الحكومة وأكذوبة الدعم..

Abo Kareem Mahmoud Salah

--------------------

لما كان برميل البترول ب 140 دولار الحكومه قالت لنا ان لتر البنزين بيكلف الدوله 5.70 وان الدوله بتبيعه ب 2.60 يعني بتدعمه 3.10 وقتها قلت يا عم ارفع الدعم عن البنزين لان اللى عنده ملاكي لا يستحق دعم لكن ما ترفعش السولار لانه يمس محدود الدخل ها يمس سعر المواصلات العامه والنقل

طيب دلوقتى برميل البترول ب 37 دولار يبقي بالتالى لتر البنزين مبقاش يكلف الدوله 5.7 زي ما كان ايام 140 دولار لكن بنسبه وتناسب يبقي لتر البنزين بيكلف الدوله 1.50 وانت بتبيعه ب 2.60 يبقي فين دعم الطاقه اللى انتم عمالين تغنوا بيه على الناس

طيب الكهرباء كانت ب 8 قروش وقلتم بتكلف الدوله 100 قرش انهارده تقريبا اكبر شريحه مستهلكه للكهرباء بتتحاسب ب 95 قرش يبقي فين الدعم اللى ها ترفعوه ؟

طيب يبقي مش فاضل غير ال 15 ج بتاع الدعم التمويني لكل فرد مستحق شهريا

واكتر من نص 60% من المجتمع اساسا مش موجود فى منظومه التموين الغذائي باعترافكم ان التموين بيغطي 40 مليون مواطن يعني 600 مليون شهريا يعني 7 مليار سنويا هم دول اللى زنقوا الموازنه بتاعتكم اوي ومحتاجينهم ؟ يا عم ده انت تجيبهم من مرتبات طابور الاستشاريين فى كل وزاره فاشله

دعم ايه اللى عمالين تضحكوا بيه على الناس وعاوزين ترفعوا كخطوه اساسيه للاصلاح الاقتصادي ايه تاني ؟

دعم التعليم طيب هو فين دعم التعليم ده يتلخص فى مرتبات المدرسين !!

دعم الصحه طيب هو فين دعم الصحه يتلخص فى مرتبات الاطباء وطاقم التمريض والعلاج على نفقه الدوله اللى مليان فساد وتلاعب

نفسي اعرف ايه الذله اللى انتوا ماسكينها على الشعب عمالين تذلوهم بيه كل شويه رفع الدعم رفع الدعم رفع الدعم دعم ايه يا فاشلين ؟

الاصلاح الاقتصادي يبدا بهيكله ال 7مليون عاطل وفاسد ومرتشي وعديم الضمير اللى انتوا بتديروهم وياريتكم فالحين فى ادارتهم اساسا او نقول 90% منهم علشان مش بحب التعميم

الاصلاح الاقتصادي يبدا بالتفكير خارج الصندوق الاسود اللى حابسين نفسكم فيه وتفكروا فى تنميه موارد الدوله من العملات الاجنبيه صرفنا مليارات على المرافق ومش عارفين تجيبوا مستثمر اجنبي واحد صرفنا مليارات دعايه للسياحه ومش عارفين تجيبوا مليون سائح على بعض قفلتوا كل مكاتب الصرافه ومعرفتوش تسيطروا على انهيار الجنيه وارتفاع العملات الاجنبيه

الاصلاح الاقتصادي فى نهضه صناعيه وتشجيعها لسد احتياجات السوق من المنتج المحلى استغناءا عن المستورد اللى بيهرب العمله بره مصر

الاصلاح الاقتصادي فى الحد من استيراد كل السلع الترفيهيه بقوه القانون وبالاجبار حتى للى معاه يشتري ما يلاقيش المنتج ده فى السوق المساواه فى الظلم عدل

الاصلاح الاقتصادي بقانون يجرم اي مؤسسه مصريه تقبض موظيفنهم اومستشارينهم او لاعبيتهم او مدربين انديتهم او مدارس خاصه او جامعات بالدولار

يا مؤمن انت بتستورد ب 2مليار دولار خله اسنان اللى تصنيعها محتاج ماكينه ثمنها 18 الف دولار وزيها زي ابره الخياطه زي فلتر زيت وبنزين السيارات زي حاجات كتيره جدا

الاصلاح الاقتصادي لا يمكن يكون بتعويم عمله دوله وانت معندكش القدره الاحتياطيه للعمله الاجنبيه فى البنك المركزي لتغطيه احتياجات السوق لان وقتها ها تلاقي الجنيه مات والدولار وصل 40 ج

الاصلاح الاقتصادي يبدأ بانسحاب حكومه عاجزه عن الرؤيه والتفكير خارج الصندوق واحلال اصحاب افكار مبتكره جديده فى كل الوزارات

الاصلاح الاقتصادي يبدا باعترافكم بالفشل اولا واخيرا بلا مسكنات ولا تسويف

بس خلاص .......

وها اقول تانى والبغال والحمير لتركبوها مش لتناقشوها ...........