Mohammed Haffz.
*************
من ملفات المخابرات العامة المصرية ... جاسوس الغواصات
=================================
بمناسبة تسلم مصر لأحدث قطعها البحرية الضخمة وهي الغواصة تايب 209 / 1400 mod ، ننشر اليوم واحدة من أحدث وأخطر قضايا التجسس من سجلات المخابرات العامة والموساد الإسرائيلى، والمتهم فيها رمزي محمد أحمد الشبينى 47 سنة ؛ موظف بشركة عبودة العشماوي للأجهزة الكهربائية وشهرته "عبد الله أبو الفتوح" ومقيم بقرية البتانون مركز شبين الكوم محافظة المنوفية .... و"سحر إبراهيم محمد سلامة" وتعمل صحفية بأخبار المنوفية سابقا، سكرتيرة بمكتب محام حاليا ومقيمة بمركز شبين الكوم ، وصموئيل بن زائيف، إسرائيلى الجنسية ، ودافيد وايزمان، إسرائيلى الجنسية الضابطين بجهاز الموساد الإسرائيلي
.
حالة من الذهول انتابت أهالي قرية البتانون بمركز شبين الكوم، التابعة لمحافظة المنوفية، بعد سماع خبر اتهام أحد أبناء القرية ويدعى، رمزي محمد أحمد الشبيني، وشهرته "عبد الله أبو الفتوح الشبيني، 48 سنة، بالتورط في قضية تخابر مع دولة إسرائيل برفقة متهمة ثانية كان يحبها وتجمعهما علاقة ويريد الزوج منها، قبل أن يجندها لجمع معلومات لصالح الموساد.
.
البداية كانت في شهر مارس عام 2007 حين تقدم المدعو رمزي الشبيني للزواج من المتهمة الثانية سحر إبراهيم محمد إلا أنها رفضت لظروفه المادية المتعثرة، الأمر الذى دفعه إلى السفر للخارج بحثاً عن فرصة عمل مناسبة، حيث توجه فى غضون شهر يوليو عام 2007 إلى مدينة بريشيا الإيطالية، وعمل بها قرابة عام بمصنع بى تشى لصناعة السفن والمراكب ، تواصل أثنائها مع الجاسوسة سحر حتى تم طرده وجميع العمالة المصرية، فعاد مجدداً إلى البلاد دون تغيير ملحوظ فى حالته المادية، الأمر الذى حدا بسحر لحثه على السفر مجدداً لدولة إيطاليا والبحث عن عنوان السفارة الإسرائيلية والتواصل مع المسؤولين بها، بحثاً عن فرصة عمل طرفهم وهو ما لاقى قبولاً لديه، ونفاذاً لذلك وفى غضون شهر يناير عام ٢٠٠٩ عاد مجدداً لدولة إيطاليا وتمكن من الحصول على رقمي الهاتف والفاكس الخاصين بالقنصلية الإسرائيلية بمدينة ميلانو، حيث أجرى اتصالاً هاتفياً بها وأبلغ محدثه بأنه مصرى الجنسية ويرغب فى العمل بالقنصلية الإسرائيلية، الأمر الذى دفع محدثه إلى نهره محذراً إياه من معاودة الاتصال.
.
و فى اليوم التالي عاود رمزي الاتصال مجدداً بالقنصلية الإسرائيلية وأبلغ محدثه بأنه مصري الجنسية ويبحث عن فرصة عمل داخل إسرائيل، وأن لديه العديد من المعلومات المهمة عن الشأن المصرى، وإزاء ذلك أوصله محدثه بشخص يدعي " داوود" والذي لم يكن في الحقيقة سوى ضابط الموساد صموئيل بن زائيف، حيث دار بينه وبين الأخير حوار باللهجة المصرية أبلغه خلاله بأنه سوف يتواصل معه لاحقاً.
وبعد مرور قرابة ثلاثة أشهر دون اتصال من صموئيل قام رمزي بإرسال فاكس إلى القنصلية الإسرائيلية بميلانو، موضحاً به تفصيلات اتصالاته السابقة وبياناته الشخصية ورغبته فى التعاون مع الجانب الإسرائيلى، طالباً بيان الموقف النهائى بشأنه، وعقب ذلك تلقى اتصالاً هاتفياً من الضابط صموئيل الذي طلب لقاءه بمدينة فيينا - بدولة النمسا - وحدد له الأخير ميعاد السفر والعودة وأنهى له إجراءات إقامته بفندق جراند أوتيل بوساى.
