من قبل Mohammed Haffz.
...............................
#هـــــاااااااام : موضوع جزر تيران و صنافير بالتفصيل للي عايز يفهم :
======================================
أنا اشتغلت فعليا على جزيرة تيران لمدة 4 شهور سنة 2004 و كنت قائد نقطة تأمين و مراقبة الجزيرة ، و كان كل قوة الجزيرة 20 عسكري بس بتسليح خفيف حسب اتفاقية كامب ديفيد
قبل ما اشتغل في الجزيرة سنة 2002 أخدت فرقة استطلاع في المخابرات الحربية و اطلعت على كل ما يخص الجزر ، و انها تتبع للسعودية و مصر لها حق إدارتها و سلمت ادارتها لمصر فعليا بعد حرب 1956 علشان السعودية في الفترة دي مكانش عندها جيش و لا قوات بحرية تحافظ على مدخل خليج العقبة من اطماع اسرائيل و مصر تولت تأمينها ، علشان اسرائيل كانت عايز تاخد الجزر و تتحكم في خليج العقبة اللي كان هيقفل الملاحة و يعزل منطقة غرب السعودية و الأردن و شرق سيناء
بالنسبة للناس اللي بتثبت مصرية الجزر بالخرائط القديمة ، مصر و السعودية أو أرض الحجاز لغاية 1928 كانت كلها تتبع للدولة العثمانية و ماكنش فيه ترسيم حدود بالمعنى الدقيق و كان الوضع عبارة عن تقسيم اداري لكل والي من ولاة الدولة العثمانية ، و بالتالي الخرائط دي لا يُعتد بها كوثائق رسمية تثبت الفواصل بين الدول
و عبد الناصر ليه فيديو مشهور و هو بيقول جزيرة تيران مصرية ، و ده لأن اسرائيل كانت معترضة على موضوع تسليم الجزر لمصر ، و عبد الناصر كان قاصد يعلن كده علشان اسرائيل ما تعرفش تاخد الجزر دي بدون معركة مع مصر
و الحقيقة إن محدش سأل نفسه.. "هو ليه عبد الناصر بيقول إنها مصرية لو ماكانتش متنازع عليها أو فيه مشكلة بخصوصها "...؟؟
يعني هل كان ممكن إن عبد الناصر يعمل مؤتمر صحفي أو يطلع في خطاب عشان يقول إن الإسكندرية مصرية ؟؟
ليه بيتكلم في "شيء بديهي" زي كده ؟ إلا لو كان فيه منازعة فعلا على تبعية الجزر..
و الحقيقة كمان إنه واضح جدا إن عبد الناصر قال التصريح دا كمناورة سياسية.. بدليل خطاب مندوب مصر لدى مجلس الأمن بتاريخ 27 مايو 1967، في عهد عبد الناصر نفسه..
الخطاب دا عبد الناصر قال فيه:
- "إن مصر لم تحاول فى أى وقت من الأوقات أن تدعى بأن السيادة على هاتين الجزيرتين قد انتقلت إليها، بل إن أقصى ما أكدته هو أنها تتولى مسئولية الدفاع عن الجزيرتين"..
و تقدر تدور على الخطاب و تقراه بفسك.. الصحف نشرته..
https://goo.gl/BJ8Dkd
.
و صدر الكثير من المستندات ساعتها اللي تثبت مصرية الجزر عِندا في اسرائيل
و للأسف حصلت النكسة ، و اسرائيل استولت على الجزر بدون معركة لإنسحاب القوات المصرية من سيناء و عدم تواجد أي قوات مصرية على الجزر و بنت عليها فعليا مطار إسرائيلي حربي صغير شوفته بنفسي
.
و بعد حرب 1973 إسرائيل مكانتش عايزة تسلم الجزر وفقا لمعاهدة كامب ديفيد علشان هي بتقول انها مش أرض مصرية
طبعا السادات أصر انها مصرية علشان يستلمها يا إما كانت هتضيع على مصر و السعودية وساعتها الاسرائيليين كانوا هما اللي هيتحكموا في خليج العقبة ، ولكن مع اصرار السادات تم ضمها لاتفاقية كامب ديفيد لصالح مصر
.
الجزر طبيعتها جبلية و مفيش فيها أي زرع أو حياة أو أي استفادة اقتصادية ، لكن وضعها الاستراتيجي مهم جدا .
