للناس اللي بتسأل ازاي الدولار بينزل ، رغم انه مفيش تصدير ولا سياحة ولا انتاج ولا استثمارات شوفناها

Mohammed Haffz

‏.......................

للناس اللي بتسأل ازاي الدولار بينزل ، رغم انه مفيش تصدير ولا سياحة ولا انتاج ولا استثمارات شوفناها حصلت في الفترة اللي فاتت ومفيش اي حاجة تتسبب في النزول ده في سعر الدولار ؟!

زي ما انتوا عارفين انا مش خبير اقتصادي ولا بفهم في شئون الاقتصاد ، وعشان كده هسيبكم مع كلام الصديق الأستاذ محمد نجم Mohamed Negm الباحث الاقتصادي المعروف والمتخصص في الشأن ده ، وهو اللي هيجاوب على الأسئلة دي

الآستاذ نجم بيقول

حكاية إزاي الدولار بينزل رغم انه مفيش تصدير ولا سياحة ولا انتاج دي أغبى وأجهل واتفه جملة ممكن تسمعها كتحليل للي بيحصل

لأن اللي حصل بداية من شهر يناير مش عادي

مش بس ان الجنيه بيستعيد قوته بدرجة متسارعة وآخذة في النمو كل يوم اكتر من اليوم اللي قبله ، لكن كمان كان فيه شبه تغطية استثنائية لمستجدات اقتصادنا في الإعلام العالمي في الأسبوع اللي فات

#رويترز مثلا كتبت تقريرين عن موضوع واحد في الاقتصاد المصري في أقل من 18 ساعة

و #بلومبرج كتبت 5 تقارير في 48 ساعة عن نفس الموضوع

الموضوع ده هو مستجدات الاقتصاد المصري

بناءا على المستجدات دي هنفهم تفسير اللي بيحصل وهنفهم اشمعنى آخر 3 اسابيع بالذات حصل فيهم كده

.

أولا: الأخبار والمستجدات :

1 -ارتفاع ملحوظ في الاقبال الأجنبي على شراء أذون الخزانة المصرية

ده دليل علي ارتفاع الثقة بالاقتصاد المصري ، وده اللي أدى لانهيار الفايدة 3% مرة واحدة

و ده باختصار وببساطة معناه ارتفاع التدفقات النقدية الاجنبية للسوق المصري، فكلما ارتفع اقبال/طلب المستثمرين الاجانب كلما انخفضت الفايدة، وكلما زاد اقبال المستثمرين الاجانب على أذون الخزانة المصرية كلما ارتفعت ثقة العالم في اقتصادنا وانخفضت المخاطر

.

2 - تاني اقبال أجنبي كبير ومحل تغطية عالمية كان علي طرح السندات المصرية الدولارية في السوق الدولي بقيمة 4 مليار $

.

3 - ارتفاع الاحتياطي لـ 26.3 مليار دولار

.

4 - ثم رفع حظر السفر من الدول الاسكندنافية ، وأخبار عن قرب رفع الحظر الروسي وعودة السياحة.

.

5 - بالاضافة لتصريح البنك الأوروبي للإعمار والتنمية بانخفاض شكاوى الشركات الأجنبية في مصر من مشاكل نقص العملة مقارنة بفترة ما قبل تحرير الصرف

دى المستجدات ...

.

ثانيا : ايه اللي حصل في السوق على أرض الواقع خلّى الجنيه يرتفع قيمته أمام الدولار ؟

1 - ارتفاع تحويلات المصريين بالخارج 15% بقيمة اجمالية 3.3 مليار $ فى شهري نوفمبر وديسمبر

.

2 - ارتفاع حصيلة الدولار من تنازلات المواطنين بصورة كبيرة جدا خوفا من تكبدهم خسائر لو احتفظوا بالدولار ، ودة ارتفع بالحصيلة لـ 5.5 مليار دولار في آخر 40 يوم فقط ..اغلبها في آخر 14 يوم ، منهم 1مليار و185 مليون $ في يومين فقط ، وبمعدل يومي متوسطه 550 مليون $

.

3 - ارتفاع الصادرات 8.5% وانخفاض الاستيراد 15% في يناير

.

4 - وانخفاض مدفوعات الفيزا في الخارج بنسبة 71%

.

5 - بالاضافة الي انه زي ما قالت بلومبرج ، انه تم سداد جزء كبير من الباكلوج بالدولار

باكلوج بالدولار : يعني طلبات متراكمة بتقدمها الشركات للبنوك لتدبير دولار للشركات ، لكن البنوك موفرتهاش

الباكلوج دي بعضها بيرجع لـ 2015 طلبات في هيئة تحويل أرباح او أنشطة شرائية من الخارج

بسبب نقص العملة الصعبة ، ولكن لم يتم تدبيرها للشركات وقتها، ودلوقتي تم حل معظمها

للأسباب دى كلها ارتفع المعروض من الدولار و انخفض الطلب عليه أكتر، وبالتالي زي أي سلعة الطلب عليها بيقل والعرض بيزيد ، فسعرها بينزل

.

