Mohammed Haffz
فيه "ناس" و "إعلاميين" بتقولك: "هو كل اللي كنا فيه دا مكانش طواريء ؟"..
لا يا حبيبي.. اللي فات دا كله دا كان "طبطبة"..
إن حضرتك تطلع على الشاشة و تروج لإشاعات.. و إنك تطلع تقول لي "داعش احتلت العريش ووصلت السويس".. و إنك تطلع تروج لفيروسات مش موجودة.. و تشيع إننا بنستعمل السرنجات الطبية مرتين.. و تفضل قاعد في بيتك و محدش يكلمك.. دي مش طواريء... دي زغزغه
إنك تقعد على الإنترنت ليل نهار.. مسخر وقتك و طاقتك و فلوسك عشان تسمم حياة الناس و تروج لإشاعات مالهاش أول و لا آخر و تقول على الإرهابي "مختفي قسريا".. و تقولي "أصلهم جابوه من بيته رموا جثته في الكنيسة".. و "اصل المخابرات اللي عملتها"..
وإنك تروح تتظاهر قدام السفارات وتقولهم "ماتجوش مصر".. و تعملي هاشتاجات تضرب السياحة و الأمن القومي.. و بعدين تقولي "عندنا تكميم أفواه".. و في الآخر تروح تنزل تتعلم على حسابي.. و تاكل عيش مدعم على حسابي.. و تركب مواصلات على حسابي.. و تستعمل طرق معمولة من ضرايبي.. و تبات في بيتك.. دي اسمها "كنافة".. مش طواريء...
إن طفلة بريئة تموت.. عشان حضرتك عامللي ظهير إعلامي للإرهاب و بتدافع عنه و تسنده معنوياً.. و مسمي لي الجيوش الوطنية "ميليشيات فلان".. و مسمي لي الإرهابي "ثائر" و "وطني" و "جيش".. وفي الآخر محدش يكلمك عشان أنت إعلامي و اللا "أصل دا طالب و لسه صغنن".. دي مش طواريء يا حبيبي ...
حرامية الأسعار و تجار العملة.. المولد اتفض...
الطواريء معناها لما تيجي تكتب كلمة.. توزنها بالحرف.. عشان هتدفع تمنها..
لما تفكر تكسر كوباية.. تعرف إنك هتدفع تمنها غالي.. أوي...
تمنها هيزعلك...
على فكرة قصص "ثورة و إنقلاب" و "مرسي اتظلم" و الشرعية" دي عدا عليها أربع سنين.. يعني 1500 يوم.. و أنت لسه عايش فيها.. خلصنا بقى و اللا لسه ؟
قصص بقى "سرقوا الثورة والبوب رمز الصمود و الميدان و محمد محمود اللي باعوكوا فيه و الفصيل الوطني و العسكر و القمع و أبو اسماعيل".. كل دي عليها 7 سنين.. فخلاص بقي.. تجاوزها و حاول تعيش كبني آدم... وبلاش تفضل مجرد زومبي هائم في التيه الثوري
خلاص عدينا المراحل دي.. عايز تعيش في الماضي عيش في الخيال مع نفسك.. لا تطلع لنا في إعلام و لا نسمع لك صوت..
إنما تقعد أنت تهبل.. و تترحم على الإرهابي.. و تعمله صاحب قضية.. و تعمل له مظلومية و تقولي أصله مقموع.. و تخلق له مبررات.. عشان أطفال تموت؟؟؟
لا يا حبيبي مبقاش ينفع...
كان فيه وخلص
عندي رجاء أخير بس..
اتوضوا و أحسنوا الوضوء.. و صلوا ركعتين خالصتين لوجه الله تعالى.. و ادعوا ان الطواريء تكمم أفواهكم فعلا.. و تلم الإعلام فعلا ..و تخليه وطني عنده ضمير فعلا.. و توقف الإرهاب فعلا...
قدامنا 3 شهور.. إدعوا بس يارب دا يتحقق خلال الـ 3 شهور دول..
عشان لو ده محصلش هننزل لكم احنا..
هتبقي 30 يونيو جديدة ماشفتوهاش في أبشع كوابيسكم...
و ده مش تهديد
ده وعد
.
-----------------------------
By: Alaa Hammouda