هـــــااـااااام : حروب الشائعات ..ااا
===================
* في أعقاب نكسة 1967 وبينما الدولة كلها تعاني من حالة عدم اتزان ، مش عارفين انتصرنا واللا انهزمنا واللا ايه بالضبط ، طلعت اشاعة ان رجال المخابرات العامة ذهبوا الى حضانات ومدارس الأطفال لسحب كميات من الدماء من بطون التلاميذ لصالح المجهود الحربي !!!
* بالطبع الاشاعة كانت كفيلة باثارة ذعر أولياء أمور الأطفال وخاصة الأمهات .. ولك ان تتخيل شكل النسوة راكضات في الشوارع خوفا علي أطفالهن !
نموذج للكذبة المصممة بعناية فائقة
* سحب الدماء من البطن فعل شديد البشاعة، وكونهم أطفال كفيل بتحطيم القلوب ، وان رجال المخابرات هم من يفعلون هذا ، فهو يفقد الناس الثقة في أي جهاز رسمي حكومي - والمفارقة ان جهاز المخابرات كان الهيئة الوحيدة في الوقت ده اللي أتمت عملها على أكمل وجه قبل وأثناء النكسة ! - وربما لهذا استهدفوهم بالاشاعة
* مع ان أي تفكير منطقي بسيط يجعلك تكتشف ببساطة انها كذبة لا أصل لها ، فلا الأطفال صالحون للتبرع بالدم ، ولا البطون هي مكان سحب الدماء من الجسم ، ولا رجال المخابرات هم الهيئة المنوط بها جمع الدماء ، ولا هم يعرفون أصلا كيفية إنجاز تلك العملية الطبية !!
.
* أحد قواعد المعرفة ان الانسان يميل لتصديق أول ما يقرأ أو يعرف
يعني لو فيه موضوع انت ماتعرفش عنه حاجة وبدأت تقرا عنه ، فغالبا ما سيترسخ في ذهنك الى الأبد هو أول ما قرأته وإطلعت عليه
*الموضوع ده يشبه لحد ما مقولة (هذا ما وجدنا عليه ابائنا)... فما وجدوا عليه آبائهم كان أول اطلاع ومعرفة في حياتهم فرفضوا ان يغيروا قناعتهم الراسخة
*أحد أوجه التطبيق للموضوع ده لما مرسي وجماعته أعلنوا انهم فازوا في الانتخابات في مؤتمر بعد نص الليل واستبقوا الجميع في هذا الاعلان... ده كان تطبيق لقاعدة (الانسان يميل لتصديق أول ما يقرأ أو يعرف)
* الموضوع اخد وتيرة عالية بعد كده وتزداد يوميا... كمية الاخبار المفبركة والمكذوبة والروايات الخيالية اللي بتتنسج كل دقيقة الآن ماهي إلا تطبيق لنفس القاعدة
** لازم نستبق الداخلية في قصة جثث أطفال المريوطية وننسج قصة خيالية عن تجارة الأعضاء، مع ان نقل وزراعة الأعضاء موضوع طبي غاية في التعقيد والدقة والصعوبة والتكلفة والوقت، فلما بعد كده تخرج نتائج تحريات المباحث الرسمية اللي هي لازم تتأخر عن سرعة إطلاق الشائعة بحكم انها بتكون مبنية على تحقيقات وأدلة مادية وعلمية وجهود فرق كاملة من الخبراء في البحث الجنائي والطب الشرعي ، فمن الطبيعي انها ستجد صعوبة في إزالة آثار وأوهام قصة تجارة الاعضاء الخيالية من الأذهان ، فقط لأنها اول رواية قيلت ومش لأنها الرواية الأدق أو الأصدق
*مع ان أول رواية صاحبها ألفها من وراء كيبورد ، أما الداخلية فاشتغلت على الأرض بالتعاون مع الطب الشرعي وشهود العيان وتحريات واعترافات للمتهمين... لكن مطلوب مني اني أكذب كل هذا الجهد وأصدق هبد حضرتك على كيبوردك !
.
** النيابة بتحقق مع متهمين بنفجير كنيسة ، وتحريات واعترافات وأوراق وأحراز وتحريات أمن دولة، وحكم بالاعدام علي المجرمين... ولكن تم استباق الحكم برواية عن الزوجين الكيوت المسالمين ، وان كل ده محض تلفيق من الأجهزة الأمنية ...
