لم يكن موقفنا المعارض من قرارت رفع الدعم الجزئي علي المحروقات من أجل تلك العناصر فإننا نؤمن بضرورة إلغاء الدعم كليا

Hassan Margawy

..........................

لم يكن موقفنا المعارض من قرارت رفع الدعم الجزئي علي المحروقات من أجل تلك العناصر فإننا نؤمن بضرورة إلغاء الدعم كليا ولم يكن إعتراضنا موقوفا علي الوقت أو الكيفية بل علي التبعات التي ستحل علي رؤسنا وتهاون الحكومة في الرقابة فالبنزين والسولار لايعنيني في شيئ فأنا لا أملك سيارة ولكن مايعنيني هو الحالة المتردية التي ستهز أركان المجتمع بعد تلك القرارات وقد وجدنا الإخوة المؤيدين يعترضون علي من يعترض ويفرشون الأرض حرير ويصورون الواقع المر وردي وكأننا سنعيش في جنات النعيم ومنهم من ربط ماقامت به الحكومة بأمن الوطن وسلامته وتعيش كده أفضل ولا تبقي لاجئ مادخل ذلك بذلك لا أعرف ؟

الدول تواجه أزمات إقتصادية طاحنة مثل الأرجنتين والبرازيل واليونان وتقوم بإجراءات إقتصادية سريعة من تعويم عملة لتقشف حكومي لضبط الأسواق الخ.. ولم يقل أحد لشعوبهم تتحمل ده وألا عاوز تكون لاجئ .ثم نجد من يهدد المعترض علي القرارات بقوله تحدث عن نفسك لاتتحدث باسم الفقراء والغلابة ويسمح لنفسه بالتحدث باسم المؤيدين فلماذا لم تتحدث أنت عن نفسك؟

