Mohammed Haffz وMohamed Ali.
الأخ المناضل ابراهيم فيسا - ضيق الله حمالاته - بيقولك إن الدولة بتسيس الرياضة، وإن السيسي بيغيب الشعب ويلهيه بماتشات الكورة
مش فاهم فين وإزاي التسييس ده حصل..؟
هل السيسي مثلا راح جاب منتخب غانا و اخترع مسابقة فنكوشية مالهاش وجود في الوجود عشان يلهي الشعب بماتش وهمي ؟
واللا يكونشي السيسي جاب عساكر أمن مركزي وعملهم منتخب غانا وخلاهم يتغلبوا مخصوص أمام المنتخب المصري عشان الشعب يفرح ويزيط ويتلهي ؟
واللا يمكن كل الجماهير اللي حضرت الماتش وفرحت والملايين اللي خرجوا في كل شوارع مصر وعبروا عن فرحتهم بمنتهى التلقائية والعفوية ، كل دول كانوا كتايب السيسي الالكترونية الحلزونية اللي مالهاش وجود غير في وجدان الأخ فيسا المنبعج ؟ وكانوا نازلين عشان يلهوا الشعب
واللا انت زعلان ان الرئيس هنأ المنتخب بالفوز وشايف ان ده تسييس للرياضة ؟ تصدق معاك حق ، كان المفروض الريس يشتمهم انهم كسبوا الماتش ويقولهم أوعوا تعملوا كده تاني يا شوية كلاب ..
هل مثلا الدولة قررت تدي الناس اجازة رسمية في اليوم ده عشان تقول تسييس ؟
واللا السيسي صرف للشعب علاوة بمناسبة الفوز في المباراة .؟
دا حتى ما صرفش مكافأة ولو رمزية لفريق المنتخب الفائز
فين بقى التسييس ؟؟
أنا بجد مش فاهم فين التسييس اللي بتقول عليه ده ؟ الحاجة الوحيد اللي اتأكدت منها انه مفيش تسييس ، لكن فيه تسويس في دماغك المتعفنة
ولو هنتكلم عن التسييس والاستغلال ، تعالا بقى نتحاسب ونشوف مين اللي بيستغل أي حاجة لخدمة أغراضه وأجنداته الخاصة
ما تيجي نشوف انتو استغليتوا ايه في السياسة
استغليتم أزمات بتحصل في أي بلد في السياسة .. تفجير الطيارة الروسية و المصرية و اختطاف طيارة مصر للطيران مثال علي ده
استغليتم الفن في السياسة .. زاب ثروت و حمزة نمرة و كايروكي و برنامج عمرو سلامة و أبلة فاهيتا مثال برضه على كده
استغليتم الفيديوهات و الكوميكس في السياسة ... و بيدجاتكم مالية الفيسبوك و تشهد علي كده
استغليتم الدم و الموت في السياسة ... و افتكروا انحيازاتكم مع سقوط كل شهيد شرطة و جيش في الحرب على الارهاب
استغليتم الرياضة نفسها في السياسة .. افتكروا رفع اشارة رابعة و رفض التسليم علي طاهر أبو زيد
استغليتم الأعراض في االسياسة .. افتكروا قضية عنتيل المحلة اللي قولتوا علي الستات اللي ظهرت معاه في الفيديوهات زوجات قضاة و ضباط شرطة و طلع دا كله كلام كدب بعد كده
حتى الكوارث الطبيعية استغلتوها ووظفتوها لخدمة السياسة .. سيول راس غارب و أمطار اسكندرية و البحيرة مثال على كده
اذا كانت فرحتنا بتزعلكم قولوها صريحة و بلاش تماحيك و تلاكيك و تجميل للقبح و السواد و الغل و الكراهية اللي جواكم .. احنا نفرح وقت ما نحب و نغني وقت ما نحب ... واللا هو حلال ليكم وحرام لينا ؟!!!
إذا كنت بعد دا كله لسه شايف إن السيسي بيلهي الشعب بالكورة ، فأسمح لي أقولك ..إتلهي