ثالثا : السؤال دلوقتى هل هيواصل الانخفاض و مش حيرتفع ؟

ده محتمل جدا ....."في حالة ثبات العوامل الأخرى" ، وفي حالة انه لم تحدث أي أحداث غير طبيعية أو طارئة ولا تم اتخاذ قرارات جذرية مفاجئة

او ان السوق اتحرك بشكل مختلف وزاد الطلب عن العرض عكس دلوقتي ... سلعتها هيرتفع تاني ، لكن الدولار مازال بينخفض بشكل ملحوظ جدا حتي وقت كتابة هذا البوست

.

رابعا : فقرة الاشاعات والتخاريف

1 - هل احتفالات راس السنة الصينية ليها دخل بالموضوع ؟

ده اسمه هذيان وعته منغولي Very Happy

وحتى لو سلمنا بصحة هذيانهم ، فالاحتفالات خلصت في الصين والسوق رجع لطبيعته من 3 فبراير الحالي ، يعني من 15 يوم زي ماهتشوفوا في المصادر، ومن مصادر صينية مرموقة زى تشاينا ديلي

الاستيراد مش مقفول بلاش كلام فارغ

احنا دولة ماضية اتفاقيات ومعاهدات تجارة حرة وعضو في منظمة التجارة العالمية

الاستيراد انخفض بسبب انخفاض الطلب والاستهلاك ورفع المواصفات القياسية لجودة المنتجات داخل مصر، وأي حد بيروج للقصص دي اعرف انه مستفيد أو جاهل حتي لو مستتر خلف تايتل محترم زي "خبير اقتصادي" بتوع منتدي فتكات ،لأنه عيب حد دخل مدارس يقول "الصين قافلة" ... دي مش ورشة دوكو والله Very Happy

.

2 - خبير اقتصادي مجنون تاني طلع قالك "أصل احنا خدنا قروض كتير، وده السبب في الانخفاض ولما نسددها هيرتفع !"

ايه الهذيان ده ؟!!

ايه علاقة القروض بالموضوع أصلا ؟؟

القروض الدولارية أصلا بتنضم للاحتياطي ، والاحتياطي لايستخدم اطلاقا في دعم العملة وملوش دعوة بالقصة دي

الاخ ده تقريبا عايش في عصر ما قبل تحرير سعر الصرف ، وميعرفش اننا في مصر أصبحنا سوق صرف حر ومرن لا يتدخل فيه البنك المركزي

ياريت حد يعمل للأخ ده ابديت يا جماعة والنبي ...او يصحيه من النوم

.

3 - خبير تالت صرح لمواقع الدرجة التالتة وبير السلم وقال: " أصل احنا بعنا للأجانب أذون خزانة بـ 2 مليار $ ، ودي أموال ساخنة ، ولما ياخدوها الدولار هيقفز تاني ! "

تاني انت !!! Very Happy

الأخ برضه مش مدرك انه بيتكلم عن دولة تانية.. تقريبا نيجيريا

هنعلمه اقتصاد من أول وجديد ، لأنه واضح انه ميعرفش ان حصيلة بيع أذون الخزانة تذهب للاحتياطي الدولاري، والاحتياطي قولنا انه لايستخدم أصلا في السوق لأنه سوق حر ، والمركزي لا يدعم الجنيه من 3 نوفمبر 2016 ...يعني الأذون ملهاش أي علاقة من قريب او بعيد بانخفاض الدولار

.

كل الأسباب اللي ذكرتها فوق واللي أدت لارتفاع الجنيه أو انخفاض الدولار ... دي أسباب سوقية في الجهاز المصرفي ..يعني ملهاش علاقة بالبنك المركزي ولا الاحتياطي ولا الدولة

*دا ألف باء مادة اقتصاد كلي في سنة أولى اقتصاد

.

السؤال الأهم : امتى ده هينعكس على الاسعار ؟

التضخم هينخفض الشهر الجاي أو اللي بعده بالكتير، ودى كتبتها كتير سابقا

انخفاض التضخم يعني انخفاض الأسعار ، لكن بوتيرة ابطأ واهدأ، لكن فيه سلع فعلا هتنخفض أسعارها سريعا وانخفضت فعلا زي الحديد والاسمنت والعربيات

بالنسبة للسلع الغذائية، أكثر السيناريوهات تفاؤلا ان اسعارها هتثبت ثم تنخفض بشكل طفيف ومتدرج لحد مالاقتصاد يتحرك بشكل اسرع وأقوى والنمو يرتفع بنهاية 2017

.

بشكل عام تأثير الاصلاحات علي حياتنا ومستوى معيشة الناس محتاج وقت متوسطه نهاية 2017 ، لكن اللي بيحصل حاليا مؤشر كاشف ومهم اننا ماشيين صح ومحتاجين فقط المثابرة والاستمرارية وعدم الالتفات للجهلة والخبراء الاستراتيجيين بتوع منتدى فتكات

والحمد لله على عدم تغيير وزير المالية ولا محافظ المركزي في التغييرات الأخيرة

.

-------------

المصادر

-------------

https://goo.gl/VFG8Zl

https://goo.gl/wFeLqe

https://goo.gl/zzaFPV

https://goo.gl/rXyIaX

https://goo.gl/OEb6ix

https://goo.gl/BNsEuc

https://goo.gl/NGeSfq

https://goo.gl/q49RKk

https://goo.gl/Xi7Ile

https://goo.gl/gsuqOw

https://goo.gl/MxRnj7