و عقب وصول رمزي إلى النمسا ، توجه من فوره إلى الفندق المشار إليه ، و في نفس الليلة تلقى اتصالاً هاتفياً من صموئيل الذي طلب منه التوجه إلى مقر السفارة الإسرائيلية بمدينة فيينا، حيث التقيا بها ودار بينهما حوار شرح فيه رمزي لضابط الموساد بياناته الشخصية وتفاصيل ظروفه المعيشية والعائلية، كما أدلى له بمعلومات تفصيلية عن فترة خدمته العسكرية كمجند بالقوات المسلحة بالفرقة 21 مدرع بمنطقة سيدي براني بمرسى مطروح وكافة الأسلحة التي تدرب عليها وأسماء قياداته من ضباط القوات المسلحة ، وأبدى رمزي حبه لإسرائيل ورغبته فى التعاون مع المخابرات الإسرائيلية ، وفى ختام اللقاء قدم له صموئيل مبلغ ألف وتسعمائة يورو مقابل نفقات سفره وإقامته ومكافأة له، واتفقا على معاودة اللقاء مرة أخرى لبحث أساليب وطرق العمل بينهما.
.
بعد تلك المقابلة ، عاد رمزي مجددا إلى مصر وقابل سحر وحكى لها تفاصيل رحلته كلها حتى لقاؤه مع الضابط الاسرائيلي في فيينا.. فشجعته على ذلك ، بل وطلبت منه هي الأخرى الاتصال بذلك الضابط ، وبالفعل كان لها ما أرادت.
سافرت سحر إلى النمسا منفردة ، وقابلت ضابط الموساد وكان ذلك فى أكتوبر 2011 حيث طلب الضابط منها إعداد تقريرعما يحدث فى الشارع المصري مستغلا عملها كصحفية
وبعد عودة سحر ، قامت بكتابة تقارير معلوماتية حول احتفالات القوات المسلحة بتخريج طلبة الكليات والمعاهد العسكرية وأحداث ثورة 25 يناير 2011 وشعبية تيار الإخوان والسلفيين بالشارع المصري ، والمخزون الاستراتيجى للسلع الأساسية خلال تلك الأحداث، وقد تقاضت نظير ذلك مبلغ 2500 يورو وهاتفين محمولين ماركة سامسونج بخلاف بعض الهدايا العينية تشمل ملابس وأحذية ومستحضرات تجميل وزجاجات عطور.
ثم توالت اتصالات سحر بالموساد وتوالت معها تقاريرها التجسسية ، حيث تلقت تكليفات برصد المشروعات التى يمتلكها الجيش المصري من أندية، وفنادق، ومصانع حربية، ومشاريع صناعية وزراعية، وكذلك إجراءات التجنيد داخل الجيش المصرى، وكتبت المتهمة تلك التقارير على جهاز لاب توب مشفر كانت المخابرات الإسرائيلية قد أرسلته لها عن طريق رمزي ، وكانت المتهمة تتسلم مبلغ 500 يورو عن كل تقرير ترسله.
.
