حـــــرب الـعــصـــابــــــــــات ومايحدث فى سيناء حتى تكون على بينة.

‏ من قبل ‏‎Mohammed Haffz‎‏.

***********

حـــــرب الـعــصـــابــــــــــات

================

علشان تعرف الموضوع في سيناء صعب ازاي.. و تهدا و تسيبه للمحترفين..

التقنيات اللي حقولهالك دي من تقنيات "حروب العصابات Guerrilla warfare" اللي اتعملت في فيتنام و هزمت الجيش الأمريكي بجلالة قدره .. هزيمة دفعته لاستخدام السلاح الكيماوي..

فيتنام بتعاني من الكيماوي الأمريكي لحد النهاردة، بالذات "العامل البرتقالي Agent Orange".. و دا كان مبيد حشري و مزيل أعشاب.. رشوا بيه الفيتناميين.. و خلفوا وراهم نص مليون قتيل.. بالإضافة إلى 600 ألف طفل اتولدوا مشوهين.. مع فارق طبعا إن في فيتنام رجال حرب العصابات مكانوش إرهابيين زي حالتنا.. كانوا "مقاومة مشروعة " ضد محتل "أجنبي"...

حرب العصابات بتعتمد على جماعات صغيرة بتواجه وحدات عسكرية أكبر و أقوى.. بالتالي هم بيهربوا من المواجهة المباشرة إلا نادرا.. و بيعتمدوا على الهجمات الخاطفة اللي بتستنزف وتنهك القوة الكبيرة اللي هو مش قدها...

الأول خصمك في حرب العصابات بـ"يبدو" مدني.. شخص عادي.. بدوي.. فلاح.. مواطن عادي.. و هو في الحقيقة مقاتل.. دا بيختلف عن الجيش اللي بتواجهه في الحروب العادية و بيبقي له زي معين و لابس في رقبته سلسلة عليها اسمه..

خصمك بيستغل الطبيعة اللي حواليه.. يعني بيستخبى وسط الغيطان ..جوه الكهوف.. بيستغل النباتات و الأشجار..

في حروب العصابات النهاردة.. الأشجار و أعمدة الإنارة بيتزرع عليها كاميرات صغيرة.. بتراقب له الطريق و الجيش اللي بيحاربه..

اللي بيركب الكاميرات دي بالمناسبة ممكن يبقى عامل في شركة الكهربا أو من عمال الصيانة العاديين.. دي من خصائص حرب العصابات الحديثة.. أنت بتحارب شخص "يبدو" عادي من أبناء المكان..

بتبقي قاعد في كمين و تعدي عليك عربية محملة بلاليص عسل - بطيخ - شمام - يقطين.. الفواكه و الخضروات الضخمة دي بتتفرغ و تتحشي ذخائر و متفجرات.. و بتعدي من غير ما تشوفها أو تنفجر و انت بتفحصها .

الكلاب اللي بيربيها البدو.. بيدربوها على الحفر و دفن المتفجرات مبيبقاش هو فاضل غير انه يبعت الإشارة للمفجر بالموبايل .

الجِمال.. بيخدروها نص تخدير عن طريق أنهم بيخلوها تدخن مخدرات معينة.. و يبلعوها قسرا أنابيب معدنية محكمة شايلة مخدرات/ سي فور.. أو غيره.. لما يفوق الجمل من المخدر.. بيركبه المهرب و يعدي بيه من الكمين عادي جدا.. و لما يوصل لهدفه بيدبح الجمل.. ياكله هو و العصابة.. و يطلع الكنز من أحشائه.

الكاتبة المرحومة "جاذبية صدقي" كتبت زمان عن الطريقة دي و هي بتتكلم عن مهربي المخدرات في الصحراء.. بالطريقة دي برضه الإرهابي بينقل شرايح الموبايل و المراسلات اللي مش عايز يبعتها إليكترونية...

الستات.. الستات في البادية بيكون ليهم زي معين.. و تحته بيكون في متفجرات.. تفتيش الست البدوية صعب جدا.. و بيعمل أزمة دايما.. و إرهابي لابس ست و مندس وسط مجموعة ستات.. برضاهن أو بعد تهديدهن..بيعمل أزمة...

أبراج الحمام بتتعمل مخازن للسلاح و الذخيرة.. عشان كده دايما تشك لما أبراج الحمام تزيد في الأماكن اللي فيها حرب عصابات..

الصلبان الكبيرة للكنائس و أهلة قباب مآذن المساجد ، كتير قوي بيتحط جواها أسلحة.. التوابيت زيها.. في فيلم "كلمة وطن" اللي عملته المخابرات بعد "مجيدة" الموضوع دا كان واضح جدا..