وفضل الأمر على ماهو عليه لغاية لما حصل الآتي :
سنة 2010 الحكومة الإسرائيلية منحت موافقتها لتنفيذ مشروع قديم.. بيفكروا فيه من أيام العدوان الثلاثي.. و يمكن من قبلها.. من بعد حرب 1948...
المشروع دا اسمه "الأحمر-المتوسط Med-Red" أو "خط إيلات الحديدي السريع High-speed railway to Eilat".. طبعا المشروع دا وقف بعد قناة السويس الجديدة.. و بقى عديم الجدوى.. و هنعرف ليه..
المشروع دا كان خط بضائع سكة حديد كهربائي بسرعة 250 ميل في الساعة.. يبدأ من ميناء إيلات بخليج العقبة.. و بعدين ينطلق إلي "ديمونة Dimona" و من ديمونة إلي "بير شيفع Beersheba"، لميناء "أشدود Ashdod" علي المتوسط مباشرة.. و بعدين يكمل الخط لتل أبيب...
الخط دا كان رايح جاي المفروض.. يحمل بضايع في الاتجاهين...
علشان الخط دا بالذات بدأوا يلغوا مطار العقبة و يعملوا مطار جديد أفضل و أحدث و أكبر اسمه مطار "رامون Ramon Airport"..
الخط دا كان مقدر له إنه يحيد قناة السويس القديمة و يخلي مالهاش لازمة.. خصوصاً مع فترات الأنتظار الطويلة اللي كانت بتعاني منها التوكيلات الملاحية...
طيب نعمل ايه ؟؟ نمشي حركة السفن و نخليها أسرع و أيسر و أفضل.. و "أضمن" بدل النقل "المختلط" بري/ بحري...
و هنا فكرنا نحفر قناة تانية..
فقررنا في مصر اننا نحفر قناة موازية (قناة السويس الجديدة) لتقليل زمن العبور في القناة و تم سد الباب على فكرة المشروع الإسرائيلي لعدم الحدوى الأقتصادية .
الخط دا اتعملت القناة الجديدة عشانه.. القناة الي حضراتكم شايفينها "تفريعة" و "مالهاش لازمة".. و لما اتكلمنا عن "ميد ريد" سخرتوا مننا..
و ميد ريد دا خط سكة حديدي بيمر من إيلات لتل أبيب عبر ميناء أشدود.. مش قناة اسمها "اشدود"..
.
راحت إسرائيل أعلنت انها هتعمل مشروع تاني ، وهو "قناة البحر الميت - تعالات هاياميم - Red Sea–Dead Sea Water Conveyance".. يعني المشروع عبارة عن قناة تربط من البحر الاحمر للبحر الميت للبحر المتوسط ..
في نفس الوقت تم الاعلان عن الكوبري المصري السعودي اللي هيكون نقلة في اقتصاد المنطقة
ليه
علشان الكوبري ده هتتركب عليه أنابيب غاز و بترول من السعودية لمصر و هتتمد الانابيب عبر البحر الاحمر و ارض مصر و البحر المتوسط لغاية اوروبا
و ده هيوفر على السعودية ثمن النقل بناقلات البترول ، و مصر هيبقى عندها عداد زي عداد المياه هتاخد فلوس على البترول اللي بيعدي في أرضها
ده غير إن التجارة البرية بين آسيا و افريقيا هيحصل فيها نقلة نوعية عن طريق الكوبري ده ، و هيقضي على كل احلام اسرائيل في موضوع القنوات بتاعتها
طبعا كوبري استراتيجي زي ده هيبقى له تأثير كبير على الاقتصاد المصري و السعودي و تأمينه هيكون أمن قومي زي السد العالي كده
و الكوبري ده هيبقى له نقط ارتكاز على جزيرتي تيران و صنافير
.
نرجع بقى لاتفاقية كامب ديفيد اللي مقيدة عدد القوات و التسليح
طبعا هيبقى هدف إسرائيل في أي حرب مستقبلية انها تضرب الكوبري ده اللي هيربط الوطن العربي كله ببعض ، و هيبقى ليه تأثير سلبي على أمن و اقتصاد اسرائيل
في الوقت ده تم الاتفاق على إعادة الجزر للمملكة السعودية علشان هي بره اتفاقية كامب ديفيد و تتحط عليها قوات مشتركة من مصر و السعودية لتأمين الكوبري من خلال قواعد عسكرية على أعلى مستوى
طبعا اسرائيل هتتجنن من الموضوع ده و عمالة تثبت ان الجزر دي مصرية علشان متتحطش القوات دي
.