ياسادة كما قلت أعلاه ليس لنا إعتراض علي رفع الدعم ولا علي القرارات الإقتصادية الصادمة ولكن هو خوفنا علي ماسيأتي بعدها فالحكومة لاهم لها إلا كيفية معالجة عجز الموازنة فإذا إتخذت القرارات لاتنظر للمتضررين إلا بالكلمات والمواطن البسيط ونحن منهم يري أنه هو فقط الذي يتحمل الفواتير ونحن نعيش في بلد واحد ويجب أن يتحمل الجميع تكلفة الإصلاح كلا حسب حالته المادية وأولهم الحكومة نفسها فأبن خطتها من التقشف أين خطتها من ألاف المستشارين الذين يلهفون الملايبن دون أي مردود لصالح العمل فلا يعقل ترك الكبار من فاسدين ورجال أعمال وفناننين ولاعبي الكرة وكل من تسقط الملايين تحت أرجلهم نتركهم دون أن يتحملوا نصيبهم من التكلفة ويكون التحميل متساوي هو يشتري نفس السلعة بنفس السعر الذي أشتريها به لماذا لاتكون هناك ضرائب تصاعدية ونحن لانبتكر شيئ ليس معمول به في دول العالم الأول حتي في بعض البلاد تصل الضريبة ل100% من الدخل بعد حدود معينة لماذا لايلغي الدعم نهائيا بحيث نصل للمستحقين فمثلا نفعل كروت البنزين والسولار ومعلوم من سجلات المرور بيانات كل سيارة وإستخداماتها فمثلا نفعل الكروت الزكية بأن يكون للفئات الأكثر إحتياجا أنبوبة بوتاجاز حتي بدون مقابل شهريا علي أن يكون السعر حرا بعد ذلك لماذا لانرفع الدعم كليا عن الكهرباء والمياة علي أن تكون الأسعار مدعمة في كل القري والكفور والنجوع والبلاد الأكثر فقرا وموجود توصيفها ومعلوم أماكنها مع البحث في كيفية التعامل مع باقي الأفراد بالدولة من خلال الشرائح الإستهلاكبة مع عدم دعم شركات الأسمنت والحديد والسبراميك ....لماذا لانوفر للمواطنين وسائل مواصلات تنافسية بأسعار تحد من إستغلال المستغلين لماذا لانفعل وسائل النقل البحرى والنهري وبالسكك الحديدية لنقل البضائع ولخفض التكاليف لماذا لا نحارب الإحتكار خصوصا من كبار التجار والمستوردبن لماذا لاتكون هناك قوانين رادعة تردع كل من يخل بالسوق تصل عقوبتها للإعدام لماذا لانتصالح في مخالفات البناء بدلا من الهدم بسداد غرامات تساند الخزينة العامة ولماذا لاتكون الخدمات لتلك الأبنية بثلاث أمثال قيمتها المعتادة لماذا لانرخص للتكاتك ولماذا لايكون هناك بيع عادل لأراضي الدولة المنهوبة فالرقابة تكاد تكون منعدمة ومن هنا يكون إعتراضنا علي القرارات لأن الحكومة هي ولبة الأمر وليست وظيفتها أن تصدر قرارات لتجبي أموال ثم تتركنا بعد ذلك فريسة لكل فاجر . ياسادة نحن قاع المجتمع نحن فقراءه نحن الوقود الذي يدعم تلك الأمة وقت الخطر نحن من أهملنا في التعليم والصحة والعمل والسكن نحن الممنعون من وسائل الترفيه لانوادى ولامنتزهات ولامسارح ولاسبنمات ولا مجرد مستشفي وإن وجدت فهي مبني خرساني بلا خدمات لا تجعل من نفسك متحدثا رسميا باسم الحكومة فأنت فرد من أفراد هذا الشعب ومن يأن فرد مثلك له نفس الحقوق وعليه نفس الواجبات يريد أن يصل صوته لصانع القرار فلا تقمعه ولا تنهره ولا تجعل من نفسك حامي الوطنية فالوطن لنا جميعا وليس حكر علي أفراد من يعترض لم يخرج عن الأطر والقانون بل هي وسيلة كفلها له الدستور ومن يعارض وطني وليس مجرم طالما لم يسفه الدولة ولم ينتقص من رموزها هو فقط يعبر عما بداخله أتركه يعبر لاتسد في وجهه النوافذ ألا يكفيك كل تلك النوافذ المغلقة أمامه لتغلق أنت فمه.

ياسادة ماقلناه قاله الكثير غيرنا وعبر وسائل الإعلام فلاتشكك في وطنية غيرك إلا ماكان منهم حاقد أو ناقم علي الدولة ورئيسها وحكومتها وجيشها وشرطتها وقضاءها فهنا قل له قف عندك وإطلع أنت منها ليس لك من الأمر شيئ

Rehab El-Smanody

..........................................

وكانوا زعلانين من اعلان :-D

ان تكون مؤيدا للاستقرار لا يعني انك نحط الجزمه في بقك او انك نلعي عقلك ونلبس الكولار طواعية و تدي الليش لحد يجرك

احترم جدا كل مؤيد للقرارات عن قناعه وبحث علمي و تبني لوجهة نظر متخذي القرار عن وعي و انا في كثير او في اغلب الاحيان اكون من هذه الفئه

احيان اخري يلتبس المشهد ولا تملك مستندات مؤكده زي موضوع الجزز بتحتكم وقتها لثقتك في الاداره فتسلم امرك لمن انتخبته ثقة ولم يفعل ما يدل علي خيانة الامانه لكن دون افتاء فقط صمت و استسلام لعدم كفاية المعلوما

اما ان تتوافر معلومات للعامه ومؤكده و راي من اقتصاديين محترمين يؤكد في قرار ما ان القرارات ناقصه ولن تؤدي نتائجها المنشوده زي الدكتور اللي يبني خطة علاج علي الكورتيزون بما له من اثار جانبيه وهو امامه خيارات تانيه والطريقين للعلاج لكنه اختار الاخطر بلا داعي قوي فتنتقد وده حقك لانك المريض اللي هيقع عليه الضرر فده طبيعي

اما بقي تلاقي ناس بلا اي بحث بيدافعوا تقول ده حقهم همه اختاروا طريق مريح..

