من قبل Mohammed Haffz.
.....................
تسونامي الخليج... كواليس الحدث
===================
معلهش استحملوني شوية وركزوا كويس جدا في الكلام... بس ياريت قبل ما نبتدي..نعمل واحد شاي مظبوط مع سيجارتين عشان نهضم المعلومات
وياريت الأخوة بتوع المصادر يركنوا على جنب شوية..لأن الكلام ده مش ليهم
.
في الأول لازم نعرف إن اللي حصل امبارح دا كان نتيجة لمعلومات موثقة وصلت لأطراف الأزمة وبشكل مؤكد.. وانه حصل بعد كده اتصالات وتنسيق للجهود وتوزيع كمان للأدوار
.
البداية كانت في مؤتمر مكافحة الإرهاب اللي انعقد في الرياض يومي 20 و 21 مايو الماضي .. في المؤتمر دا إتقدم لعدد محدود من القادة اللي حضروه معلومة مؤكدة تثبت للجميع خيانة قطر وأميرها وتواطئه على جيرانه وانه يعمل كخنجر مسموم في ظهر العرب
والمعلومة دي جات من مصر 
كلنا فاكرين العاصفة الشديدة اللي أثارتها تصريحات تميم من كام يوم .. وقتها انا ماكانش شاغلني التصريحات بقدر ما اللي شغلني كان السؤال.. هو إيه سبب التصريحات دي ؟
ويومها انا كتبت وتساءلت:
هو ليه أمير قطر يطلع بالتصريحات المجنونة دي ، و بعد يومين اتنين فقط من حضوره قمة الرياض في السعودية ؟
ليه يطلع كده ومن غير ما حد يطلب منه ويقول كلام يلطش فيه في كل المنطقة ..
وليه في التوقيت ده بالذات ؟
ليه يفتح على نفسه أبواب الجحيم بالشكل ده ؟!!
وليه يخبط في الجميع كده.. بما فيهم ترامب ؟
دا واحد بيزلزل أركان عرشه بنفسه
ماهو مش معقول انهم شربوه حاجة أصفره مثلا وخلوه يقول الكلام ده !!
وطبعا كلنا عارفين إن قطر ردت على أزمة التصريحات وقالت بأنه حصل إختراق وقرصنة لموقع وكالة الأنباء القطرية الرسمية وللحساب بتاع الأمير كمان .. وطبعا كلنا ساعتها مصدقناش ولا كلمة من الكلام ده ..
طيب خليني أصدمك وأقولك ، ان موضوع الاختراق والقرصنة دا كان حقيقي .. بس خلي الحتة دي على جنب دلوقت... هنحتاجها بعدين
نرجع شوية لورا ، وتحديدا للزيارة اللي قام بها وزير خارجية قطر، محمد بن عبد الرحمن آل ثاني، إلى طهران قبل أسبوع من انعقاد مؤتمر الرياض .. في الزيارة دي اجتمع محمد بن عبد الرحمن سراً بالمدعو قاسم سليماني قائد فيلق القدس في الحرس الثوري الإيراني، وقائد القوات الإيرانية في سوريا والعراق ، وفي الاجتماع السري ده حمل وزير الخارجية القطري توصيات كتابية من أميره بشأن ما سوف يتم مناقشته في مؤتمر الرياض القادم بعد أيام ... والوزير أبلغ المدعو قاسم سليماني بأن أمير قطر يرغب في رؤيته والتحدث معه بشكل عاجل و سري، ودعاه لزيارة الدوحة في أقرب وقت قبل انعقاد مؤتمر الرياض ..
بعدها بيومين قام المدعو قاسم سليماني بزيارة سرية للدوحة واجتمع بأميرها تميم وناقشوا في الاجتماع السري ده خطط عمل وضعتها طهران لنسف كافة المساعي الأمريكية لتشكيل حلف لمحاربة إيران في المنطقة.