وكان من أخطر التقارير التى أعدتها المتهمة عندما كتبت لاسرائيل أن مصر فى طريقها لشراء 4 غواصات دولفين ألمانية الصنع، بالإضافة إلى التوقيع على عقد بين مصر وروسيا على اتفاقية بتطوير 35 دبابة مصرية، بالإضافة إلى تقرير آخر عن طبيعة المناورات العسكرية للجيش المصرى، وتقارير أخرى عن تشكيل المجلس العسكرى وقت الثورة
واختتمت سحر التقرير بأن قالت انها تحتاج لزيادة الفلوس ، ومحتاجة سيارة خاصة بها وإلا مش هتشتغل تانى ، كما قالت إن الشارع المصرى مش إخوان وسلفيين بس دا فيه «صوفيين» وشيعة وفيه حركة 6 إبريل وحركة كفاية والحركات دى بتضم الشباب الصغيرين وكمان فيه الدكتور محمد البرادعى وإن الدكتور أيمن سبق قبل كدا ونزل انتخابات الرئاسة أمام مبارك وأخد أصوات كتير وكتبت رقم موبايل أيمن نور
يقول رمزي في إعترافاته من واقع محاضر التحقيقات: انه بعد الإجازة ما خلصت أخدت من سحر اللاب توب والفلاشة اللى أنا استلمتهم من داود، زى ما اتفقنا إن سحر هتعمل تمثيلية عليه ونقول إن دا آخر شغل معاه ونديله اللاب توب علشان يزود الفلوس، والكلام دا كان فى أغسطس 2011، وداود اتصل بيا فى اليوم اللى وصلت فيه وقالى هنتقابل فى أمستردام فى هولندا لمدة 3 أيام وإنه حجز لى فى فندق ولما روحت إلى الفندق وكلمنى على تليفون الغرفة ونزلت قابلته واديته الفلاشة وقولتلوا أن إحنا مش هنكمل شغل معاك تانى لأن الفلوس قليلة وطلعت الشنطة اللى فيها اللاب توب واديتهوله وفى اللحظة دى أول مرة أشوف داود غضبان ، وقالى: «أنت مجنون المفروض كنت تقولى إنك هتجيب اللاب توب معاك علشان أجيب خبير فنى يستلموا منك» المهم هو قام وسابنى ومشى بسرعة وقالى مفيش شغل تانى وارجع على بلدك ورفض ياخد اللاب توب ومشى على طول وأنا اتوقعت أنه عمل كدا نتيجة لخوفه من دخول المخابرات المصرية، رصدتنى مثلا وحطت فى اللاب توب متفجرات ولا حاجة وتوقعت أن يكون مشى بسرعة، وعلشان كدا أنا أخدت الجهاز ورجعت على الفندق وكان باقى يومين على ميعاد سفرى فضلت قاعد مستنى على أمل أن داود يتصل بيا ، لكنه متصلش خالص لغاية مامشيت وفى تالت يوم فى ميعاد الطيارة ركبت علشان أرجع مطار ميلانو، ومنه على بريشيا.
وأنا فى الطيارة قعدت فى الكرسى اللى جنبى مغربية قالتلى إن اسمها خديجة من المغرب وإن هى رايحة لواحدة قريبتها فى ميلانو وإن دى أول مرة فى حياتها تيجى إيطاليا ولما وصلنا المطار طلبت منى أتصل بقريبتها علشان أعرف منها العنوان فين وفعلا اتصلت من تليفونى ولكن النمرة طلعت غلط وهى بدأت تتوتر وقالتلى إذا كنت أعرف فندق سعره معقول علشان تنزل فيه وأنا عرضت عليها تيجى تقعد معايا فى الشقة وقولتلها إن أنا قاعد لوحدى وممكن تيجى تقعد معايا لغاية لما نشوف ممكن توصل لقريبتها وفعلا روحت معايا البيت وقعدت معايا 4 أيام وعاشرتها جنسيا عدة مرات وحكتلها عن ظروفى وعن سحر حسيت إنها بتتطفل شوية وعايزة تعرف كل حاجة عنى.
وبدأت أشك أن داود هو اللى بعتها لأن بعد فترة لما قابلت داود قالى أنت فيه ضابط شرطة إيطالى بييجى بيقعد عندك وياريت تقطع علاقتك بيه وخلى علاقتك مستمرة مع أصحابك المصريين والقس وأنا اتأكدت إن البنت خديجة المغربية شغالة معاه وإن هى اللى قالتلوا لإن الفترة اللى كانت فيها عندى فى الشقة أصحابى المصريين والقس والضابط الإيطالى جولى الشقة وداود اتصل بيا فى الـ4 أيام دول وقالى متزعلش وأنا قولتلوا خلاص الشغل معاك انتهى وأنا هركز مع عائلتى وهرجع مصر لإن فرح بنتى يوم 20 سبتمبر 2011 وطلبت منه يشوف طريقة علشان يستلم اللاب توب بس هو قالى ارجع مصر وبعد كدا لما آجى إيطاليا يبقى نتكلم.
