من قبل Mohammed Haffz.
......................
مصر و حلف الناتو
==========
امبارح أغلبنا قرا وتابع خبر صغير لكن مهم جدا .. الخبر بيقول إن مصر أصبح لها تمثيل ديبلوماسي في حلف شمال الأطلسي ( الناتو) ، وان الرئيس السيسي أصدر قرارا جمهوريا بتكوين بعثة ديبلوماسية مصرية رسمية دائمة في قيادة الحلف مع تعيين سفير مصر لدى بلجيكا، كمندوب لمصر لدى المنظمة.،، ويمكن الخبر ده مر مرور الكرام ولم يجد الزخم الإعلامي المناسب لأهميته أو تم تفسيره بشكل غير صحيح سواء من المؤيد المهتم أو من المعارض الكاره لنفسه ولوطنه .
يعني مثلا ناس كتير فهموا إن الخبر ده معناه إن مصر أصبحت عضو في حلف الناتو ، مع إن ده مش صحيح ، بل الصحيح إن مصر مش عايزه العضوية دي أصلا ولا بتسعى وراها ..بل العكس دي لو العضوية اتعرضت علينا هنرفضها ( وهنقول ليه بعد شوية)
.
بس قبل ما ندخل في الموضوع ياريت في الأول نعرف ماهو حلف الناتو وكيف ومتى تكون وماهو الهدف من انشاءه ؟
حلف الناتو هو تكتل عسكري غربي أوروأمريكي تأسس عام 1949 لمواجهة التهديد السوفيتي للغرب في مرحلة ما بعد الحرب العالمية الثانية (الحرب الباردة) ، ويسمى أيضا منظمة حلف شمال الأطلسي ، ويهدف بشكل أساسي إلى حماية حرية الدول الأعضاء من خلال مشاركة جميع دول الأعضاء بالقوى والمعدات العسكرية مما يساعد على تحقيق تنظيم عسكري لهذا الحلف ، وقد استخدمت عاصمة بلجيكا بروكسل مقرا لقيادته , وتم عمل هذا الحلف بناءا علي معاهدة شمال الأطلسي التي تم التوقيع عليها في واشنطن في 4 ابريل 1949 ، وتنص المادة الخامسة من هذه المعاهدة على أنه في حالة حدوث هجوم مسلح ضد واحدة من الدول الأعضاء ينبغي أن يكون أمن مشترك، ويجب أن يساعد الأعضاء الآخرون الأعضاء المعتدى عليهم، بالقوات المسلحة إن لزم الأمر ، وقد اعتُمدت اللغة الانجليزية والفرنسيه لغة رسمية لهذا الحلف
وتشكل حلف الناتو عند تأسيسه من اثني عشر دولة تضم الدول التالية : بلجيكا وكندا والدنمارك وفرنسا وايسلندا و إيطاليا و لوكسمبورغ وهولندا , النرويج , البرتغال , انجلترا و الولايات المتحدة الأمريكية ، ولاحقا انضم لهم دول أوربية أخرى وأصبح عددهم ثمانية وعشرون دولة عند انضمام الدول التالية : اليونان ..تر كيا .. ألمانيا .. إسبانيا .. جمهورية التشيك .. المجر .. بولندا .. بلغاريا ..إستونيا.. لاتفيا .. لتوانيا .. رومانيا .. سلوفاكيا .. سلوفينيا..ألبانيا ... كرواتيا . وقد كانت الولايات المتحدة الأمريكية هي التي تمتلك القوة العسكرية الأكبر داخل الحلف بالمقارنة مع باقي الدول الأخرى .
.
طيب نرجع لموضوعنا...يا ترى إيه حكاية وجود بعثة ديبلوماسية لمصر في حلف الناتو دي ؟ وإيه أهميتها ومميزاتها ؟
أولا: التمثيل الديبلوماسي ده معناه اعتراف صريح من الحلف والأعضاءه بأن مصر أصبحت قوة إقليمية ومش مجرد دولة عادية في الأسرة الدولية وهو ما يعني انه يجب التنسيق مع مصر مستقبلا في أي ملفات تخص المنطقة ، مش بس بشكل منفرد بين كل دولة من دول الحلف منفردة ، لكن أيضا بشكل مؤسسي جماعي مع الحلف ككيان عسكري وسياسي دولي ( ومش هنقول ان الخبر ده هو اعتراف دولي جديد بشرعية نظام 30 يونية لأن دي مرحلة مرت وتم تجاوزها من زمان .. ومعادش من المقبول اننا نتكلم فيها ونتسول شرعية استقرت خلاص وأعترف بيها العدو قبل الصديق )
.
