خلاصة الشروحات في موضوع التسريبات

Mohammed Haffz
2 ساعة ·
خلاصة الشروحات في موضوع التسريبات
=======================
بعد اذاعة التسريبات المفبركة الكوميدية الأولى و اللي بأكد لكم انها لن تكون الأخيرة (و انتظروا غيرها كتييييير الفترة اللي جايه) .... و لأن الوقايه خير من العلاج ..... خلونا نتكلم في شوية نقاط محددة عن أسبابها، و ليه دلوقتي بالذات بعد 18 شهر من وقت تسجيلها المزعوم ؟، و ايه الهدف منها ؟ ، و مين المستهدف بيها بالظبط ؟
الأسباب :-
------------
• تفاجأهم بفشلهم في استغلال الحكم ببراءة حسني مبارك في الحشد المزعوم للشعب اللى بيدوروا عليه بقالهم 18 شهر و مش لاقينه .... فبيدقوا أي إسفين يهيجوا بيه الناس، و بيحاولوا عزف نغمة جديدة يرفعوا بيها الروح المعنوية عند قطعانهم الهائمة على وجوهها في الأزقة والشوارع أو في مجاهل السوشيال ميديا ليرددوها بعد قهرتهم بعدم نزول الناس يوم 28 نوفمبر.... (من فشل الى فشل بإذن الله )
• تحرك مصر الناجح و الفاعل خارجيا ضد تنظيم الاخوان الارهابي الدولي بعد تحويل الهجوم الأوروبي على مصر الى الدور الداعم لها ضد الارهاب الاخواني و خصوصا من ايطاليا رئيسة الاتحاد الأوروبي حاليا ،و فرنسا ، و نجاح مصر في إسكات المانيا و انجلترا تماما و إبعادهم بالتدريج عن دعم الجماعه ( على الأقل الدعم السياسي العلني)
• الهدف الحقيقي يكمن في حماية أركان التنظيم الدولي المتصدع بعد انتصار مصر في معركتها القانونيه ضدهم و موافقة الانتربول الدولى على ادراج أسماء قادتهم الدوليين على قوائم الانتربول لتسليمهم إلى مصر .... يعني الدولة اللي هترفض تسليمهم هتبقي قانونا بتحمي و تدعم قادة الارهاب .... و حسب القانون الدولي انه من حق الدول أن لا تسلم المطلوبين لو ثبت لهم أن القضايا ملفقة ... أو ان الأدلة تم تزويرها بدوافع سياسية ... أو ان القضاء في هذه الدول مسيس ... و ده سبب استهدافهم للقضاء و إصرارهم على ترديد نغمة القضاء المسيس .
• رعب الخونة سواء داخليا أو خارجيا بعد بدء تحريك القضية 250 لسنة 2011 و اللى بتحتوي على الحقيقة الفعلية للمؤامرة الدولية على مصر بكل أبطالها سواء كانوا خونة أو قتله ...... و هي بتضم اعلاميين و نوشتاء و سياسيين و سفراء دول و مراكز حقوقية و جواسيس، وكله بالتسجيلات صوت و صورة و بالشهود و المستندات ..... و بالتالي لو انت اثبت إن التسجيلات دي مفبركة ... يقولك يبقى كمان الأدلة دي مفبركة ...وفبركة قصاد فبركة ، و لو معرفتش يقولك يبقى برضه الأدلة دي مزورة لأنكم بتزوروا الأدلة زي ما زورتوا أدلة إدانة المواطن المناضل الشريف مرسي العياط .
