النهارده 8 أبريل ذكرى مذبحة بحر البقر ذكرهم ونكد عليهم
Hassan Margawy
***********
لاتنسوا مدبحة بحر البقر
همه همه فى كل وقت وكل اذان
همه همه نفس الأشكال اللى بيقتلوا ويلزقوها فى اللى عاوزينه.
همه همه اللى سيحوا دم الأطفال من زمان ولاحد شاف ولاحد درى.
فى أدلب وشيخون عملوها وقتلوا الأطفال بدم بارد ولزقوا التهمة للأسد ونظامه عشان يصفوا الحسابات ويخلصوا منه .
القانون لهم مطاع ووراهم زفة كدابة وبروباجندا مهوله بتصفق لهم وتحيهم وتحط على إيديهم وكمان فى اللى بيسدد لهم فاتورة ذبح الأطفال.
لازم تفكرهم وتنكد عليهم ب:مدبحة بحر البقر
مجزرة بحر البقر غاره جويه عملها الطيران الاسرائيلى فى 8 ابريل 1970 , فى وقت حرب الاستنزاف , لما ضربت مدرسة بحر البقر فى قرية بحر البقر اللى فى مركز الحسينيه فى محافظة الشرقيه فى مصر. اسرائيل قالت ان الهدف كان ضرب مطار او قاعده عسكريه فى الدلتا حيث ان القياده المصريه كانت بتخفى القواعد و المطارات العسكريه فى المناطق الريفيه جنب القرى. الغاره حصلت فى الساعة 9:20 يوم الاربع الصبح لما ضربت طياره فانتوم اسرائليه المدرسه اللى كان حاضر فيها حوالى 150 طفل , اللى عباره دور واحد متكونه من تلت فصول, بالصواريخ و سوتها ع الارض و قتلت 46 و اصابت حوالى 50 طفل مصرى.
المدبحه دى كانت بشعه جدا و لزقت فى دماغ المصريين, صلاح جاهين كتب قصيدة "الدرس انتهى لموا الكراريس" و سجل فيها المدبحه دى و لحن الاغنيه سيد مكاوى و غانتها شاديه
(الدرس انتهى لموا الكراريس
بالدم اللى على ورقهم سال
فى قصر الأمم المتحدة
مسابقة لرسوم الاطفال
ايه رايك فى البقع الحمرا
يا ضمير العالم يا عزيزى
دى لطفلة مصرية سمرا
كانت من اشطر تلاميذى
دمها راسم زهرة
راسم راية ثورة
راسم وجه مؤامرة
راسم خلق جبارة
راسم نار
راسم عار
ع الصهيونية والاستعمار
والدنيا اللى عليهم صابرة
وساكتة على فعل الاباليس
الدرس انتهى
لموا الكراريس
ايه رأى رجال الفكر الحر
فى الفكرة دى المنقوشة بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بالف جناح
فى دنيا مليانة بالاشباح
لكنها قلبها مرتاح
وساكتة على فعل الاباليس
انتهى الدرس
لموا الكراريس
ايه رايك ياشعب ياعربى
ايه رايك يا شعب الاحرار
دم الاطفال جايلك يحبى
يقول انتقموا من الاشرار
ويسيل ع الاوراق
يتهجى الاسماء
ويطالب الاباء
بالثأر للابناء
ويرسم سيف
يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الاباليس
الدرس انتهى
لموا الكراريس)
أسأل العالم أبو وشين أنتم عملتم إيه لما إسرائيل قتلت الأطفال.؟
أسأل العالم أبو مكيالين عملتم إيه لما قتلت اطفالنا؟
أسأل أمريكا وجيرانها أسأل بريطانيا وازنابها أسأل اللى عاش وشاف عملوا فينا إيه؟
أجتمعت المم المتحدة وطلعت بيان أدانت فيه الأطفال اللى فى عمر الزهور ليه؟
عشان مارفعوش الراية البيضا لما جت الفانتوم وحلقت فوق مدرستهم لما كانت بترمى عليهم الشيوكلاته والبنابونى.
طيب أسأل عن قيادتنا من يومها لتاريخ اليوم هل طالبتم بحق أطفالنا اللى راحوا هدر؟
هل كشفتم للعالم قبح الوجه الأمريكى المتغطى بغطاء صهيونى؟
هل أحتفلتم بذكرى المذبحة وجعلتم منها نبراس يضيئ للدنيا ويكشف عن الظلم والجبروت والخسة والنذالة؟
هل جعلتم من مبنى المدرسة مزار لكل الأجيال لترى كيف فعل بنا وبأولادنا؟
لو قتل طفل فى إسرائيل لقامت بسببه الحرب فقد تبدلت الأحوال واصبح واااااا معتصماه إسرائيلى فقد تبرأنا منه فصرنا عبيد للبشرية.
دمتم شهداء اطفال مصر الأبرياء فى جنة الخلد تحبرون لن ننسى ذكراكم الطيبة وقد كنا معكم فى نفس أعماركم أو يزيد قليلا عندما قتلتم بدم بارد إلى أن نلقاكم ونرى أخذ حقكم على الصراط من لدن رب العالمين
موضوع: النهارده 8 أبريل ذكرى مذبحة بحر البقر ذكرهم ونكد عليهم 
السبت أبريل 08, 2017 6:07 am
