من قبل Mohammed Haffz.
......................·
طيب واحده واحده كده.. عايزين نفهم - أو نحاول نفهم - هو إيه اللي بيحصل على المسرح الإقليمي على ضوء الزلزال اللي عملته #تصريحات_تميم ابن موزة .. وخلونا نبدأ من الآخر للأول
- أكتر حاجة لفتت نظري في اللي حصل هو التصعيد الشديد والهجوم الكاسح من قناة العربية السعودية وكافة منصات الصحافة والإعلام السعودي والخليجي ضد قطر.. وهو تصعيد يمكن محصلش حتى أيام الملك عبد الله رحمه الله لما كانت العلاقات السعودية القطرية في الدرك الأسفل من الديبلوماسية .. وطبعا كلنا عارفين إنه مفيش حد في المنظومة الإعلامية السعودية يقدر يهمس همسة بدون موافقة وتصريح من بيت الحكم السعودي ، بما يعني إن دي هي إرادة ورغبة ملكية بلا أدنى شك ..
- طيب ، وإيه يا ترى السبب في هذا التغيير المفاجئ والدراماتيكي في الموقف السعودي ؟
مفيش تفسير لما حدث غير إن آل سعود جالهم أمر من فوق .. من فوق خالص.. من رئيس مجلس إدارة العالم ( ترامب) وهو ما يعني أن الأمريكان قد بدأوا في رفع الغطاء عن دويلة الغاز اللي عايشة تحت حمايتهم .. أو إن ترامب بيبتز قطر عن طريق السعودية عشان أمير قطر يروح ويركع تحت أقدام سيد البيت الأبيض بعد ما يشخلل بـ 100 واللا 200 مليار دولار عشان الكبير أوي يرضى عنه ولو إلى حين ، ولو إن استعمال دولة بحجم السعودية في غرض زي ده صعب برضه ، إلا لو كان الموضوع بيصادف هوى لدى العرش السعودي لتخليص تار قديم ...
مالهاش تفسير تالت .. واللي عنده أي تفسير غير كده يقولي
.
- نيجي بقى لتصريحات دميم نفسها...
أولا حكاية ان التصريحات مفبركة نتيجة اختراق موقع وكالة الأنباء القطرية الرسمية دا كلام ما يدخلش دماغ طفل صغير ، لأن التصريحات دي كانت متذاعة على شريط الأخبار في التليفزيون الرسمي القطري ( القناة الأولى القطرية الأرضية) ، وطبعا مفيش حاجة اسمها تهكير لقناة تليفزيونية .. دا غير إن التصريحات نفسها فضلت متذاعة على موقع وكالة الأنباء القطرية على انستجرام لحد الساعات الأولى من صباح اليوم ، قبل ما ينتبهوا للفضيحة اللي حصلت واللي خلتهم ينكروها بطريقة عبيطة ضحكت عليهم العالم كله ... ماهو مش معقول إن كل حاجة في قطر بقت متهكرة كده فجأة .. مش معقول ننام ونصحى نلاقي موقع وكالة الأنباء القطرية على تويتر اتهكر.. و نفس الموقع على إنستجرام إتهكر.. وصفحة تميم الشخصية على تويتر اتهكرت.. وصفحة وزارة الخارجية القطرية إتهكرت ... والتليفزيون القطري نفسه اتهكر.. دا كلام محدش يصدقه
.
ثانيا: الأهم من قصة فبركة التصريحات واختراق الموقع دي ، هو اننا نسأل نفسنا.. هو ليه أمير قطر يطلع بالتصريحات المجنونة دي ، و بعد يومين اتنين فقط من حضوره قمة الرياض في السعودية ؟
ليه يطلع كده ومن غير ما حد يطلب منه ويقول كلام يلطش فيه في كل المنطقة ..
دا مش بس المنطقة.. دا خبط كمان في ترامب نفسه !!
ليه واحد يطلع ويفتح على نفسه أبواب الجحيم بالشكل ده ؟!!
دا واحد بيزلزل أركان عرشه بنفسه
ماهو مش معقول انهم شربوه حاجة أصفره مثلا !!
وإيه الهدف من انه يقول الكلام ده أصلا..؟
هو عايز يوصل لإيه ؟!
وبيوصل رسائل لمين ؟!
.
مش لاقي تفسير عقلاني مقنع لتصريحات دميم غير انه وصلتله معلومات مؤكدة إن أمريكا قررت تتخلص منه تماما ونهائيا - بمعاونة أطراف إقليمية - بعد ما دوره انتهى وأصبح كارت محروق بالنسبة لها ، والمعلومة دي اتأكدت لما كان في قمة الرياض ووصلته إشارات بكده ( بأفكركم بغياب دميم تماما عن حضور حفل افتتاح مركز إعتدال اللي افتتحه ملك السعودية وترامب وباقي الدول المشاركة في القمة على سبيل المثال) ، ومن هنا قرر دميم انه يلجأ للخيار شمشون ويهد المعبد على الجميع ، يعني عليا وعلى أعدائي ..
ماهو يا إما كده.. يا إما فيه طبخة مسبكة تقيلة بتتجهز للمنطقة ...
طبخة برائحة البارود
موضوع: عايزين نفهم - أو نحاول نفهم - هو إيه اللي بيحصل على المسرح الإقليمي على ضوء الزلزال اللي عملته #تصريحات_تميم ابن موزة .. وخلونا نبدأ من الآخر للأول 
الأربعاء مايو 24, 2017 3:48 pm
