حوار مع خابور غواويص استراتيجي 
=====================
مساء الخير سيداتي وسادتي.. والآن موعدنا مع السيد "شحيبر المفش" ، الخابور ، قصدي الخبير الاستراتيجي المعروف ، والذي يشرفنا باللقاء اليوم ليدلي بجردله في قضية العصر وهي شراء مصر لغواصة جديدة ..
_ في البداية نحب ان حضرتك تقدم نفسك للسادة المشاهدين
& انا البروفيسور الدكتور مهندس شحيبر المفش .. خبير استراتيجي واقتصادي ومحلل سياسي واقتصادي وخبير إكتواري وحاصل على دكتوراه طب أعماق من جامعة كومينشن لعلوم المياه الموزمبيقية
_ طيب يا دكتور.. ويا ترى حضرتك رأيك إيه في الغواصة الجديدة ، وما هو تقييمك لها فنيا من موقعك كخابور ، قصدي كخبير كبير ؟
& شوف يا اكسلانص ؟ ، الغواصة الألمانية طراز( تايب 1400/209) اللي مصر اشترتها طلعت خازوووق
_ ليه يا مون بيه ؟
& يا اكسلانص الغواصة دى المفروض الرفاس بتاعها يكون عمودى مش رأسى .. وإلا هاتطلع لفوق ازاي ؟؟
_ طيب يا مون بيه ايه الفرق بين العمودى والرأسى ؟
& يا اكسلانص دى حاجة مايفهمش فيها إلا خبراء الغواصات اللي زييي .. عارف يا اكسلانص .. الغواصة دى ممكن تغرق .. لأن مفيهاش منطاد
_ منطاد يا مون بيه ؟؟
& شوووور يا اكسيلانص .. هانفترض الغواصة غرقت .. مش لازم يكون فيه منطاد يتنفخ ويركب فيها البحارة ويطير بيهم ؟
_ تصدق عندك حق يا مون بيه .. فعلا احنا خدنا خازوق في الغواصة دي
& لا وخد الكبيرة بقى يا اكسلانص .. النوع ده من الغواصات الموتور بتاعها بيسخن وبتجيب زيت من عند الديفرانس .
_ ويطلع ايه الديفرانس ده يا مون بيه ؟
& ههههه معلش انا عارف انك حمار مبتفهمش .. الديفرانس ده يا اكسيلانص هو مجموعة الدفه الى بتوجه الغواصة .. لو بيجيب زيت بيقفش والغواصة تمشى فى اتجاه واحد بس والزعانف بتاعتها بتنطر من عند الرداخ .. مش هاقدر اشرح لك الرداخ دي لأنها صعبة عليك
_ حضرتك واضح انك ضليع في الغواصات يا مون بيه
& أوماااااااااااااااال ..دا انا دارس جوه وبره .. طب عارف يا اكسيلانص انا على علاقه شخصية بمخترع الغواصة دى ... اسمه جوتنبرج هستنكشتاين .. والراجل كان زي الفل وبيخترع في أمان الله .. بس لما اكتشف العيوب اللي في الغواصه .. راح عمل حج وعمره .. وسمى نفسه الحج تايب عبد الغفور هستنكشتاين ، وبطل اختراعات من يومها .. ومن هنا بقى جت تسميتها ( تايب) وترتيبها الـ 209 عالعالم يععنى مضروبة .. خد بقى الكبيره دى كمان .. دى يا عمنا صناعة سنة 1400 هجرية .. يعني قديمة يا اكسلانص .. هتلاقى كل ده مكتوب مع الطراز عشان تصدقني
_دا طلع إن الأجانب .. لما بيغلطوا بيتوبوا .. وانت يا ابن المهشتكة مش عاوز تتوب وشغال علينا نخع كل ما ييجى سلاح جديد ؟؟ .. الأجانب تابت وانت مش عاوز تتوب ؟؟ ناولنى قفاك ياض .
& اهدى يا اكسيلانص .. ميصحش كده
_ اكسيلانص إيه يا جربان يابن الشحات ؟؟ .. نزّل رجلك ياض وقول لى انت بتشتغل ايه بالظبط
& حضرتك انا دبلوم معهد الترزيه ، بس خد بالك نظام 5 سنين مش 3 سنين ، تخصص ايشاربات حريمى
& قووووووووم ياض يا ابن الكلب يا واطى يلعن ابو اللى جابو ابو ابو ابو ابوووك
قال تخصص ايشاربات قال .. دا تلاقيك تخصص ألبسه
بس يا بابا .
--------------------
للجنرال ربيع الحسينى
موضوع: حوار مع خابور غواويص استراتيجي :D 
الخميس أبريل 20, 2017 12:01 pm
