معجم الشنقيط في شرح فنون التظبيط ... (تظبيط "البردعة" على ضهر الحمار) .إعدادات ما قبل ذكرى 25 يناير

Mohammed Haffz
18 ساعة ·

معجم الشنقيط في شرح فنون التظبيط ... (تظبيط "البردعة" على ضهر الحمار) .
===========================================
.
إعدادات ما قبل ذكرى 25 يناير
-----------------------------
شوف يا مولانا، في الأيام المفترجة دي تحديدا هتلاقي حاجات غريبة بتظهر قدامك كده بصورة مكثفة ، يعني مثلا شوية مواقع مجهولة المصدر ، على جرايد اسمها غريب لوز العنب، على عناوين من اللي بتشد الزبون اللي هو حضرتك ، عناوين من نوعية ( شاهد الضربة القاضية من أردوغان للسيسي .... تعرّف على أسباب تغيير مدير الأمن الوطني .... نظام السيسي يترنح قبل 25 يناير ... شاهد بالأسماء الأحزاب و الحركات التي أعلنت مشاركتها في 25 يناير .. عضو بالبرلمان الكوالالمبوري يؤكد أن نظام السيسي يحتضر .... كاتب موزمبيقي شهير يشرح أهم الأسباب التي أدت إلى سقوط نظام السيسي ...عرّافه بنغاليه تتنبأ بسقوط السيسي ) .
.
و لو فتحت أي موقع فيهم هتلاقي جوه كلام بلح... أه والله بلح ، مش مهم ، ماهو انت أصلا لا بتفتح ولا بتقرا ، بتاخد العنوان و تتحمس ، و بمجرد ما تتحمس كده تبقى العملية تمت بنجاح ، و جاري تظبيط البردعة على ضهر جنابك ... بعد كام يوم بقى هندخل في مرحلة ( دعاء الركوب ) ، و عموما إوعى تسأل نفسك هي ليه كل الإعلانات و المواقع المشبوهه دي مكتوب تحتها ( إعلان مموّل ) .
.
و في الفيس بوك هتلاقي الكُتّاب اللي دماغهم ألماظات ،، عارف حضرتك مين اللي بيعجبني ؟ بيعجبني الواد الكولجي اللي كل حاجة تحصل حواليه يقعد يعصر دماغه لحد ما ينزل منها جاز عشان يعرف يفسرها على إن السيسي الفاشي القمعي هو اللي ورا الحكاية ... يعني مثلا ... هيقولك رئيس الوزار ده فاشل ، و لما السيسي يشيله هيقولك ده شاله عشان كان مناضل و بطل ... هيقولك مفاوضات سد النهضة دي كلام فارغ ولازم تهديد بحل عسكري ، و لو حصل تهديد فعلا هيقولك بس السيسي كده بيلبسنا في الحيطة ...هيقولك السيسي بيصحى كل يوم الصبح يكلم القضاة نفر نفر و يقولهم اصدرو أحكام بإيه .... ولو إخوانجي طلع براءة هيقولك السيسي بيتصالح مع الإخوان الإرهابيين مش قلت لكو انها صفقة ؟ ولو اخوانجي اتحكم عليه هيقولك آدي نظام القمع ..الدولة البوليسية رجعت من تاني.. والسيسي عايز البلد تولع و مش عارف ان المصالحة هي الحل .
.
.
عزيزي الكولجي ( المركوب ) أبو دماغ ألماظات ، و عزة جلال الله انت بتصعب عليا ، يا صديقي أنتَ بائس ..أيوة والله بائس .. وبؤسك غلب بؤس الجمل اليتيم .
-----------------------------
By: Mohamed Hussein