تلاقي ناس تانيه بتدافع لطريقه كوميديه علي غرار ياكلوا عيش ليه ما ياكلوا جاتوه فبتكلمك ليه يبقي عندكو تلات عربيات واحده كفايه :-D

تقوم تعمل انفرند من سكات بعد ما تاخد حباية ضعط و تقول اللهم اخزيك يا شوشو مش هرد

ناس تانيه تقولك ماهو بيلم منكو زيادات المرتبات اللي خدتوها زور بالاعتصامات و متستحقوهاش تعمل بلوك من سككات و تقول مش هرد علي ابناء الموكوس الفاسد مبارك اللي نفسهم تولع فبيشعللوها ...

. انمما يهاجموك انت ومن تعبوا نفسهم و يعتبروك قليل الاصل وانقلبت عالراجل الكمل اللي لا يمكن يغلط مع انك لا دعيت لنزول ولا شتمت ولا سحبت الثقه اصلا ... فده يتقال فيه الحمد لله الذي عافانا مما ابتلي به غيرنا

وكتب صديقنا دكتور محمد حافظ وهو من أشد المؤيدين للدولة المصرية

Mohammed Haffz

.........................

من امبارح وانا تقريبا شبه متوقف عن الكتابة وبأكتفي بالفرجة على البوستات والتعليقات من كل الاتجاهات وبأسمع لكل الأراء من الجانبين ..دا غير اني لا أخفيكم سرا إتوجعت كمواطن من متوسطي الدخل من الزيادة المنهكة اللي حصلت في أسعار المحروقات واللي هيتبعها بالتأكيد زيادة رهيبة في كل شئ ، ومن وقتها وانا بأفكر هدبر أمور بيتي إزاي وهقدر أعيش أنا وولادي إزاي في ظل إن الزيادة في المرتب هتلتهم أضعافها زيادة الأسعار في الأساسيات وغير الأساسيات ..إحنا كطبقة متوسطة بقينا بنكح تراب وكل شوية بنتنازل عن حاجات كانت من ضمن اللايف استايل بتاعتنا عشان نقدر نعيش ونكمل .. عشان كده آثرت الصمت والتأمل لحد ما أستوعب الأمور وأعيد تظبيط حساباتي.

أنا متفهم جدا للغضب وحالة الألم اللي عند أغلبنا - وانا منهم - ومتفهم برضه إن أي انسان من أي مكان في العالم حتى لو من سلطنة بروناي لو قلتله انك هتدفع فلوس زيادة هيزعل ويحتقن ويمكن يقعد يبرطم ، لكن برضه لا أتفهم ولا يمكن أعذر أي حد عايز يزيط في الزيطة وبيستغل الفرصة ويبتدي يصطاد في الميه العكرة ويقعد يشكك في الثوابت ، وانا عندي بعض الثوابت اللي لا يمكن أتناقش فيها وهي كالآتي:

- الوطن فوق المزايدات، لأن مليش مكان غيره..!

- الجيش فوق النقد، لأنه المؤسسة الوحيدة الباقية فى البلد القادرة على اعادة الاتزان عند اختلال الامور..

- ثقتي في القيادة لا متناهية وثقتي في حسن تقديرها للأمور لا تقبل الشك لأن القيادة ترى الصورة كاملة ولديها حسابات وطنية دقيقة لا تدخل فيها حسابات الشعبية المعتادة عند أغلب السياسيين التقليديين

- مهما حصل مش هقف فى موقف واحد مع اسلامجى و اللا كولجى، لأنهم ولاد وسخة بالتجربة.. ومش هسمح لأي وغد منهم إنه يزيط في الزيطة ويحاول يركب الموجة عشان تحقيق مصلحته الشخصية مش عشان مصلحة البلد.. لأني عارف ومتأكد إن البلد عمرها ما كانت موجودة أصلا في حساباتهم ..دول شوية تجار وشعارتجية مالهومش غير في الشو و المزيدات الرخيصة

.

