- في قضايا الأمن القومي مفيش حاجة اسمها فى المطلق لاحرية ولاديمقراطية ولاقضاء ولامجلس نواب.

Mohammed Haffz

************

وبعد الصلاة على سيدنا النبي ،، و بعد ما نسيبنا من أبو حمالات ووجدانه ، وخالد علي وخَبَلانه ، والبوب وتخرصاته ، ونجاد البرعي وتهجيصاته ، وحمدين ومزايداته ، والبلشي وشألبظاته ، وكل شلة زلنطحية وعربجية وفسيجية دكاكين الخردة السياسية ، فيه كلمتين لابد منهم :

.

- في قضايا الأمن القومي مفيش حاجة اسمها ديموقراطية في المطلق .. ولا حرية تداول معلومات في المطلق ... ولا شفافية في المطلق ...ولا برلمان مستقل في المطلق ... ولا قضاء إداري مستقل في المطلق ... الكلام ده مش هنا بس..دا في كل الدول الكبيرة المحترمة ، مفيش حاجة تفوق الأمن القومي في الأهمية .. فكرة تصدير المعنى المطلق لكل حاجة مش هتلاقيها غير عند الكولجية و الزلنطحية و العربجية بتوع منتدى فتكات لعلوم الهري السياسي .

.

- يعني ايه الكلام ده ؟ يعني ماتتفاجئشي مثلا لو اتفاقية ترسيم الحدود اترفضت من البرلمان أو من القضاء الإداري ، و لو حصل كده ( احتمال يحصل ) ما تقولشي البرلمان انتصر على الرئيس أو القضاء يعري الرئيس والشعارات اللي مليانة حماقة و عبط و حمورية دي .. قولتلك يا بني بطل تتفرج على ابراهيم عيسى وتقعد تنهق و ترفس وراه

.

- برضه يعني ايه الكلام ده ؟ يعني فكرة ترسيم الحدود اتقالت مع فكرة القوة العربية المشتركة و الجسر البري و اتعملت لغرض ما ، ليه و ازاي و الغرض ايه ؟ الإجابة عند الرئيس و الجيش و والمخابرات والخارجية ، مش عند أم نحمده بتاعة الكرشه ..

طب هه و بعدين ؟ و بعدين ياسيدي الدوله بتحتفظ لنفسها بإمكانية تعديل الخطة أو تأجيلها أو الغائها بناء على مستجدات على الأرض ، خصوصا لما يكون الموضوع فيه طرف تاني ( و جايز أكتر من طرف بس مش ظاهر ) ، الدولة ترجع ازاي بقى ؟ الحكومة و الرئيس يقولوا عملنا اتفاقية ترسيم حدود و طلع تيران و صنافير في السعودية ، و بعد كام شهر يلحسوا كلامهم ويقولوا لا ماحصلش و مستعدين نحلف على مصحف ؟ لا طبعا ماينفعش كده .

.

- أومال ايه اللي ينفع ؟ اللي ينفع اننا نقول : سوري والله البرلمان بتاعنا رفض الإتفاقية ، احنا أسفين جدا القضاء الإداري رفض الإتفاقية .....معناه ايه الكلام ده ؟ معناه ان مؤسسات الدولة القوية المحترمة بتكمّل بعض ، و في الحاله دي بتمثل ( سكة الرجوع ) عشان مصالح الدولة اتغيرت على الأرض ( مصالح الدولة مش مصالح السيسي والله العظيم .. يارب أبوك يحج ) ، المعطيات اتغيرت ... أو جايز حققنا حاجة كنا عايزينها و انتهت القصة ، يعني الموضوع كله كان عبارة عن مناورة سياسية على الأرض لخدمة ملفات تانية ..إيه الملفات دي ، والختمة الشريفة ما اعرف.. أنا مجرد مواطن عادي..والله العظيم و عزة جلال الله مواطن عادي ... مجرد مواطن بيثق تماما في رئيسه و خارجيته و جيشه .. مواطن عادي بس متأكد ان عبد الفتاح السيسي لو كان عايز يبيع أو كان عايز فلوس كان راح شارك في الحرب ضد سوريا أو شارك في حرب اليمن ، وساعتها كان هياخد مليارات متلتلة و ما تبقاش عنده أزمة مادية اطلاقا .. والعقل بيقول إن الراجل اللي ما يبعشي جنوده ولا يبيع قضايا بلده ( زي مثلا انه يتصالح مع جماعة ارهابية) رغم كل الضغوط اللي اتعرض لها هو بالتأكيد راجل مستحيل يبيع ذرة من ترابها .

.

في النهاية عايز أقول لحضراتكوا حاجة : اتفاقية ترسيم الحدود شارك فيها مؤسسة الرئاسة والمخابرات العامة وهيئة الأمن القومي و وزارة الخارجية و الجيش المصري .. ده غير جهات تانية كتير ، و أنا قولا واحدا معنديش استعداد للتشكيك في مؤسسات الدولة دي .. أثق تماما في رئيس مصر و مخابرات مصر وخارجية مصر وجيش مصر وفي وطنيتهم أيا ما تكون النتيجة النهائية للإتفاقية ( تمريرها أو رفضها ) ... و لا يعنيني أبو وجدان ولا أبو حمدان ولا أبو قردان .

.

-------------------------------

By: Mohamed Hussein

» مشروعات الأمن القومي .. <فنكوش السيسي >
» السيسي يطارد "فلول" إسرائيل في أفريقيا.. خبراء يؤكدون: تحركات الرئيس حفاظا على الأمن القومي
» مفيش مؤامرة 0000عاهرة أمريكا الأولى ، المدعوة سي إن إن بتلمح لفرضية إنتحار قائد الطائرة المنكوبة ..
» للناس اللي بتسأل ازاي الدولار بينزل ، رغم انه مفيش تصدير ولا سياحة ولا انتاج ولا استثمارات شوفناها
» رئيس هيئة البحوث العسكرية: الجيش حمى الثورة ونشر تشكيلاته فى الميادين المهمة بالمحافظات بعد اختفاء الشرطة من الشارع والأقسام.. وأمّن معسكرات الأمن المركزى والسجون ومديريات الأمن والمخازن الأثرية