أنا رجعت على مصر وسبت اللاب فى شقتى وداود وكلمنى وأنا فى مصر وقالى إن أنا لازم أرجع إيطاليا وإنه عامل ليا مفاجأة ولما رجعت فى شهر أكتوبر وكلمت داود وقولتلوا إن أنا رجعت قالى خلاص احجز تذكرة لأثينا فى اليونان لمدة 3 أيام وبلغته ميعاد الحجز وجالى الفندق وروحنا مطعم وقالى متزعلش منى علشان اللى عملتوا المرة اللى فاتت وسألنى على أخبار مصر بعد الثورة أنا قولتله إن سحر كاتبة كل حاجة عن مصر فى الفلاشة اللى هو أخدها .
ويكمل رمزي : وبعد ما خلصنا القعدة أنا وداود فى أثينا هو جاب لسحر هدايا كتير عبارة عن ملابس داخلية وبرفانات وماكينة بتعمل أشكال ورسومات على أظافر اليد بالإضافة إلى سيشوار لفرد الشعر وفى اليوم ده أنا روحت ، وتانى يوم قابلته قالى متزعلش من موضوع الفلوس دا أنت وسحر وإحنا فى الموساد ناويين نعمل لك مكتب كبير فى توريدات المواد الغذائية فى المنوفية ،والهدف منه أن تقوم بتوريد أى مواد غذائية للجيش علشان تكون طريقة إلى دخول وحدات الجيش وقالى إحنا هنبدأ الموضوع دا بـ 20 ألف يورو، وأنا قلت له إن المبلغ ده غير كافى نهائيا لإقامة المشروع ده وإن المشروع محتاج ربع مليون مليون يورو على الأقل وهو قالى إن هما هيدرسوا الموضوع ده فى الموساد لأن المبلغ كبير
والمهم و"إحنا قاعدين فى المقابلة، دوواد قالى إن هما فى الموساد مبسوطين أن سحر جابت رقم أيمن نور وهوا داود اتصل بيه وإحنا قاعدين مع بعض وانا فاكر ان رقم أيمن نور كان 0100226666 أو 0100662222 ، وداود كلمه والدكتور أيمن نور رد عليه وداود عرفه أنه اسموا عبدالله الشبينى وأنه رجل أعمال مصرى مقيم بإيطاليا وأنه بيتمنى أن الدكتور أيمن نور يكون رئيس مصر القادم وإنه لو احتاج أى مساعدات مالية ممكن يوفرها له من إيطاليا لكن الدكتور أيمن نور قال لداود إن الموضوع مش موضوع مساعدات مالية وانتهت المكالمة بينهم وطبعا داود عمل كدا علشان يتأكد أن الرقم بتاع أيمن نور رقم مظبوط وسألنى إن كنت رجعت اللاب توب لسحر ولا لأ ، وأنا قلت له إنى رجعته وادانى تقريبا 3 فلاشات وقالى إن التكليف الجديد إن سحر تختار أى موضوع خاص بالأحداث الجديدة فى مصر وتكتب عنه، وأنا سألته وقلت له على البنت المغربية اللى اسمها خديجة وإنك أنت يا داود اللى بعتها وخليتها تركب جنبى فى الطيارة فى أمستردام وهو نفى طبعا ومعرفنيش بخديجة إلا فى نهاية المقابلة، وحاسبنى وادانى المرة دى مبلغ محترم حوالى 4 آلاف يورو ليا ولسحر 500 يورو، وتانى يوم كان المفروض أرجع على بريشيا ، لكن لما نزلت كلمنى داود على طول وقالى، انزل مصر واحجز تذكرة وبلغنى ميعاد السفر والعودة وقالى آخد اللاب توب لسحر وفعلا حجزت تذكرة طيران لمصر وبلغت داود ميعاد نزولى مصر، وقابلت سحر فى المطار ورجعنا على المنوفية مع بعض وسلمتها اللاب توب والفلاشات، وتانى يوم روحت لسحر وقابلتها واديتها الفلوس بتعتها والهدايا وقولتلها إن داود وعدنى انه هيفتح مكتب توزيع مواد غذائية لينا إحنا الاتنين، وقلت لسحر تكتب فى موضوع وتقريبا كنا فى نهاية نوفمبر وأول ديسمبر 2011 سحر كتبت ساعتها عن انتخابات مجلس الشعب اللى كانت شغالة فى التوقيت دا وقالت إن السلفيين والإخوان أصبح لهم شعبية كبيرة جدا فى الشارع وبيوزعوا على الناس زيت وسكر علشان الانتخابات وإنهم هيكتسحوا أي انتخابات تحصل فى مصر وإنهم «متواجدين» بقوة فى الشارع وبيروحوا للناس لغاية بيوتهم، وكتبت فى نهاية التقرير إنها بتشكره على الهدايا وإنها بتشتغل مع إسرائيل لإنها بتحبهم علشان فلوسهم وإنها نفسها تروح تعيش فى تل أبيب وأنا معاها وإن هى نفسها تكمل حياتها فى تل أبيب بالذات اليومين دول علشان مصر مش بقى فيها أمان .
