Mohamed Khalifa
.............................
سمعت حضرتك عن العربيات اللي القوات الجوية دمرتها علي الحدود الغربية ؟؟
دول كانوا 12 عربية. لنفترض ان كل عربية محتاجة لتدميرها الي صاروخ. يبقي ضربنا عليهم 12 صاروخ لتدميرهم
هو الصاروخ الواحد تمنه كام ؟؟؟؟
طبعا احنا معندناش معلومات دقيقة. لكن المتاح من معلومات ان احد الصواريخ المستخدمة في العمليات دي هو صاروخ الهيل فاير الامريكي وبيتم اطلاقه من الاباتشي و الاف 16 - اللي بيقوموا بكل العمليات اللي حضرتك بتسمع عنها
الهيل فاير ده سعره 65 الف دولار. اه زي حضرتك ماقريت كدة بالضبط. مايزيد علي مليون جنيه للصاروخ الواحد. يعني تدمير القافلة دي لوحدة كلفنا تكلفة مباشرة 12 مليون جنيه
في خلال السنة ولا الاتنين اللي فاتوا تم تدمير 300 سيارة علي الحدود الغربية. يعني احنا بنتكلم فيما يزيد عن 300 مليون جنيه بس علشان الفرقعة اللي حصلت في الصحرا
عايزك بقي تزود علي حساباتك طيارات البحث اللي في الجو بتدور علي الارهابيين في الصحرا. وتخيل كدة انت علي ارتفاع 10 الاف قدم مثلا وقاعد تدور في صحراء لا متناهية علي اثار كاوتش عربيات. الطيارة بتستهلك وقود وزيوت. وفيها طيارين وسط اجهزة ومعدات بتصدر موجات رادار طول الوقت وبتأثر علي ابدانهم واعصابهم. كل ده تمنه كام؟ ولو ماحصلش كدة والسد المنيع اللي اسمه الجيش حصل فيه ثغرة - ووارد جدا يحصل علي فكرة - هتكون التكلفة ايه
تخيل بقي ان السيناريو ده مستمر من 4 او خمس سنين بصورة شبه يومية. وان مش بس صواريخ ، لا ده فيه مدرعات بتنفجر - الهامفي الواحدة ب 140 الف دولار يعني 2.5 مليون جنيه تقريبا !- وفي ناس بتفقد اطرافها وناس تتشل
وفي ناس بتموت ...
السؤال بقي المهم ...... كل التكلفة دي مين اللي هيدفعها ؟؟ مين هيتحملها بدل عنك ؟؟
الاجابة مفيش !
مفيش حد هيدفع لك تمن معاركك. انت اللي هتتحملها. علشان انت المستهدف من كل ده. عارف لو فار جربان من اللي بنصرف ملايين علشان نكافحهم دول نجح في انه يتسلل للبلد بالسلاح ده هيعمل ايه ؟؟
زي ما عملوا اول يوم في رمضان ... صفوا اتوبيس شايل عيالنا !
ضيف لمعلوماتك كمان ان بلد زي السعودية - اكبر منتج ومصدر للنفط - زودوا المحروقات بما يقارب الضعف بعد سنتين من حملتهم "الجوية" علي اليمن. حملة جوية فقط مشتركة مع دول اخري مش حرب ضروس كاملة متسعة الجبهات بنخوضها لوحدنا ومفيش حد بيساعدنا فيها
ممكن حضرتك تكون من المقيمين في المملكة حاليا ... تكلفة الاستقدام بقت قد ايه دلوقت ؟؟
كل ده مايمنعش اننا نتذمر من غلاء الاسعار الحالي وضيق ذات اليد. صح. كلنا نعاني وايامنا صعبة للغاية. فقط اسأل الوالد او الوالدة انتم ايامكم كانت عاملة ازاي بعد 67 ولغاية 73 ؟؟
وحتي بعدها ....
هيقولك بالمعني الحرفي للكلمة مكناش لاقيين ناكل. المعني الحرفي فعلا مش مجرد مبالغة لغوية. مفيش في الاسواق سلع غذائية من اصله. الفراخ بتيجي في الجمعية اول كل شهر وبتتصرف للاسرة فرختين طول الشهر. غير ان مكانش الناس معاها فلوس من اساسه علشان توفر السلع الغذائية الضرورية
بس البلد كانت في حرب . علشان كدة والدك او والدتك - او جدك او جدتك - يحكوا لك ازاي كانوا بيشاركوا قوتهم القليل مع الجيش اللي بيحارب
لو جدتك موجودة هتحكي لك ازاي كانت هي بتطبخ اكل وتبعته للجبهة مع اي مجند ساكن في حتتهم لزمايله علشان "يرموا عضمهم"
وهتقولك مش هي وبس اللي كانت بتعمل كدة. ده كل سكان الحتة كانوا بيعملوا كدة. وبعد مايبعتوا الطبيخ لعيالهم علي الجبهة يقعدوا هما ياكلوا عيش وجبنة مع اولادهم الباقيين
علشان كدة الجيل ده استحق نصر اكتوبر واستحق يتسمي "جيل الشمس"
اللي حاول بعض التافهين يسموه جيل العرة !!
احنا كمان هنقعد كمان كام سنة نحكي لولادنا واحفادنا ازاي احنا بنينا بلدنا. ازاي كنا بنحارب وبنخوض معارك ضروس دفاعا عن وجودنا في الاساس. وازاي اننا كنا بنصحح اوضاع معوجة من سنين وبنبني بلد تانية كاملة علشان نعرف نعيش
زي ماقلنا مفيش حد بيكون مبسوط لما يدفع فلوس زيادة. بس مهم اوي تبقي فاهم مين سبب الزيادة دي. اللي بيبعت لك ارهابين من حدودك واللي مول الارهابيين واللي دخل الارهابيين مصر واللي وفر لهم غطاء سياسي او اعلامي او فكري او عقائدي واللي عايزك ماتحربهمش . او عايزك تحاربهم بشويش وبحنية
اصل احنا لازم نحافظ علي سلامة الخاطفين والمخطوفين !
علي قد ما تقدر اقتصد في نفقاتك. دي القواعد الاساسية لاي امة بتعاني ازمة اقتصادية. ولنستغفر الله جميعا. وندعي ربنا انه ينجي بلدنا من الهول المحدق بها
موضوع: علي قد ما تقدر اقتصد في نفقاتك. دي القواعد الاساسية لاي امة بتعاني ازمة اقتصادية 
الثلاثاء يوليو 04, 2017 6:11 am