• الضربات الأمنية الإستباقية المتتالية الناجحة سواء ضدهم أو ضد خلايا تنظيم داعش الوليدة، و اللى أفشلت كل مخططاتهم لنقل الصراع الى صراع مسلح ..... لدرجة استنجادهم و مبايعتهم لتنظيم داعش ... فيرد عليهم داعش باستنجاده بمجاهدي العالم ضد مصر ( الحقونا يا جدعاااااان .... احنا بنتفرم في مصر .... ماهي شغالة معانا في كل حته ... اشمعنا مصر )
• استهداف العمود الفقري و لوغاريتم الشعب المصري الحقيقي و هو صلابة الجبهة الداخلية التاريخية و التي كانت هي السر وراء بقاء الدولة المصريه عصية على التفتيت طوال 7000 سنة .... فبيتم تشكيكك في قيادتك ورموزها و أعمدة الدولة المصرية المتمثلة في مؤسساتها العسكرية و الأمنية و القضائية، كده في ضربة واحدة
• التحضير للانتخابات البرلمانيه و المحليات لشق الصف و الاستيلاء على أكبر قدر من المقاعد ( طبعا ده بعيد عن شنبهم لو عندهم شنب أصلا )
** الأهداف -:
------------------
• تشكيك حضرتك في المؤسسة العسكرية .... فتلاقي اللى قايم بدور الناشت المفتح بيقولك .... دي مؤسسة مهلهلة .... دول بيسجلوا للمجلس العسكري داخل مكاتبهم.... يعني بيقولك ان أمنك القومي مع أشخاص هواة .... في حين ان اتصالات الجيش و مكاتبه و مقراته مؤمنه بالكامل عبر دوائر مغلقة يستحيل إختراقها .
• يحطك في دائرة الشك و يدخلك في دائرة طاب مين اللى سجل ؟.... يعني فيه جواسيس .... و بعدين تلاقيه قعد و اتجعص بعد ما يولع السيجارة ويكلمك بكل ثقة و يطلعلك بالزغلولة الكبيرة "اللى سجل منهم فيهم" .... و يقولك دول خاينين في بعض .... و فيه " انشكاكات " في الجيش و انتظر الثورة الاسلامية في الجيش
• طاب ماهو بالعقل كده .... مادام كانوا واصلين كده لقلب الجيش من أكتر من 18 شهر .... و فيه ( انشكاكات داخلية ) و مادام المخابرات التركية الاخوانية واصلة و قادرة كده .... أومال ليه محذروش مرسي العياط قبل الانكيلاب الفزيييع .... و مين أصلا اللي عمل الانكيلاب ده مادام الجيش مخترق و نص المجلس العسكري ضد المجلس العسكري ..... (فعلا العقل ده نعمه من ربنا ) و أومال مين بقي اللى طاحن الخلايا الارهابية و تنظيم بيت المقدس و خلايا داعش و جاحش فعليا على الأرض ؟
• المضحك ان التسريبات نفسها بتتكلم على تزوير الوضع القانوني لحبس الجاسوس مرسي العياط و مش بتتكلم على تلفيق التهم نفسها ليه .... و طبعا ده على أساس انه المفروض ان لما يتقبض على رئيس جمهورية جاسوس يتم احتجازه في حجز قسم الدرب الاحمر أو في قسم الطالبية مثلا .... أو في سجن من السجون اللى اقتحموها قبل كده عشان يروحوا يطلعوه منها زي ما حاولوا يطلعوه من نادي الحرس الجمهوري اللي حاولوا يقتحموه قبل كده
• و مادام كانوا عارفين مكانه .... أومال كانوا بيولولوا و بيصرخوا ساعتها و بيقولوا الراجل اتخطف و مش عارفين مكانه ليه طوال الفتره اللى فاتت ؟.... و ليه ماراحوش يطلعوه من المكان ده زي ما اقتحموا مقر الحرس الجمهوري قبل كده ؟.