و بعد كده أنا أخدت الفلاشتين وسافرت على إيطاليا وبلغت داود إنى وصلت وبعد كام يوم داود كلمنى وقالى إن إحنا هنتقابل فى لوزان فى سويسرا وقالى أحجز طيران وأبلغة بميعاد السفر والعودة وقالى إنها مدة 3 أيام وفعلا حجزت وبلغت داود وبلغنى هو اسم الفندق اللى هو حجزلى فيه ، والمقابلة دى كانت تقريبا فى نهاية سنة 2011 كانت نهاية شهر ديسمبر، والرحلة دى كانت مدتها 3 أيام فى مدينة لوزان، وأول لما وصلت الفندق داود بعتلى تاكسى وأخذنى من الفندق وروحت قعدت معاه فى مطعم وفضلنا قاعدين اليوم ده مع بعضنا وسلمته الفلاشات وروحت على الفندق وتانى يوم قابلت داود بنفس طريقة المرة اللى فاتت وادانى مبلغ كبير شوية وتقريبا 2500 يورو و500 يورو لسحر ومدنيش تكليفات خالص، ونبه عليا أن أبلغ سحر مش تجتهد نهائى فى أى موضوع تكتبه علشان متبقاش ملفته للنظر ومتحاولش تصور أى حاجة فى المنشآت العسكرية اللى بتدخلها، وتانى يوم رجعت على بريشيا فى انتظار مكالمة لمدة خمسة أيام ويوم 31 ديسمبر 2011 يوم رأس السنة قالى أنزل وأروح أوتيل فى بريشيا جنب البيت عندى وروحت أسال عن سعر الليلة فى الفندق بكام وأول ما دخلت الأوتيل لقيت داود قاعد ومعاه بنت مغربية اسمها إلهام ودى أول مرة أشوف فيها داود فى البلد اللى أنا ساكن فيها فى بريشيا وأخذنى داود وأنا والبنت المغربية ودخلنا محل بيتزا وبعد كده روحنا قعدنا فى بار على البحر علشان نشوف الاحتفالات اللى بتعملها إيطاليا فى البحر بمناسبة رأس السنة وفى نهاية اليوم قال إن هو راجع الأوتيل وتانى يوم يبقى يبلغنى وقالى إن إلهام شغاله معاه ومتقلقش منها وإنها دي زى داود بالظبط ، وتانى يوم فعلا صحيت من النوم أنا وإلهام لان هى كانت روحت معايا البيت عندي وقالتلى إن داود خلاص انتهى دوره معايا وإنها مكان داود ولو أنا احتجت أى حاجة أقولها وفضلت قاعدة معايا كذا يوم وعرضت عليا أن أنا أقعد معاها فى بيتها اللى فى مدينة بلزونا وهى تبعد عنى بيتنى حوالى 20 دقيقة بالقطار وفضلت قاعد مع إلهام حوالى شهر أو شهر ونصف وهى كانت خلال الفترة دى متكفلة بكل أمورى المادية وأنا ماخدتش منها فلوس.