من امبارح وانا شايف ناس بتتكلم وترغي وتعبر عن غضبها ورؤيتها للأمور، فيهم الشخص الوطني الموجوع اللي بينفس عن غضبه المشروع ، وفيهم المزايد ، وفيهم الزياط ، وفيهم وفيهم ...

فيهم اللي بيشيّل الليلة كلها للحكومة والنظام ، وفيهم اللي بيحمل الليلة كلها للشعب الكسول المرفه اللي مش بينتج واللي إتعود على الأنتخة وإتغيرت أبجديات حياة أغلب طبقاته - حتى الفقيرة منها- للنمط الاستهلاكي النهم .. حتى في الفرعيات

بعضنا إتكلم عن مرارة الإجراءات وتأثيرها على أغلب الطبقات ، وبعضنا - وانا منهم - إتكلم عن عدم المصداقية في نفي وجود أي زيادة ثم إذا بنا ننام ونصحى ونلاقي كل حاجة زادت ، وبعضنا إتكلم عن التوقيت السيئ .. والحقيقة إن كل وجهة نظر من اللي عرضتها عايزه عشرات البوستات لوحدها لمناقشتها ، لكن هحاول اختصر بقدر الإمكان عشان ماأطولش عليكم

.

اللي بيشيل الليلة كلها للحكومة والنظام أحب أفكره بأن الريس من أيام ماكان لسه مرشح رئاسي لم يعدنا في يوم من الأيام بأنهار الخمر والعسل ولا بالحياة الناعمة المرفهة.. هو في كل كلماته كان بيقولنا إن الطريق صعب وكله عرق ومعاناة وصعوبات.. فهل محدش فينا أخد باله من الكلام ده وحس النهاردة إن الرئيس خدعنا ؟

الحكومة معندهاش رقابة فعالة على الأسواق وده شيئ لازم نعترف بيه .. بس تعالوا نناقش إزاي ممكن الحكومة تراقب الأسعار وتضع منظومة فعالة لضبطها

صحيح انت ما تقدرش تعمل تسعيرة جبرية للسلع والخدمات باعتبار اننا بنتبع نظام الإقتصاد الحر الخاضع لأليات السوق والعرض والطلب ، لكن تقدر تحدد هامش ربح للتاجر وتعاقبه لو تجاوزه ..لكن المشكلة هي في كيفية تنفيذ الكلام ده..

يعني إيه الآلية اللي عند الحكومة اللي بيها تقدر تنفذ الاقتراح ده..؟

انا فاكر انه فيه حاجة كان اسمها مفتش التموين .. الناس دي راحت فين يا كابتن متحت ؟

أقولك .. مفتشين التموين دول ناس مننا ..مواطنين زيهم زينا ..موظفين حكومة يعني مش من آلهة جبل الأوليمب ..بس المشكلة ان 99% منهم فاسد ، والفساد هنا مش بس انه لما بيروح لبتاع الفراخ مثلا فبيكرمش له 100 جنيه في إيده عشان يطرمخ ويسيبه ويمشي.. فيهم اللي بيكسل ، وفيهم اللي بيخاف يواجه التجار ، وفيهم اللي بيروح يمضي ويروح أو يطلع يشتغل على تاكسي ومنطقه هنا طالما اني مش بأمد إيدي للحرام وبحاول أحسن دخلي بطريقة حلال يبقى انا كده في السليم .. مع انه تغافل مثلا عن إنه بيخون الأمانة الموكلة إليه ، وده في حد ذاته فساد ما بعده فساد

خلو بالكو إننا بنتكلم عن فئة تعدادها يقدر بمئات الآلاف مش ألف واللا ألفين عشان حد يقولي طاب ما نفصلهم ونجيب غيرهم .. هتقدر الحكومة ترفد 200 ألف موظف وتشرد أسرهم ؟؟ خلي بالك اننا بنتكلم كده على ما يقرب من مليون مواطن هيتشردوا ..يعني دول لوحدهم بأسرهم يعملوا ثورة ، او يعملوا ميليشيا مسلحة

