توقفوا ولو لحظة أو يوم عن الهيافة .. اعتبروه يوم للتغيير ( يعنى hayafa free day )

Mohammed Haffz

..............................

لما واحد يبقى باشا و الناس تقوله يا باشا وطول عمره شايف نفسه عايش فوق شواشي النخل ، و الباشا يكبر و يبقى باشا كبير أو سعادة الباشا ، و ابنه يتقاله انت ابن مين يقول انا ابن سعادة الباشا ، و بنته تقول لصاحبتها انا بنت سعادة الباشا ، و سعادة الباشا يضعف قدام شيطانه و قدام متطلبات حياة ( الباشوية ) يعني الفيلا تبقى قصر و شقة اسكندرية تبقى فيلا في الساحل و العربية البيكانتو بتاعة المدام تبقى مرسيدس ، ماهو ما يصحش مرات سعادة الباشا الكبير تركب بيكانتو أو شيفروليه لانوس ، و فجأه وفي وسط العز والجاه دا كله ، سعادة الباشا يلاقي نفسه في إيده الكلابوش ، و بيتحقق معاه ، فيه اعترافات و أدلة و جايز تسجيلات صوتية ، في اللحظة دي كل شريط ( الباشويه ) بيمر قدام عنيه و يبقى على رأي الست ما قالت ( كان صرحاً من خيالٍ فهوى ) ، دي بتبقى أضعف لحظة في حياته، خصوصا لو كان قاضي أو مستشار لأن باشويته في الأساس مستمده من العدل و النزاهة و الإيد النضيفة ... دي اللحظة اللي ممكن فيها فعلا يفكر في الإنتحار .

.

الكلام ده مالوش علاقه تحديدا بالمستشار وائل شلبي الله يرحمه .. ده كلام بصفة عامة ، طاب هو وائل شلبي انتحر ؟ الأخبار بتقول أه و الفيس بوك بيقولوا أه ..طاب مين يأكد انه انتحر ؟ الفيس بوك واليوم السابع ؟ لا و عهد الله ، الطب الشرعي بتاعنا هو الوحيد اللي يقدر يحدد ويقول انتحر واللا اتقتل .

و يطلع مين الطب الشرعي بتاعنا ده يا باز أفندي ؟ الطب الشرعي بتاعنا هو اللي قال مجدي مكين اتعرض للتعذيب على ايد ظابط شرطة ، و هو اللي قال شيماء الصباغ اتقتلت على ايد ظابط شرطة ، و هو اللي قال اللي فجر الكنيسة انتحاري بحزام ناسف... يعني الطب الشرعي ده مش بيطرمخ القضايا ولا بيطبخها ، وبيفهم أكتر من خالد صلاح و محمد صلاح و ابراهيم صلاح و صفحة علمني العوم والنبي ياحمد ؟ أه و الله .

.

نيجي بقى للأسئلة السخيفة .. الأسئلة الأكتر نطاعة اللي عايشين و بنتشألب فيها بقالنا 6 سنين مع كل حادثه و كل موقف ، الأسئلة اللي دايما يرددها الخرفان و الكولجية و أحيانا يقع فيها الدولجية , هو انتحر ازاي ؟ جاب الحبل منين ؟ واللا انتحر بالكوفيه ؟ واللا يكونشي انتحر بموس ؟.. مايمكن مانتحرش و اتقتل.. طب مين اللي قتله ؟ و جاب المسدس بكام ؟! .

.

أصدقائي الأعزاء , توقفوا ولو لحظة أو يوم عن الهيافة .. اعتبروه يوم للتغيير مايجراش حاجة .. يوم بدون هيافة .. يوم خالي من الهيافة ( يعنى hayafa free day )، أسهل حاجه في الدنيا ان البني ادم ينتحر ، حكاية الإنتحار مش محتاجه فريق من الخبراء الألمان عشان يخطط لها ، الطب الشرعي هو اللي يقول انتحر واللا لا , و النيابة هي اللي تقول كان متهم بإيه أو مكانشي متهم ، و ممكن ماتقولش باعتباره توفى الله يرحمه .. و نقطة يعني فلستوب .

.

------------------------------

By: Mohamed Hussein