Mohammed Haffz
....................
الجاسوسية و العمالة ، و الأسئلة الأكتر نطاعة
=========================
.
" قتلتوا ريجيني ليه ؟ هو احنا قصّرنا معاكو في حاجة ؟ " .. جملة من أكتر الجمل نطاعة ووضاعة في أخر 6 سنين .
.
مين بقى ريجيني و مين اللي قتله و ايه حكايته ؟ ريجيني مش جندي مصري كان بيحمي أرضنا في سينا و بعدين اتقتل غدر برصاص الإرهابيين .. ريجيني شاب ايطالي جاسوس كان بيشتغل لصالح المخابرات البريطانية ، و اللي قتله هو اللي بيشغله ، مصر و ايطاليا عارفين كده ، و لوي الدراع كان لأسباب اقتصادية ولو مش مصدقني افتكر موضوع حقول غاز شرق المتوسط والصراع بين شركة بريتيش بيتلوليوم البريطانية وشركة إيني الإيطالية ..نقطة يعني فلوستوب .
.
يا عم جاسوس ازاي ؟ ده مش شكل الجواسيس اللي نعرفها و نسمع عنها.. يعني لا شوفناه لابس بالطو أسود طويل ولا ماسك جرنان مخروم ولا عنده جهاز كده شكله غريب بيقعد يتكتك عليه عشان يبعت الرساله المشفره ؟ طاب والنبي تقعد على جنب يا حماده .
.
الجاسوسية و العمالة في العصر الحديث مالهمشي أي علاقة بالشكل التقليدي جدا اللي بتشوفه في الأفلام و بتقراه في الروايات .
.
الجاسوسية و العمالة دلوقت بقى لها مراكز شيك معتمدة برعاية الشيطان الأعظم ( أمريكا و بريطانيا ) .. زي مراكز حقوق الإنسان و المراكز البحثية و منظمات اللامؤاخذه المجتمع المدني و الجرايد و القنوات يعني الإعلام ... دي أدوات العمالة الحديثة ، و التمويل بيبقى في صورة مرتبات كبيرة و مكافئات و حوافز بشكل رسمي .. يعني على عينك يا تاجر ، و ريجيني الإيطالي فيه زيه كتير مصريين .
.
طب سيبك من الايطالي و قولي ... يعني ايه تكون جاسوس أو عميل مصري لخدمة الشيطان الأعظم و انت عارف ( أو مش عارف ) ؟ يعني تشتغل في المنظمات دي و تسافر مؤتمرات و تتدرب و تقبض بالدولار ، و دورك اللي انت عارفه ( أو مش عارفه ) هو جمع معلومات و عمل تقارير ( حسب الطلب ) ، و على طريقة ( و شهد شاهدٌ من أهلها ) , و تطلع تتكلم بلسان مصري و تقول الفاشية والمشمشية و الداخليه اللي بتاكل دراع العيال الصغيرة ، وبعد ما تقول البؤين الحلوين تاخد القرشينات و كل سنة وانت طيب ، و ممكن في لحظة من اللحظات نستخدمك في تهييج الرأي العام و عمل تقارير مضروبة .
.
طب ليه مش بنحاكم اللي بيعمل كده ؟ نحاكمه بتهمة ايه حضرتك ؟ انه بيشتغل صحفي في الجارديان مثلا ؟ ( ههههههههه و نزعل صاحبة الجلالة و كده ؟ ) واللا تحاكمه بتهمة انه بيشتغل ناشط حقوقي و بيهتم بحقوق الإنسان و العصافير ؟ .. يابني اقعد على جنب ، دي أصول اللعبة ... إجرام خمس نجوم ...حاجة كده شيك لابسة بدلة و كرافتة ، وكله تحت مظلة القانون .
.
هي دي الحدوتة باختصار اللي ممكن تجاوب على 50 سؤال في ذهنك لو فهمتها .. اللعبة كلها لعبة عقل ، و حلها و القضاء عليها و مواجهتها عندي انا و انت ، عندنا احنا كمواطنين مش عند الدولة ... اننا نفهم و نستوعب و ندرك ، و نبطّل ندق عصافير على دراعنا و نعمل من شوية خونة و ( خواجات ) أبطال و رموز و أيقونات .
.
-------------------------------
By: Mohamed Hussein