وخلال الفترة دى بدأت أخلص إجراءات تجديد الإقامة بتاعتى لأنها قربت تخلص وقلت لإلهام إن أنا عايز أسافر مصر، لكن هى قالت أن أنتظرها هتبلغنى بالوقت المناسب وفعلا نزلت مصر وتقريبا كان فى مارس 2012 وروحت قابلت سحر واديتها 500 يورو اللى داود باعتهم، وهى كانت متضايقة جدا لأنها اتعودت تاخد 500 يورو بشكل شهرى وفى الغالب أن المرة دى طولت فى القاعدة فى إيطاليا وفضلت قاعد فى مصر شهر إبريل ومايو ويونيو ومش بعمل حاجة خالص، وفى يوليو رجعت تانى على إيطاليا وقعدت مع إلهام فى بيتها وسألتها إذا كان فيه شغل جديد ولا لأ وهى قالت لى إنها مش جالها أى تكليف جديد من تل أبيب ولو فيه حاجة جديدة هتقولى والفترد دى ظروفى بدأت تنهار وكنت بشوف لو فيه أى شغلانة أنزل أشتغلها وفضلت قاعد الفترة دى مع إلهام فى بيتها وساعات كنت بروح أقعد مع القسيس صديقى ودخل علينا شهر رمضان ومفيش شغل مع المخابرات الإسرائيلية وقلت أن لازم أبلغ القنصل المصرى فى ميلانو وفعلا بعت فاكس على القنصلية المصرية فى ميلانو وقلت إن أنا اسمى محمد رمزى وبشتغل مع ناس من إسرائيل وكتبت رقم تليفونى وطلبت من القنصل أن يكلمنى أو يقابلنى وفعلا تانى يوم القنصل كلمنى بنفسه وقالى إن هو فى انتظارى بكره الساعة 10 صباحا فى القنصلية وفعلا روحت القنصلية المصرية فى ميلانو والأمن فضل مقعدنى حوالى 4 ساعات يسألونى أنت عايز من القنصل إيه وأنا مقلتش حاجة خالص ليهم وإن أنا صديقه وعايز أقابلة المهم اليوم دا ماعرفتش أقابل القنصل، وفضلت خلال الفترة دية بشتغل فى النقاشة وبنام عند أى حد من أصدقائى فى الإجازة ومعنديش شغل أروح أقعد مع إلهام فى بيتها لحد ما جاء شهر أكتوبر 2012 ونزلت مصر على مطار برج العرب لأن التذكرة رخيصة وظروفى المادية كانت صعبة الفتر دى وفضلت قاعد فى مصر مش بعمل أى حاجة لحد تقريبا شهر ديسمبر 2012 وكلمتنى إلهام وقالت لى إن أنا أرجع إيطاليا وأجيب اللاب توب معايا والفلاشات اللى عندى أجيبها وإن هى هتدينى جهاز جديد فيه إمكانيات اكتر وبيصور كل حاجة من غير ما حد ياخد باله وروحت لسحر وأخدت اللاب توب والفلاشة ومكنش عليها حاجة لأن سحر مكتبتش لأن مكنتش فيه فلوس وسافرت إيطاليا ونزلت على بيت إلهام وفضلت قاعد معاها كذا يوم ورفضت تستلم الجهاز والفلاشة وبعد فترة قالتلى إن أنا هروح أسلم الجهاز والفلاشة لواحد من المخابرات الإسرائيلية هيكون فى انتظارى فى السفارة الإسرائيلية فى أثينا فى اليونان ونزلت أنا وإلهام وحجزت لى تذكرة سفر على اليونان وعلى حسابها وكانت لمدة ليلة واحدة.
.
