Mohamed Hafez
****************
حبايبنا الحلوين الطعمين اللي مش عاجبهم كلمة الريس لما قال ان مصر دولة فقيرة ومواردها شحيحة .
أيوه هما نفسهم بتوع 60 سنة حكم العسكر اللي خرب مصر وفقرها..
أيوه هما اللي بيترحموا على أيام الملكية المخملية لما كانت مصر غنية و السفرجي كان يوناني والخدامة إيطالية ...
أيوه هما مراكيب خرفان الجماعة الإرهابية
أيوه هما اللي عايشين في فقاعة الكولة اللولبية
حبايبنا دول انا مش هقولهم روحوا أقروا تاريخ مصر من مصادره العلمية ، لأن دول بياخدوا العلم من منتدى فتكات و لو قروا مجلة ميكي بيجيلهم تلبك دماغي وبتحصلهم تخمة فكرية .. انا بس عايزهم يشوفوا أفلام السينما المصرية اللي تم انتاجها في فترة الأربعينات وأوائل الخمسينات ( قبل عام 1952) ، يعني أيام العصر الملكي السعيد ( بلاش اللي بعد كده عشان محدش يقول دي كانت أفلام موجهة سياسيا) ..
.
- عايزهم يشوفوا فيلم "غزل البنات" بتاع نجيب الريحاني ( انتاج 1948) .. ويفتكروا كده حالة المدرس ( الموظف ) المصري في العهد الملكي كان شكله إيه.. أظن كلنا فاكرين مشهد نجيب الريحاني مربي الأجيال ببدلته المزيته المقطعة وطربوشه المقيح المكرمش وهو بيقول بكل حسرة بعد ما شاف الخدامين الفخمين في قصر الباشا .. أنا لو من 30 سنة بأعلم كلاب كان زماني بقيت من الأعيان .. دا كان حال الموظف المصري في العهد الملكي السعيد
.
- عايزهم يشوفوا فيلم " معلهش يا زهر" بتاع شادية وكارم محمود ( انتاج 1949) يعني أيام الملكية الجميلة اللي بتقولوا عليها هيلاقوا نفس الحال اللي موجود دلوقتي.. الناس كلها عاوزة تشتغل في الحكومة و في نفس الوقت طبقة موظفين الحكومة مش لاقيين ياكلوا ، و الوحيد اللي كان معاه فلوس هو صاحب محل البقالة اللي تحت البيت.
.
- عايزهم يشوفوا فيلم الأسطى حسن ( انتاج 1951) بتاع فريد شوقي ، ويشوفوا حالة البؤس والفقر المدقع اللي كان بيعيش فيها طبقة الحرفيين ( الحدادين والنجارين ...إلخ) في مصر في العهد الملكي السعيد
.
- عايزهم يشوفوا فيلم "عنتر ولبلب" ( انتاج 1951) بتاع شكوكو.. ويشوفوا إزاي الحارة المصرية كانت عايشه في حالة من البؤس الشديد والضنك في مقابل أصحاب رؤوس الأموال الأثرياء اللي بيشتروا كل حاجة بفلوسهم
- عايزهم يشوفوا فيلم " ابن النيل " بتاع شكري سرحان ( انتاج 1950).. ويشوفوا حال القرية المصرية المنسحقة تحت جبال الفقر والضنك والمجاعة .
.
عايزهم يشوفوا فيلم " السوق السودا" بتاع عماد حمدي وزكي رستم ( انتاج 1945) .. عن جشع التجار وأغنياء الحرب ، وأظن اسم الفيلم لوحده يكفي.
.
- عايزهم يشوفوا فيلم " سلامة في خير" بتاع نجيب الريحاني ( انتاج 1937) .. وفيلم "لعبة الست" بتاع الريحاني برضه ( انتاج 1946) ويشوفوا حالة العامل المصري البسيط و حالة بيته وأسرته ، والفقر اللي كانوا عايشين فيه.
.
عايزهم يشوفوا فيلم العزيمة للفنان حسين صدقي (إنتاج 1939) ، أو فيلم المصري أفندي لحسين صدقي برضه ( انتاج1946)
دي مجرد أمثلة من الأعمال السينمائية اللي رصدت الحالة الاجتماعية للمصريين في العهد الملكي.. يعني قبل حكم العسكر الوحشين ، والأفلام دي ماكانتش موجهة طبعا لتوصيل رسالة سياسية ، لأن النظام الملكي مش ممكن هيدين نفسه .
مرة تانية بلاش تتعبوا نفسكوا وتروحوا تذاكروا التاريخ من أمهات الكتب والمراجع المتخصصة ..شوفوا بس عينة من أفلام الواقع المصري قبل ثورة 1952 وأنتوا هتتاكدوا إن دا حال مصر من قديم الأزل ، وإن مصر عمرها ما كانت دولة غنية من 500 سنة على الأقل ...يعني كل إدعاءاتكم دي مجرد هلفطة مالهاش اي سند تاريخي ، وانتوا بترددوها زي البغبغانات .
#دمتم_بغبغانات
موضوع: حبايبنا الحلوين الطعمين اللي مش عاجبهم كلمة الريس لما قال ان مصر دولة فقيرة ومواردها شحيحة . 
الخميس أبريل 27, 2017 9:08 am