وطبعا مينفعش الكلام ده يتقال رسمي في الاعلام أو الدولة تصرح بيه علشان ده كده يبقى اعلان عداء رسمي لأسرائيل و ممكن يكون ليه آثار خطيرة احنا مش قدها دلوقتي
فبنشتغل لكن من غير ما نثبت حاجة علينا حتى يكون الأمر واقعا
.
فيه بقى هرية مضحكة بيرددها البعض بدون علم ، وهي إنه لما تبقى الجزر سعودية يبقى المضيق ممر عالمي .. على أساس إنه كان قبل كده "ممر محلي"..
أي مضيق بيبقي ممر عالمي.. و ممنوع يتقفل.. و لما يتقفل بتقوم حروب.. و بتحميه معاهدات خاصة بالبحار و المضايق..
ففي كل الأحوال مضيق تيران ممر عالمي والكلام ده من سنة 1957.. لا حد يقدر يوقف الملاحة فيه.. و لا حد يقدر يفرض رسوم.. و مصر مكانتش تقدر تمنع الملاحة فيه لأي سفينة.. و لا أي حد يقدر يمنع دا...
المادة "5" من اتفاقية السلام بتؤكد دا بالنسبة لمضيق تيران و خليج العقبة كله:
"يعتبر الطرفان أن مضيق تيران وخليج العقبة من الممرات المائية الدولية المفتوحة لكافة الدول دون عائق أو إيقاف لحرية الملاحة أو العبور الجوي. كما يحترم الطرفان حق كل منهما في الملاحة والعبور الجوي من وإلى أراضيه عبر مضيق تيران وخليج العقبة"...
يعني لا "بقت فرصة لاسرائيل تعدي" و لا الكلام دا.. هي طول عمرها بتعدي...
العقبة علي فكرة فيه 3 دول.. مصر و السعودية و الأردن..
وبعدين ما هي قناة السويس بتقع كلها في الأراضي المصرية ، ومع ذلك هي ممر ملاحي دولي ، وبتخضع لنفس المعاهدات ، ومصر ما تقدرش تقفلها في وجه أي ملاحة بحرية إلا لو كانت السفن دي مملوكة لدولة احنا في حالة حرب رسمية معاها .
اما هرية إن"جنودنا ماتوا على الجزر".. فدا كلام مالوش أي أساس من الصحة ..محدش مات على تيران و صنافير.. اللي كان عليها ملاحم و بطولات فعلا هي جزيرة "شدوان" في مدخل خليج السويس..
وهرية "الحق التاريخي" و أصلنا حاربنا هناك.. كل دي قصص انشائية.. لأن مصر حاربت في الشرق الأوسط كله.. والمصريين دمهم سال في اليمن.. فهل تبقى اليمن مصرية ؟؟
وحكاية إن الإدارة المصرية" تدينا الحق في الجزر.. دي بالضبط نفس حجة البشير.. لأن السودان كان لها إدارة علي حلايب و شلاتين.. و هو بموجب "الإدارة" بيدعي النهاردة إنها بقت سودانية و له حق تاريخي عليهم!
و الكلام دا مش صح.. و إلا بالتالي يبقي إسرائيل لها "حق تاريخي" في فلسطين.. و لها "حق تاريخي" في الجولان.. و دا كلام فارغ..
و بالمناسبة الجزر لو بقت سعودية فستظل تحت الإدارة المصرية زي ما هي .. ودا كلام نهائي
.
الموضوع دلوقتي مش موضوع جزر على قد ما هو موضوع تخوين الدولة
و الناس اللي بتخون دي عمرها ما كانت في يوم خايفة على مصر و لا عندها وطنية و لا زفت و عايشين على التمويلات
و للأسف في ناس كتير اتسحبت وراهم بحسها الوطني و دول ليهم مني كل الاحترام .
متفهم تماما حزن "الوطنيين" و اندفاعهم العاطفي في موضوع ترسيم الحدود.لكن الحكاية مش عواطف ...دا أمن قومي واستراتيجي .
.
#عقيد_محمد_النجار
شير من فضلك
.
-----------------------------------------------------------
By:Mohammed Elnaggar & Alaa Hammouda