Hassan Margawy
..........................
قطار واقف ومعطل الخط واقف ليه؟
عطلان:
ماحدش دري ليه؟
مفيش وسيلة إتصال ؟
مفيش حد معاه موبايل يبلغ النجدة ليه؟
مكناش نعلم إن في قطار تاني جاي علي نفس الخط .
طيب ماأخدش حذرك ليه ونبهت علي الركاب بالنزول والبعد عن القطار وان يأخذوا حذرهم بعدم القرب من القطار لحين إصلاحه أو علي الأقل نبهت علي ال 3 عربيات الأخيرة بضرورة مغادرة الركاب للأمام وتفريغها تماما؟
هل فرامل قطارك مشدودة أثناء الوقوف مش كنت أبسط وسائل الأمان إنك تترك فرامل القطار مفتوحة علي الأقل لإحتمال إصطدام خلفي يكون نتيجته الإزاحة للأمام فتخفف من قوة الإصطدام.
لماذا لم تترك قطارك طالما لم تكن هناك وسيلة إتصال لتجري علي خط السكة الحديد ومعك مجموعة من الناس لتحذروا سائق أي قطار قادم على نفس الخط وانت أعلم من غيرك بطبيعة العمل على الخط ونظام سير القطارات.. وكنت أشرت إليه من على مسافة تسمح له بالتهدئة والتوقف.
لو كنت عملت كدة كنت عملت اللى عليك وبرأت ذمتك من اللى حصل.
لو كان عندك ضمير عندك شجاعة عندك كفاءة عندك تدريب كويس على مواجهة المشاكل والأزمات كنت عملت كده وأكتر عشان تنقذ أرواح الناس.
نيجي على ساثق القطار القادم من القاهرة.
هو حضرتك كنت فى وعيك؟
كنت فى كامل حالتك الصحية والنفسية والبدنية؟
كانت عينك فى وسط راسك؟
حضرتك شوفت إن فى قطار واقف على نفس خط سيرك؟
المفروض تكون رصدته من مسافة طويلة تسمح لك بالوقوف وبالتهدئة.
ماشوفتش وكنت فى غيبوبة وقضاء وقدر لما قربت على القطار الواقف عملت إيه لتقليل الخسائر ولاحاجة يقال إنك قفزت من القطار.
طيب لو كنت لاحظت الموقف وقدرت الخطورة ولو من على بعد 200 متر ودى مسافة ممكن العين المجردة ترصدها لوهديت سرعتك وعملت التصادم وكنت شجاع مش كانت الخسائر حتكون اقل.
نيجى على مسئولى الرقابة ومسئولى التحويلات والبلوكات حضراتكم كنتم فين ؟
ولما قطار معطل على نفس الخط مادرتوش ماعملتوش حاجة تنقذ الموقف كنتم نايمين ولا كنتم مغيبين ولا كنتم مشاركين فعليا فى التخطيط للكارثة أنتم المسئولين امامنا وامام القانون وامام الله على إزهاق أروح الضحايا وماتعلقوش الشماعة بتاعة قلة الإمكانات ده إهمال مروع ادى لمصرع وإصابة العشرات وتتحملون مسئوليته من اول الوزير لغاااااية غفير المزلقان.
ياجماعة نقدر هنا نقف وقفة شموخ ونحيي أهلنا فى القرية مكان الحادث نحيي روح مصر الأصيلة اللى مادورتش على شماعة عشان تعلق عليها قلة الإمكانات وهرع الصغير قبل الكبير والشيخ وحتى العليل لمد يد المساعدة لإنقاذ مايمكن إنقاذة من الضحايا وقبل أن يتحرك المسئولين.
نحيي فيهم روح مصر واصالتها اللى ماتلقهاش فى اى بلد فى الدنيا اللى خرجوا عن بكرة ابيهم متبرعين بالغالى والنفيس بالقليل والكثير بكل انواع العون والمدد لإنقاذ الضحايا فنظرة ياحكومة ونظرة يابلد لهؤلاء الأبطال هم ملح الأرض التى تهب لتدافع عن تلك البلد فى حالة الشدة تجدهم دائما رجال لايملون ولايكلون ولايضنون بشيئ من اجل بلدهم تحيتى لهم جميعا وقبلة على رؤوسهم.
لما نيجيي نشوف ونحلل اللى حصل من سائقى القطارين ونقارنه بالجندى البطل اللى لما لاحظ وجود إرهابيين خلفه فى طريقهم لتفجير موقع كتيبته تحرك فورا بدبابته لم تكن سيارة الإرهابيين امامه ليدهسها حتى يقول طحلب زومبى شمام كلة أو خروف أن ماحدث قضاء وقدر ومجرد صدفة لا بل رجع للخلف وذهب لسيارة الإرهابيين ودهسها وهو يعلم بأنها محملة بالمتفجرات وربما تنفجر فى دبابته وتكون نهايته ولكنه أبى أن يتركهم ليقتلوا زملاءه ويقتلوا الناس من حولهم ويشنعوا على بلاده ويحققوا عليها نصرا يروجون له إعلاميا فأخذ القرار وأن يضحى بنفسه فى سبيل وطنه ومنع كارثة كانت ستصيب الأخرين هنا المقارنة بين من تربى على الوطنية والفداء ومن تربى على الإهمال والفساد.
نريد تحقيقا عاجلا وشفافا نريد القصاص لأرواح الضحايا.
نريد القضاء على الفساد والإهمال واللامبالاة فهى اشد فتكا بنا من الإرهاب.
نريد تطهير البلاد من كل الخونة والشامتين.
نريد مصر نظيفة لأهلها الطيبين.
by:hassanmargawy.
موضوع: حادثة قطارى الأسكندرية وحديث عن المسئولية والوطن والشجاعة 
السبت أغسطس 12, 2017 9:33 am