• أنا مش هأطول عليكم عشان عيب اننا نناقش التسريبات الهبلة دي اللى سهل جدا تتعمل ببرامج كومبيوتر متاحة على النت، و ممكن لأي متخصص انه يعملها .... يعني ممكن نخلي المرحوم اسماعيل ياسين بيتكلم و بيعلق على أحداث اعتصام رابعة
الجميل أنها -و كالعادة - جت على دماغهم بسبب غباؤهم لأنها هتكون فرصة أخرى للفرز .... و لو تلاحظو انهم بيشتغلوا في مجموعات عمل .... واحد يرفع الكورة و تلاقي الباقي واقف و بيتسابق انه يشوط الكوره بطريقة مفضوحة .... حاولوا انتوا بس تشوفوا مين اللى بيتكلم و مين اللى بيخدّم على الفكرة و هتلاقوهم هما هما نفس الدائرة بأشخاصها سواء نوشتاء أو اعلاميين او صحفيين .... كله بيخدّم على الفكره في مجاله و بنفس الحماس .
شوفوا كده و أربطوا ما بين اللى بيتكلموا عن الموضوع ده ... بطريقة الهندسة الاجتماعية العبيطه بتاعتهم .... تلاقي الواحد منهم بيخشلك بنفس الطريقة و الاسلوب .... تلاقيه متحمس و داعم جدا و بعدين يسحبك شويه شويه ....
• أنا بأحب مصر و بأحب الجيش... لكن السيسي و القادة دول هيضيعوا الجيش بتاعنا حبيبنا ....
• أنا مع السيسي و انتخبته.... لكن لسه فيه فساد و فيه إهمال كبير
• أنا مع الجيش... لكن الجنود اللى بتموت دي ذنبها إيه
• الحكومة هايلة.... لكن فيه مشاكل كتير و الفساد هو هو و الوزراء و المحافظين و المحليات بايظه.
و الفتره اللى جايه هتلاقوا تركيز شديد على موضوع تسجيلات كتير .... و هتلاقوا أصوات كتير و ممكن و عادي جدا تلاقوا صوت السيسي في تسجيلات .... و حوارات كوميدية .... فكبروا دماغكم.
و علي فكرة .... الرسالة هنا انه حتى لو كنت انت مواطن شريف و كنت بتتكلم بنفس الطريقه لأنك شايف ان فيه قصور في اتجاه معين ( وأكيد طبعا فيه قصور لأن الكمال لله) .... فخليني أفكرك أنهمش وقته خاااالص و بالذات في الفتره دي .... لأن وقت الحروب لازم يكون فيه ترتيب أولويات و احساس بالمسؤولية عشان متبقاش أداه في إيديهم و عنصر مساعد ليهم و انت مش حاسس.
الثبات ثم الثبات ثم الثبات ..... الأربع شهور اللى جايين حاسمين جدا ، و أمريكا و الغرب لو ما أوقفوش تقدم الدولة المصريه و قضوا عليها .... مش هيعرفوا يعملوا حاجه بعد كده.
أوقات الحروب مفيش رأي آخر و لا حرية رأي .... في الحرب العالميه التانيه أمريكا جمعت من الشوارع كل واحد من أصول يابانية و حطتهم في معتقلات جماعية في الصحراء طوال خمس سنوات الحرب .... هتلر جمع كل اليهود في معسكرات مغلقة وعزلهم عن المجتمع ،و لما زهق منهم حرقهم .... بريطانيا فرمت المشاغبين من 3 سنين و قالت عندما نتكلم عن الامن القومي للمملكه فلا أحد يحدثني عن حقوق الانسان .... روسيا قضت على الارهاب بمعاقبة أهل الارهابي كلهم جنائيا و أقاربه ماليا في التعويضات حتى الدرجة الثالثة..... احنا بقى في مصر معملناش كده ... احنا ماشين بالقانون الطبيعي و من غير قوانين استثنائية .... و سايبينهم عايشين وسطينا .... بس اللى بنقول عليه في الوقت ده .... إن رفاهية الاختلاف حاليا مش وقتها خااااالص
تحياتي
‫#‏تحيا_مصر‬
‫#‏كلام_في_الصميم