ثانيا: بوجود بعثة ديبلوماسية مصرية داخل الناتو ، فاحنا بكده بقينا ضامنين إن لينا عين وأذن بشكل مستمر ورسمي داخل مطبخ صنع القرار في المنظومة الغربية ونقدر نعرف خبايا وكواليس أي قرار يصدرها الحلف ده وهو لسه في مرحلة الصنع ، فنقدر نوافق عليه او نعمل على إيقافه لو كان القرار ده مش في مصلحتنا مثلا ، يعني احنا بالبلدي كده بقينا راميين ودننا عندهم
.
ثالثا: التمثيل الديبلوماسي المصري ده مش بس بيخلينا على علم بأي قرار ممكن يمس أمن مصر القومي ، دا كمان بيخلينا راصدين ومطلعين وبشكل دائم لأي محاولة للإضرار بأمن أي دولة من دول المنطقة ، وايضا بيحولنا لقناة اتصال بين دول المنطقة وبين دول هذا الحلف العسكري والسياسي الغربي ، بمعنى إن أي دولة عربية عايزه تخاطب الناتو ككيان ، فأسهل طريقة بالنسبة لها انها تمرر إتصالها عن طريق مصر
.
طيب احنا ليه قولنا في بداية الموضوع إن عضوية مصر الكاملة في حلف الناتو هو شئ مش مطلوب ولا مرغوب ولا مصر بتسعى وراه أصلا ؟
تعالوا نشوف مع بعض إيه تبعات عضوية مصر في الحلف ده يمكن نقدر نعرف الإجابة :
• حلف الناتو ده أصلا مؤسسة عسكرية ذات صبغة سياسية ، والدول الأعضاء فيه المفروض بيعملوا معا لتنفيذ استراتيجية عسكرية واحدة وطبعا مش محتاج اوضح لكو إن الاستراتيجية الغربية دي في الغالب بتكون متعارضة مع المصالح والاستراتيجية المصرية ، فلو كانت مصر عضو في الحلف ده ، فــ هتكون بالطبيعة ملزمة بتنفيذ ما يتفق عليه بقية الأعضاء ..يعني العضوية دي هتكون مقيدة لاستقلال القرار المصري ، وده شئ غير مقبول خصوصا في ملفات حساسة وخطيرة بالشكل ده .
• العضوية في الحلف ده بيكون من متطلباتها إن الدولة العضو لازم تدفع مبلغ سنوي ضخم للحلف كاشتراك في هذا الكيان ، واحنا مش ناقصين بصراحة
• عضوية مصر في الحلف معناها ان مصر هتكون ملزمة بفتح مجالها الجوي والبري لأي عملية عسكرية للناتو ، حتى لو كانت العملية دي موجهة ضد إحدى الدول العربية مثلا ، ودا شئ لايمكن إن مصر توافق عليه او تسمح بيه.
• حاجة كمان مهمة جدا.. عضوية مصر في الحلف ده هيتطلب انها لازم توافق على انشاء قواعد عسكرية للحلف على أراضيها ، وطبعا كلنا عارفين إن موضوع القواعد العسكرية الأجنبية ده خط أحمر في السياسة المصرية من زمان سواء على المستوى الحكومي الرسمي أو على مستوى الوعي الجمعي الشعبي ( ما هو احنا مش زي بعضهم اللي بيأجر بلده مفروش لأي حد يدفع وفي الآخرعامل نفسه حامي حمى الاسلام )
.
إذن فالخلاصة اننا قدرنا نوصل للمنظومة الغربية ونعشش جواها ، بس بطريقة لا تلزمنا بأي التزامات تنتقص من سيادتنا ولا من استقلاليتنا ولا تمس أمننا القومي مطلقا..يعني أخدنا الميزات وتركنا التبعات والمسئوليات .
انا حاولت أشرح أهمية الموضوع الموضوع ده بتفاصيله وتداعياته على قدر معلوماتي المتواضعة ، ويارب أكون قدرت أوضح الصورة ..
شكرا للجميع #القطب_الثالث
#مصر_تنتصر
#القاهرة_تبسط_جناحيها
#على_الطريق_نحو_الهدف_المنشود