رمضان نبعث بالتحية لجيشنا المصرى البطل والرحمة لشهدائنا الأبرار وللقائد الزعيم بطل الحرب والسلام /محمد أنور السادات وسيظل جيشنا هو الروح التى تسرى فى جسد هذا الوطن وهو القلب الذى ينبض بالوطنية وهو الدرع والسيف الذى يحمى تاريخنا ومقدراتنا كل عام وجميع أفراد قواتنا المسلحة بخير وسلام وأبعد الله عنها كيد الأشرار أمين