Mohammed Haffz
يبدو إن الأسبوع دا حافل بالكوميديا و غالبا لسه حنشوف أكتر لحد ما يخلص..
1 - بعد التصريحات المسيئة لمصر و الإمارات والسعودية و الولايات المتحدة.. خرج علينا أمير قطر يقول لنا.. إنه مقالش الكلام دا.. و موقع وكالة الأنباء القطرية اتقرصن.. و صفحة تميم الشخصية على تويتر اتقرصنت.. و التليفزيون القطري اتقرصن.. و "تميم" نفسه اتقرصن و هو بيقول نفس التصريحات علناً بلسانه.. في حفل تخريج لمجموعة من عساكر الدرك ..
مش شايف ولا كوميك واحدة من صفحات الكوميكس على تصريح "قرصنوني" العبيط بتاع تميم.. و دا يوضح لكم وضوح ساطع الصفحات دي مين بيمولها.. و ليه...
مش شايف ايقونة واحدة من أيقونات النشطاء.. بتسخر من كلام تميم بالرغم من العبط الفج اللي قاله.. طبعا الكلب ما بيعضش إيد سيده...
.
2 - إنجلترا اللي عرفت الطيارة الروسية اتفجرت عندنا إزاي و ليه و بواسطة مين بعد الإنفجار بـ 35 دقيقة.. خدت 28 ساعة عشان تعرف هوية الي عمل التفجير عندهم.. و لسه مش عارفين شركاؤه و بيقولك "على الأرجح مكانش بمفرده"..
.
3 - "العبيدي" اللي عمل تفجيرات إنجلترا إتولد فيها و اتربى فيها.. و ضرب نظريات البرادعي و حجي الحمضانة بتاعت الزولم والكمع و تهميش الشباب و سوء التعليم في مقتل..
إلا لو إنجلترا فيها تهميش و قمع و التعليم بتاعها فاشل واحنا ما نعرفش...
الجيش نزل في لندن نفسها بسلطة مطلقة و ضبطية يحمي المدنيين.. مش مانشستر بس.. و طلع مكانه مش "الثكنات" و لا حاجة يا منى
.
4 - الأمير القطري تميم متقرصن دلوقتي.. محدش يكلمه...
.
5 - الاسبوع دا يكاد يمر كاملاً لأول مرة من 7 سنين.. من غير "حمدين صباحي" ما يطالب بانتخابات مبكرة.. يا ريت اللي يعرفه يتصل بيه و يطمن على صحته لا يكون عيان واللا حد حط له حاجة في الشاي و اللا حاجة..
.
6 - رجل القانون الأستاذ "خالد علي" بتاع سيادة القانون و الفلوس بتروح فين و حقوق الغلابة.. طلع مأسس حزبه بدون ترخيص.. و بيلم فلوس مقابل اشتراك عضويات الاعضاء بدون ترخيص.. ومحدش عارف طبعا لسه الفلوس دي فين..
هي جماعة المعارضة دي مفيهاش حد عادي زينا ؟؟ صنايعي مثلا.. نجار.. مدرس.. فنان.. دكتور.. دخاخني.. مهندس.. الناس الطبيعية اللي ليها دخل معلوم و بتكسب بعرقها دي ؟
.
7 - بعدما الجماعة النشطاء قالولنا زمان "الإجابة تونس".. جايين دلوقتي يقولولنا "اصل مفيش عدالة و لا حرية في تونس".. أي كلام في الكنافة.. المهم محدش فيهم يراجع نفسه و يقول إنه غلطان.. و رمضان كريم..
.
8 - "تميم" قرصنوه يا عيني...
.
9 - الرئيس احتد على واحد المفروض انه نائب من نواب الشعب .. عايز يلم فلوس المشاريع القومية و الاستثمارات و يزود بيها المرتبات و نجيب بيها عسلية و حمص و بلح و "نشبرق" نفسنا..
النائب مش دارس رياضيات تقريبا.. المليار ألف مليون حضرتك و المليون الف ألف.. يعني لو عايز توزع مليار جنيه على مليون فرد.. حتدي كل واحد الف جنيه مرة واحدة و خلاص و خلصنا..
الواحد لما بييجي يكتب بوست بتبقى عينه في وسط راسه و يقعد يراجع أرقام و يشوف خمسميت مرجع عشان الأمانة في نقل المعلومات.. بينما سيادة النائب طالع يتكلم كأننا قاعدين ع الترعة نشرب شاي ساعة العصاري..
يا ريت فعلا اللي ييجي يتكلم في حاجة يا يعرف هو بيتكلم عن ايه يا إما ينقطنا بسكاته...
.
10 - عندي حالة قلق من إن النائب اللي الرئيس شخط فيه دا.. يكبر بعد كده و يتحول إلي "حمدين صباحي".. بما إن كل تاريخ الأخير السياسي بيتلخص في إنه الرئيس السادات "شخط" فيه..
#بابا_فيه_حشرات_على_سلك_الشباك
#دول_نشطاء_وأيقونات_ثورية_يا_حبيبتي .
-------------------------
By: Alaa Hammouda