وفي الاجتماع السري ده ، الأمير تميم قال كلام كتير عن نظرته لإيران وإشادته بثقلها الإقليمي وعن طبيعة العلاقة بينه وبين جيرانه العرب ،وعن العلاقة بينه وبين الإدارة الأمريكية الحالية ، وعن توقعاته لمصير ترامب وجهود قطر في تغذية الحركات المناهضة لترامب في الولايات المتحدة ودعمها
الاجتماع السري ده إتصور صوت وصورة
.
وفي مؤتمر الرياض ، تم إطلاع الملك سلمان والأمير محمد بن خليفة ولي عهد الإمارات والرئيس ترامب على فيديو الاجتماع ده ، فتأكد الجميع من خيانة قطر وتآمرها على المجتمعين في الرياض وعملها على إفشال المؤتمر من قبل ما يبدأ بالخطط اللي تم وضعها في طهران ، وإن قطر أصبحت بوابة للفرس للنفاذ للمنطقة
لأن الكلام ده يعني ببساطة إن تميم شغال جاسوس لحساب إيران ، وانه بينقل كل ما يدور في المنظومة الخليجية لأصدقاءه في طهران
وكان لابد من إطلاع ترامب بشكل خاص على الجزء اللي يخصه في الفيديو.. عشان يرفع إيده عن قطر ويسيب العرب يتصرفوا مع تميم من غير ما يتدخل
.
كان السؤال بعد كده ، إزاي نعرض اللي حصل في الاجتماع السري ده على الرأي العالم العالمي بدون ما نكشف مصادرنا ، وبدون ما نسبب أي حرج لأي أطراف دولية أخرى ( روسيا مثلا ) ؟
وهنا جات فكرة اختراق المواقع القطرية الرسمية ووضع ما قاله تميم في الآجتماع على تلك المواقع ، ودا اللي حصل بعد مؤتمر الرياض بيومين .. عشان كده قلتلكوا من شوية ان الاختراق الاليكتروني حصل بالفعل..لكن الكلام اللي إتحط على المواقع القطرية على لسان تميم كان صحيح تماما ، لأننا لو ملاحظين إن الكلام اللي قاله تميم في الاجتماع السري كان هو حرفيا نفس التصريحات اللي إتذاعت على لسانه في موقع وكالة الأنباء القطري
ولو تلاحظوا برضه ، هتلاقوا مثلا إن قناة العربية السعودية وقناة سكاي نيوز وكافة منصات الصحافة والإعلام السعودي والخليجي كانت مجهزة نفسها ومستعدة بضيوفها بمداخلاتها التليفونية ، وكل شيئ كان متجهز والسيرك كان منصوب في انتظار ساعة الصفر بعد إذاعة التصريحات على طول .
ودا اللي يفسر ليه ردة الفعل الخليجية المرة دي كانت عنيفة وحادة جدا والأمر تعدى موضوع قطع العلاقات الديبلوماسية لغلق كافة المنافذ البرية والبحرية والجوية مع قطر وفرض عزلة إقليمية شاملة عليها.. لأن الأمر أصبح صراع عروش ..ووصل لمرحلة المعادلة الصفرية
وده برضه اللي يفسر لنا تويته ترامب اللي قال فيها النهاردة.. تحدثت مع القادة العرب عن "تمويل الإرهاب" فأشاروا إلى قطر
.
حاجة كده على جنب.. الحريق اللي حصل من كام يوم في القصرالأميري القطري كان بفعل فاعل لإخفاء أية أدلة وحرق كل معدات التصنت اللي إتزرعت في الجناح اللي إنعقد فيه الإجتماع السري بين تميم وبين قاسم سليماني قائد فيلق القدس في الحرس الثوري الإيراني
.
كل ده يأكدلنا إن المعركة السياسية الدائرة الأن في الخليج هي في المقام الأول معركة سياسية ومخابراتية بين مصر و بين قطر ، وإن كلمة الرئيس السيسي الكاشفة في المؤتمر ده كانت هي إشارة البداية وساعة الصفر لإنطلاق تلك المعركة اللي انتصرت فيها مصر بشكل ساحق
وهنا نقدر نقول بكل ثقة وبحق إن #الصقور_لاتنام
#مصر_تنتصر
موضوع: تسونامي الخليج... كواليس الحدث 
الأربعاء يونيو 07, 2017 7:06 am