وسافرت على اليونان وفى أثينا روحت على الأوتيل وتانى يوم روحت السفارة الإسرائيلية فى أثينا ولقيت إن فيه خبر باسمى على البوابة ونفس الإجراءات اللى بتحصل فى دخول السفارة الإسرائيلية اتكررت معايا فى أثينا، ودخلت قابلت واحد اسمه يوسف وإلهام كانت قايلة لى إن أنا هقابله وإن هو زى داود بالظبط واديته الجهاز «لاب توب» وقال لى إن هو اللى هيكمل معايا بعد كده مكان داود وإن قريبا هيقابلنى تانى علشان يسلمنى جهاز تصوير صغير جدا أصور بيه من غير ما حد ياخد باله وقال إن أنا أسافر مصر، وفوجئنا إن هو المرة دية يطلب منى أشتغل فى شركة فى بلدنا فى المنوفية واسمها عبودة العشماوى للأجهزة الكهربائية أو شركة تانى اسمها ابن الخطاب للمواد الغذائية فى شبين الكوم وفوجئت إن هو عارف الشركتين وعارف أماكنهم وطلب منى أن أشتغل فى أى شركة من الشركتين وأجمعلهم كل المعلومات و«البيانات» الخاصة بالشركة اللى هشتغل فيها وهجبلهم معاملات الشركة والفاكسات اللى بتيجى لهم واللى بيبعتوها لأن الشركتين دول حجمهم كبير، وفى نهاية المقابلة إدانى مبلغ 3500 يورو، وأنا بقالى فترة ماخدتش فلوس منهم وخلصت المقابلة ورجعت على إيطاليا تانى وروحت قعد مع إلهام شوية ورجعت على مصر وبلغت إلهام بالسفر، وكان فى شهر يناير 2012 ورجعت على مصر وبعد كده روحت على البيت وقعدت شوية وبعدين روحت على الشركة عبودة العشماوى، وقابلت الحاج عبودة وقلت له إن أنا عايز أشتغل عندك فى الشركة، وأنا أعرف الراجل لأن هو من البلد عندنا وقالى لى مفيش مشكلة وتعالى اشتغل وفعلا استلمت شغل فى الشركة وهى شركة كبيرة فى مجال الأجهزة الكهربائية وبتشتغل جملة وقطاعى وهى عبارة عن مول كبير مكون من 5 أدوار وبجواره عدة مخازن خاصة بالشركة وفضلت شغال فى الشركة لحد شهر أبريل وباخد ألف جنيه مرتب فى الشهر ومش فاكر امتى بالظبط إلهام كلمتنى من إيطاليا وقالت لى أن أنا لازم أرجع إيطاليا حالا وفعلا أخدت إجازة وروحت حجزت وسافرت إيطاليا وإلهام استقبلتنى فى المطار وأخدتنى عندها فى البيت وفضلت قاعد عندها يومين وقالت لى إن أنا هروح أقابل يوسف فى السفارة الإسرائيلية فى أثينا فى اليونان وحجزت تذكرة، وسافرت وادتنى 300 يورو علشان أحجز الفندق والتاكسيات وقابلت يوسف وقالى أكتب له تقرير وأنا قاعد معاه فى السفارة عن الشركة اللى اشتغلت فيها وادانى مبلغ 2500 يورو هدية من الموساد وانقطعت علاقتى بسحر وتوجهت إلى مبنى المخابرات العامة بحدائق القبة بس مش فاكر اسم الضابط اللى سألنى وحكيت له كل اللى حصل معايا بالتفصيل.
.
ومن واقع نص قرار الاتهام الصادر من نيابة أمن الدولة العليا ، فقد جاء: أن المتهمان الأول والثانية تخابرا مع من يعملان لمصلحة دولة أجنبية بقصد الإضرار بالمصالح القومية للبلاد بأن اتفقا والمتهمان الثالث والرابع على التعاون معهما لصالح المخابرات الإسرائيلية بإمدادهما بتقارير بالمعلومات عن القوات المسلحة المصرية وتحركات التيارات الإسلامية ومدى شعبيتها بالشارع المصرى، ومن يرأس جموع المصريين فى أحداث ثورة 25 يناير والمخزون الاستراتيجى للسلع الأساسية خلال تلك الأحداث، وبيانات العديد من المصريين داخل البلاد وبدولة إيطاليا وتقييم أداء عدد من المنشآت الاقتصادية العاملة داخل جمهورية مصر العربية، وكان ذلك بقصد الإضرار بالمصالح القومية للبلاد على النحو المبين بالتحقيقات.
موضوع: من ملفات المخابرات العامة المصرية ... جاسوس الغواصات 
السبت أبريل 22, 2017 6:19 am
