Mohammed Haffz
***************
■ من الافيهات الحلوة اللي بتلعب بمهارة على وتر الحقد الطبقي وبتنتزع الآهات من الصدور إفيه بيقول: بدل ما تزود أسعار المحروقات كنت خفضت مرتبات الوزراء والمسئولين الكبار في الدولة...
● إفيه حلو وجميل وليه زبونه .. وعشان كده بيترمي بغزارة على السوشيال ميديا في أي مناسبة فيها اقتصاد وفلوس ، مع انك لو دورت وراه هتلاقيه بلح بكل معنى الكلمة ومايساويش الوقت اللي هتضيعه في قرايته ..
قولتلي ليه ؟
أقولك
تعال نحسبها بالورقة والقلم ... ولغة الأرقام ما بتكدبش
● احنا عندنا كام وزير..؟ هما 33 وزارة .. يعني 33 وزير.. قول برئيس الوزراء يبقوا 35
● وضيف عليهم عليهم المحافظين كمان باعتبار المحافظ على درجة وزير ..يعني عندك كمان 27 وزير .. قول 30 .. يعني مجموع الاتنين ( الوزراء والمحافظين) يساوي 65
● طيب الوزير بياخد كام ؟ .. 32 ألف جنيه شهريا .. قول 35 ألف وانشالله ماحد حوش
● طيب حضرتك كبنئ آدم طبقي أصيل ودماغك بقالها سنين طويلة معمولة مبولة للشعارات اليسارجية الفشيخة ، شايف مرتب الوزير العادل يكون كام ؟
نقول 10 آلاف جنيه مثلا ؟
● يعني هنخفض من كل وزير ومحافظ 25 ألف جنيه شهريا.. × 65 يبقى الوفر الشهري عندنا يساوي واحد مليون و 625 ألف جنيه ..
● ولما نضرب الرقم ده في 12 شهر يطلع المجموع على بعضه 1.625000× 12 = 19 مليون جنيه ونصف ..
● يعني كل الزيطة دي على 19 مليون جنيه وكسور .. قول 20 مليون يا سيدي
● انت متخيل الرقم ده (20 مليون جنيه) تطلع كام نسبته في موازنة الدولة ؟ دا ولا حاجة تقريبا ( احنا بنتكلم في أكتر من تريليون جنيه ، يعني ألف ملياااااااار جنيه ، يعني ألف ألف مليون جنيه )
● بلاش الموازنة العامة عشان دي كبيرة شويتين .. خلينا في الوفر اللي تحقق من الرفع الجزئي لدعم المحروقات ... احنا بنتكلم في خمسين مليااااااااار جنيه سنويا.. يعني خمسين ألف مليون جنيه ..
● قولتلي بقا الـ 20 مليون جنيه وفورات من مرتبات الوزرا والمحافظين اللي حارقك أوي تطلع نسبته كام من المبلغ ده ؟ 20 مليون÷ 50000 ألف مليون ×100 =0.04%
يعني كل الزيطة دي على أقل من نصف في المية .. يعني صفر تقريبا
● طيب بلاش دا كله .. إيه رأيك نشغل الوزرا والمحافظين ببلاش ..يعني ما نديهومش مرتبات من أصله .. نشغلهم بالسخرة يعني .. يا ترى ساعتها هنوفر كام ؟
● احسبها انت بنفس الطريقة .. 35 ألف جنيه مرتب × 65 وزير×12شهر = 27 مليون و300 ألف جنيه .. قول 30 مليون جنيه سنويا .. وده يساوي 0.06% من قيمة دعم المحروقات ... يعني برضه ولا حاجة
● عارف الموقف ده يشبه إيه ؟ كأنك مزنوق عشان عايز تشتري عربية جديدة تمنها 300 ألف جنيه مثلا وابنك بيقولك هات 5 جنيه اشتري كيس شيبسي فتقوله معلهش يا بني ..أصل انا عايز أحوش تمن العربية الجديدة .. وكأن الخمسة جنيه دي هي اللي هتفرق معاك وهتخليك تقدر تشتري العربية
● وكل الهبل ده بيترميلك في ظل انك في موقف عايز تجتذب الكفاءات الإدارية الناجحة لإدارة الدولة .. والكفاءات دي بتقبض بالدولار واليورو مئات الألاف شهريا في التوكيلات والبنوك والشركات الخاصة (ومش هقولك بره مصر.. لأ.. جوه مصر).
● فكرة انك تجيب واحد كان دخله الشهري بيعدي النص مليون مستريح وعايز تديله 10 آلاف واللا 20 واللا حتى 30 ألف جنيه مع إنك بتطلب منه كل يوم انه يتشتم وينتهك عرضه على الهواء مباشرة وعلى صفحات الجرائد والسوشيال ميديا ، وكمان يبقي معرض للسجن في أي لحظة.. ده عرض ما يقبلوش غير يا مجنون يا فاسد !
تحب مين فيهم يمسك مسئول ؟!
● وعلى فكرة انا لا وزير ولا عايز أبقى وزير ولا عندي حد من قرايبي وزير ..بس الحكاية بالعقل وبالورقة والقلم وبحساب الأرقام اللي مش بتكدب أبدا