ساعات كتيرالأولاد في البادية من أب واحد بيتسموا اسم واحد.. يعني تلاقي الأب مخلف 8 عيال مسميهم "فتح الله".. ومفيش حد فيهم له ورق و لا شهادة ميلاد غير واحد منهم بس ، والباقي بدون أي ورق يثبت وجودهم ..

بكده الولاد ميدخلوش الجيش.. و يبقى رسميا عنده ابن واحد وياخد اعفاء لأنه وحيد..

العيال دي لما تكبر بتبقي وقود ممتاز في حروب العصابات.. و لما بتقبض عليه بيبقى عندك كائن مجهول الهوية.. و لو قتلته مابتعرفش دي جثة مين.. شخص مالوش وجود و لا له بيانات و لا نازل في قاعدة الحمض النووي بتاعك..

.

جذوع الشجر بتتفرغ و تبقى مخزن سلاح.. المتفجرات بتتشال في أوعية و تتدفن في الأرض.. و بيتحط فوقها طبقة سماد بلدي سميكة.. ريحة السماد دي بتعطل حاسة الشم عند الكلاب البوليسية و متخليهمش يوصلوا للمتفجر..

.

دايما اللي بيمارس التمويه دا تلاقيه دايما بيطرد القطط أو يقتلها و يتخلص منها و حريص جدا إنها ما تقربش.. لأن القطط بتبنش التربة ...

.

أجهزة كشف المتفجرات.. اللي بتكشف العبوات من مدى بعيد بدقة معقولة.. ممنوعة من التصدير لنا.. محظور علينا اننا نستوردها من دول كتير .. و براءات اختراعها المنشورة متلاقيش فيها معادلة واحدة.. وبتبقي عايزة بحث طويل جدا و مرهق.. دا يخلي فرصة إنك تعمل زيها في غاية الصعوبة...

طبعا الحظر دا معروف سببه و هدفه..

بيستعمل السموم.. عشان كده بتلاقي فيهم خريجي وطلبة علوم.. زي الحلوف اللي فجر الكنيسة البطرسية.. بيغمر لك متفجر بسيط بالسم.. و يثبته و حواليه مسامير عشان الخبير اللي بيفككه يموت لو اتجرح.. و لو ينفجر تبقى الشظايا قاتلة.. حتى لو التفجير مقتلش حد.. خدش واحد كفاية انه يقتلك لاحقاً..

الإرهابي بيستعمل القناصة و يضرب عن بعد.. في الأماكن اللي فيها حرب عصابات بيبقي كويس إن الدولة اللي بتحارب تعمل نوافذ ثكناتها الأمنية زي الأقسام.. بزجاج عاكس زي المرايا.. إنعكاس أشعة الشمس في عدسة البندقية بيعطل عمل القناص..

ضوء السيجارة بتاعتك بالليل في الصحراء.. بيشوفه القناص من غير منظار و لا عدسة من مسافة كيلومترات...

الإرهابي في حرب العصابات دايما بيستتر ورا المدني.. لو عايز تصطاده لازم تاخد معاه مدني أو 2 مالهمش ذنب.. عشان كده الجيش اللي بيحاربه كتير بيضطر يعمل نزح للمدنيين..

المكتوب دا كله كلام أولي ساذج قديم.. من أيام حرب فيتنام.. و اتكتب عنه كتير..لكن التقنيات الجديدة ما نعرفش حاجة عنها .. ولا نعرف وصلت لحد فين...

كل دا تحت غطاء إعلامي معادي قذر "إلحق الجيش المصري فتش واحدة ست".. "إلحق نسفوا عربية بطيخ".. إلخ...

الحرب دي طويلة و مُنهكة لأي جيش منظم.. ووقّعت جيوش قوية بالفعل تاريخيا.. و حديثا.. حوالينا..

بس موقعتناش..

برغم كل دا عارفين نتصرف و نتعامل..

إعرف بقى نبذة عن اللي بيحصل و سيبه للمحترفين.. عشان إحنا مش قده و لا قد التنظير حوله..

و أصبر.. حاننتصر..

هانت..

.

---------------------------

By: Alaa Hammouda

حـــــرب الـعــصـــابــــــــــات ومايحدث فى سيناء حتى تكون على بينة. 17457754_1846309568950286_3914601258474114433_n

حـــــرب الـعــصـــابــــــــــات ومايحدث فى سيناء حتى تكون على بينة. 17554122_1846309422283634_6284266002897034963_n

حـــــرب الـعــصـــابــــــــــات ومايحدث فى سيناء حتى تكون على بينة. 17553415_1846309505616959_4768796298485223132_n

حـــــرب الـعــصـــابــــــــــات ومايحدث فى سيناء حتى تكون على بينة. 17499550_1846309792283597_1051350584549555416_n