Mohammed Haffz
3 دقيقة ·
- في تركيا انفجار ضخم كل يومين تلاتة ، فتقوم أمريكا و حلفائها يقررو انهم يحذروا رعاياهم من السفر لمصر !! ، يعني على رأي القرموطي في الفيلم ( أمريكا لو عرفت ان كوريا الشمالية عندها نووي و المصحف الشريف هتضرب سوريا !! ) .
.
- بوستات الإرهابيين و فيديوهاتهم و صور الدبح والقتل بيتم ترويجها عالفيس بوك بشكل عجيب ، و لو واحد كتب بوست يقول فيه للارهابي انت راجل نوتي ! ، تقوم ادارة الفيس بوك حاذفه البوست و عامله حظر نشر لصاحبه ( زي علاء حمودة والعبد لله كده ) ، و ممكن تبعت له رسالة تقوله عيب تقول عالإرهابي الكيوت انه نوتي !! .
.
- عندنا طيارة انفجرت في سينا من ييجي سنة ، و من يوميها و احنا بنحايل و نطبطب و ندلع من غير فايدة .. معلهش أصلنا عايزين تشديد في الإجراءات الأمنية .. طب هنبعت لجنة تشوف .. طب هنفكر .. طب حطولنا كاميرات مراقبة في كل ربع متر .. لأ خلوها كل عشرة سنتيمتر.. معلهش هنبعت لجنة تاني ... طب احتمال يعني ربما يعني may be .. طب هاتوا وزير الداخلية بتاعكوا ناخده رهينة عندنا عشان نبعت لكو السياح !! ، و في فرنسا عيلين تلاتة احتلوا باريس و نيموها من المغرب و انفجارات في مطارات و محطات مترو ، و في تركيا كام طيارة احتلوا العاصمة و ضربوا البرلمان بس الحياة بيس و الأمن مستتب و السياحة و الدولارات نازلين زي الرز ، و يقولوا عنها أنظمة سياسية مستقرة
.
- مصر من سنين طويلة و هي بتصدر محاصيل زراعية و فاكهة ، و من سنين طويلة و هي منتصرة عالكيان الصهيوني ، و من سنين طويلة و هي عندها سجون ( زي أي دولة في كوكب الأرض ) ، انما الجديد بقى و اللي اكتشفوه فجأة إن محاصيلنا الزراعية فيها فيروس إيه و بي و سي و اكس واي زد ، وفيها دوسنتاريا و انكلستوما ، و اكتشفوا إن مصر مانتصرتش في 73 ( اكتشفوها أول امبارح بالليل الحكاية دي ) ، و اكتشفوا كمان ان السجون بتاعتنا بتجيب سرطان و إيدز و مايه بيضا و مايه زرقا و مايه خضره .
.
- كارتر و عياله و صبيانه و الجزيرة و الجرايد الأمريكية و البريطانية تحسوا انهم قاعدين لنا , بطريقة ( أستاذ متفرغ ) .. حتى التاريخ بيتم تشويهه بطريقة ممنهجة ، و الحاضر نفس الشئ ( ماهو الحاضر ده بكره هيبقى تاريخ ) .. ادخلوا على جوجل و يوتيوب و انتو تعرفوا حجم المعركة القذرة و حجم المؤامرة ، وهتشوفوا ازاي أول ما تفتحوا اليوتيوب مثلا بتلاقي الموقع بيفتح لك ماسورة مقاطع كلها عن المذيع فلان اللي بيمسح الأرض بقنوات الانكيلاب والمناضل ترتان اللي هز عرش الإنكيلاب ، و الشيخ بخشوان يزلزل الأرض بدعاءه على السيسي الطاغية ، والملايين خلفه يبكون من فرط الشعور باللذة .. وتفتح أي حاجة من دول تلاقيها بلح ..بس المهم تثبيت الصورة الذهنية انهم أغلبية ومنتشرين في كل مكان
أمريكا و صبيانها بيستخدموا كل أوراقهم القذرة بما فيها الميديا و مواقع التواصل و محركات البحث و التكنولوجيا الحديثة .
.
- القصة باختصار لا لها علاقة بعبد الفتاح السيسي ولا محمد حافظ ، المطلوب هو إسقاط جيشك و تدمير دولتك إما بالضربة القاضية أو بمجموع النقاط ( زي ما قال المناضل مندوح حمزة راعي كلوتات الثورة ) .. أصلا أصلا اسقاط جيشك بيعني إن تدمير دولتك هو مجرد إجراء روتيني ياخد له يومين تلاتة !! .
.
اللهم قد بلغت ، اللهم فاشهد .
.
-----------------------------
By: Mohamed Hussein
موضوع: مصر تواج المؤامرة... المطلوب هو إسقاط جيشك و تدمير دولتك إما بالضربة القاضية أو بمجموع النقاط 
السبت أكتوبر 08, 2016 7:30 am
