Adel Ansary إلى إدارة السكرى .. ما قل و دل
#بطل_السكري_4
♥ وهيك كانت
"بيوم السبت 22/12/2012 اخذوني (امي و ابوي) على الدكتور ، و عملولي فحوصات و نتيجتهن ما بتبشر بالخير :(
كتبلي الدكتور تحويلة ع المستشفى .. هسا وصلنا المستشفى ، و رجعوا عادولي الفحوصات ؛ يعني كل يومي قضيته من الدكتور للمستشفى
صار المغرب و انا بستنى ليخلصوني مشان اروح ع الدار .. بعد بدقيقة بيجي الدكتور ؛ ليحكيلي بدك تضلي عنا
طبعا ما عجبني الموضوع ليش اضل بالمستشفى .. طبعا نمت بالمستشفى ، و بالتحديد بقسم (icu) وانا لساني ما بعرف ايش معي
كانوا يحكولي معك حموضة بالدم ، و لواتأخرت اشوي كان دخلت بغيبوبة.
كل يوم بالمستشفى كان يمر سنة ، كل يوم كان يجي حدا من قرايبي ليزورني ، و انا بيني و بين حالي بحكي هلقد حالتي سيئة ، كنت لسا ما بعرف ايش معي
باليوم الثالث اجوا طلاب متدربين مع الدكتور المسؤول عن حالتي ، و بالصدفة واحد من المتدربين بيحكي انه معي سكري .. هسا الدكتور المسؤول عن حالتي بطريقة لا ارادية حكى لاء ما معها سكري ؛ وقتها اجت عيني بعينه كان خايف من رد فعلي بس كل الي عملته انه ابتسمت
ابدا ما اهتميت بالسكري و لا فرقت معي يمكن لانه ما عندي فكرة عن مرضي ، و لا عن الحياة إللي بتستناني
صارت حياتي مليانه تعرفت على الناس الي كانو شبهي ، و قعدنا مرات و حكينا لبعض عن السكري
و تعرفت على نااس برضو ما معهم سكري ؛ بس فهموني و ما حسسوني بالضعف ولا العجز و صرنا نطلع و نعمل انشطة و مخيمات صيفية للناس السكريين و المش سكريين
كنت مبسوطة بحياتي الجديدة مع السكري ..صرت بشاير ثانية ، بنت طموحة ...صرت بدي اعمل هيك و بدي اروح هان و اشتغل هيك و ادرس هيك و اساعد هظاك ؛ بس احيانا كانت تيجيني لحظات اتعب و اضايق من السكري ، وصلت لدرجة اني كرهته
لانه لما تحكي لحدا انه معك سكري و هلحدا يصير يضحك ضحكة طويلة ؛ كإنك حكيتله نكتة ، او لما تكون مع ناس و بدك تحكيلهم عن السكري و يحكولك يا حرام او يحكولك الله يبعدنا عنه و نظرة الشفقة مليانه عيونهم و يطلعوا عليك بطريقة بتخليك تقرف من حالك
او لما تكون بمحاضرتك و سكرك عالي و مش قادر تركز بإللي بحكيه استاذك او دكتورك ولا بتقدر توخذ الاذن لتطلع .. او لما ينزل و ما تقدر توقف ع رجليك و تكون زي جثة هامدة ؛ لانه حضرتك قضيت يومك بلا أكل .. و اهلك يكونوا عايشين حالة رعب و توتر ،و يحملوك على المستشفى خايفين ليخسروك ؛ بتكون السيارة طايرة عن الارض .. و انت مش بوعيك و لا حاسس بالاشياء الي حواليك
و تصل المستشفى و يعلقولك ابرة السيروم ؛ عشان سكرك يرجع يطلع .. و ترجع تقدر تقوم ع رجليك ، و تكمل حياتك طبيعي
كل هالاشياء خلتني اكره السكري ، بس كيف بقدر اسمح لحالي اكره صديق عمري .. صديفي الي بدو يضل مرافقني بتخرجي ،ربشغلي
كيف بدي اكره المرض الي خلاني اتغير و اصير اكثر تفاؤل و حياة!!
بفضل السكري تعرفت على ناس صاروا قدوتي .. صار عندي اصحاب جداد بفهموا علي لما احكيلهم سكري مش راضي ينزل ايش اعمل؟؟ .. او يفرحولي لما يكون فحصي التراكمي تمام .
السكري عرفني على اطفال حالتهم زي حالتي ، سكريين بس عندهم دفا و ابتسامة ؛ بتعوضك عن كثير اشياء
طلع السكري داء الحظ او داء السعادة ؛ لأنه غيرني للاحسن
و متأكدة انه غير كل شخص دخل على حياته ...كل يوم بغز جسمي بالابرة 3 مرات ،مين يقدر يعمل هالاشي غير احنا السكريين بفضله عرفنا كيف نصبر و نتحمل ....
*
احنا محظوظين انه معنا سكري بدايتنا أنا والسكري ....
موضوع: ♥ وهيك كانت بدايتنا أنا والسكري .... 
الثلاثاء يوليو 04, 2017 6:57 am