طيب آلية الرقابة على مفتشين التميون إيه وكيفية محاسبتهم ؟ يعني الرقابة على الرقابة بتتم إزاي..؟ أبدا سعادتك الحكاية كلها جزا إداري أو تحويل للشئون القانونية وآخرتها خصم يومين تلاته من المرتب يقدر المفتش يعوضهم في طلعة وحدة على السوق.. دا غير إن الجزاء غالبا بيترفع عشان ما يعطلش الترقية .

هتقولي نغير قوانين المحاسبة هفكرك ان الحكومة لما حبت تعمل كده بالقانون 18 للخدمة المدنية ، كلنا فجأة افتكرنا الموظف الغلبان (الفاسد) وقعدنا نتباكى عليه وعلى حاله لحد ما الحكومة تراجعت وعدلت القانون وشالت منه طريقة المحاسبة الرادعة ..يعني احنا اللي كنا السبب

طيب شرطة التموين دي أخبارها إيه حضرتك ؟

ولا حاجة.. ما أسخم من سيدي إلا ستي .. وأكيد طبعا مش محتاج أكلمك عن فئة أمناء الشرطة اللي بينفذوا (الكبسة) على المحلات ...يا حبيبي دول آلهة الرشوة والكرمشة عند قدماء المصريين

كده مش فاضل غير اننا ننزل الجيش يراقب الأسواق .. وأظن دا اقتراح غير منطقي ..دا غير انك ساعتها هتلاقي جحافل الكولجية بيقولوا السيسي طالق الجيش على البياعين الغلابة ، وهاتك بقى يا نحنحة وصعبانيات

أما بقى حكاية الشعب المأنتخ واللي إتغيرت أنماطه الاستهلاكية لحد ما قرب من الشعوب الخليجية ، فالكلام ده صحيح جزئيا، لكن ما ننساش برضه انه فيه طبقات عريضة من الفقرا المطحونين بجد واللي مرتباتهم بالكاد بتكفي الأساسيات ، بس احنا عشان عددنا كبير لما بنشوف الزحمة على المولات والكافيهات بنرجع نقول فين الشعب الجعان ده..؟ ماهي المولات والسينمات مليانه أهي ، ونسينا اننا بنتكلم عن كتلة تعدادها من 15 لـ 20 مليون من الشرائح العليا في الطبقة المتوسطة ، يعني بنتكلم عن كتلة تعادل تعداد دولة زي السعودية ...الفئة دي هي اللي بتصنع مشهد الزحمة على المولات والكافيهات ده ، وبتدينا صورة خادعة عن الرفاهية اللي بيعيش فيها الشعب

لكن حتى الطبقات المطحونة اللي بتعاني بالفعل.. هل نقدر نعفيهم من المسئولية ؟ مطلقا

الطبقة دي برضه مش ملايكة و أغلبهم فاسد برضه ( كلٌ في نطاقه) من أول عامل البناء اللي بيغلي عليك أجرته ومش بيأدي المطلوب منه كما يجب وبـ (يكروت) في الشغل ،، لحد سواق التوكتوك اللي برضه بيغالي في الأجر وبيقسم المشوار لحتتين وتلاته وبيجري يجيب باللي معاه شريط الترامادول عشان ينبسط ويعمل دماغ ، وطبعا لو حاولت تناقشه هتلاقيه بيغزك بمطوة ، وصولا حتى للي بيقعد يزروب عيال بدون حساب وبدون شغل وفي الآخر يشكتي من الدولة اللي مش بتجيب أكل لعياله .

نيجي بقى لمسألة التوقيت .. الحقيقة دي برضه شماعة حلوة بتساعدنا على التنفيس عن غضبنا وتمثيل دور الضحية اللي بيتكالب عليها الجميع .. لأن التوقيت عمره ما هيكون مناسب ... احنا شايفينه مش مناسب مثلا لأنه جه بعد رمضان ومصاريفه وكلنا خارجين من (قفا عيد) زي ما بيقولوا

بس برضه مش هيكون مناسب مع موسم المصايف ومصاريفها..

ولا هيكون مناسب مع عيد الأضحى ومصاريف اللحمة والفتة

ولا هيكون مناسب مع موسم دخول المدارس ومصاريفها اللي بقت نار

ولا هيكون مناسب مع دخول الشتا ومصاريف اللبس الشتوي

طاب هيبقى مناسب إمتى ..؟

هيفضل دايما مش مناسب

آخر حاجة هي موضوع المفأجاة... على فكرة هي ماكانتش مفاجأة ولا حاجة ،، لأن الحكومة من سنة 2014 وعلى لسان المهندس ابراهيم محلب صارحتنا وقالت انه هيتم رفع الدعم عن الطاقة بشكل متدرج على مدار الخمس سنين القادمة ..يمكن النفي المتكرر انه هتكون فيه زيادة في الفترة الحالية هو اللي أصاب بعضنا - وانا منهم - بالصدمة ودفعنا للقول بأن الحكومة كانت بتعمل معانا عملية خداع استراتيجي ، بس عايزك تتخيل معايا كده لو الحكومة قالت مثلا إنه بعد أسبوعين هتكون أسعار المحروقات كذا وكذا.. تخيل بقى اللي كان هيحصل ، وتخيل حجم السواق السودا اللي كنا هنشوفها ...كله كان هيجري يخزن ويعبي في جراكن وكنا هنرجع لأزمة البنزين وأزمة البوتاجاز مرة تانية ونشوف قتلى وجرحى وشهداء محطات البنزين ومستودعات الأنابيب

.

أنا عارف إن القرارت صعبة ، بس كان لابد منها .. إحنا كنا امام دولة جسدها مصاب بالسرطان وكان لابد لها من من العلاج الكيماوي مع كل آثاره الجانبية المؤلمة، بس مفيش قدامنا حل تاني .. يعني يا نتحمل المر اللي إحنا فيه علشان البلد دي تكمل صح .. يا نعيش يومين إنتحار قومي ويبقى حلال فينا سب ولعن الأجيال القادمة .

.

على فكرة انا تعمدت إني ما أقعدش أعدد في الإنجازات اللي تمت واللي أكيد ليها تمن ، ولا أتكلمت عن تكلفة إسترجاع الدولة من براثن عصابة كانت واخدها في طريق الهاوية ، ولا حتى إتكلمت عن التكلفة المرعبة للعمليات العسكرية لمكافحة الإرهاب ..كل دي حاجات ليها تمن ، والتمن غالي أوي ، ولكن أكثر الناس لا يعلمون

أخيرا...أنا إحترمت كل من عارض وكل من إنتقد بخوف على مصلحة الوطن والمواطن وكل من عبر عن غضبه المشروع ... ولو عايز تنفس عن غضبك وخنقتك بشكل ايجابي، اتكلم في المفيد... احنا عايزين ضمانات ان دي اجراءات اصلاح حقيقي مش تلبيس طواقي ، لكن خللي بالك.. دا مش معناه أبدا انك تحاول تزيط في الزيطة وتبتدي تطاول على الرئيس ..لا يا حبيبي ..السيسي مش حسني مبارك ومش مرسي .. يعني هو لا فاسد ولا بيحمي فسدة ، وهو مش خائن ولا بيتحالف مع خونة .. ومهما كانت لي أية إنتقادات أو تساؤلات حول بعض القرارات .. فلن أغير رأيي ولا ثقتي فيه ...يعني لو حاولت تستظرف ولقيتها فرصة انك تزيط في الزيطة.. هخليك تدور على قطع غيار لكرامتك وتجيب اللي يدور عليها معاك ، وكل قرد يلزم شجرته .