* احنا بنُستنزف وبنضيع وقتنا ومجهودنا فقط لشرح بديهيات.
** مستحيل تماما أن تضيع ودائعك البنكية... مستحيل قولا واحداً ، لأن فلوسك مضمونة من البنك المركزي... بس لازم نستبق بيان البنك بقصة هلامية عن استيلاء موظف علي 180 مليون فأصبحت حقيقة راسخة في النفوس
(هذا ما وجدنا عليه آبائنا)
* صعوبة القاعدة دي تكمن في أن المراجعة والتراجع عن الرأي الخطأ هو أصعب الأشياء على النفس البشرية.. احسب انت كده مثلا كام مرة قلت للناس أو حتى بينك وبين نفسك معلهش انا أخطأت وبأتراجع عن رأيي ؟! .. غالبا مش هتلاقي .. ولو حصل يبقى على استحياء ، ولو لقيت في مشوار حياتك حدث جلل، تراجعت عنه ببساطة لانك كنت حاسب غلط فأنت تملك شجاعة استثنائية وغير عادية في العصر ده !
.
* هتلاقي كلام كتير عن رز بلاستيك و فيتامينات على العيش وبيض مطاطي، وطائرات بتفتح بابها وهي في الجو وأخرى تقع في المطار، وتماسيح في المنصورة ، وسلاحف عملاقة بتتمشى في شوارع مدينة نصر ، وجفاف النيل في وسط البلد... جدوى مشروع القناة واختصاره في ازدواج المجرى الملاحي... محدش مثلا هيصدق ان عندك مفاعل نووي في أنشاص شغال بكفاءة وأمان من الستينات ، لأنهم استبقوا انشاء المفاعل الجديد بموجات عاتية من الألش والتريقة عن عم متولي اللي نسي المفاعل شغال وروح ، أو عن عم سيد غفير المفاعل اللي بيعمر حجر الجوزة بتاعته باليورانيوم ، أو عن مدام عفاف اللي بتخرط الملوخية فوق جسم المفاعل ، بما يعني اننا فاشلين وغير مؤهلين لادارته
وغيره !
* هتلاحظ برضه ان الهري ده كله بيعوم في اتجاه واحد... انه يرسخ في ذهنك انطباع مستديم بضعف الدولة وانهيار مؤسساتها وزعزعة ثقتك فيها ، وده كله مقدمة لهدمها !
* أراهنك انك تقدر من الذاكرة كده تفتكراحنا كنا بنهري فـ إيه الشهر اللي فات ،، بس خلاص الانطباع ترسخ في ذهنك... وهو ده المطلوب بالضبط والهدف النهائي للحرب النفسية اللي بتشن علينا بضراوة من سنوات طويلة
* الحرب النفسية والاشاعات وأثرها في المجتمعات وكيفية صياغتها ومنابر اطلاقها، كل ده مش مجرد حاجات بتحصل صدفة بمجهودات عفوية ... الشائعات دي عِلم واستراتيجية ومنظومة إهلاك مش مجرد هري فاضي ولا سخرية... دا عمل مخابراتي معقد
.
* فيه نظرية علمية بتقول انك ممكن تفتت صخرة صلدة كبيرة بقطرات الماء اللي بتنزل على نقطة محددة فيها لمدة زمنية معينة .. وده اللي بيحصل دلوقت.. هما قرروا يهزمونا بالنقاط زي ما قال ممدوح حمزة .. هما عايزين يفتتوا الكتلة الصلبة الداعمة للدولة بطوفان الاشاعات مهما بدت انها اشاعات ساذجة وعبيطة
* الاشاعات دي هي قطرات الماء... كل اشاعة من دول هي في حد ذاتها قطرة مياه تافهة ولكن تتالي نزول القطرات قادر على تفتيت الحجر... وسائط التواصل والحسابات الحقيقية أو الوهمية ايضا كقطرات مياة تافهة لو نظرنا لكل حساب على حدة ، ولكن تجمع كل هذه القطرات يشكل طوفان هائل من التفاهة والاسفاف والتخلف العقلي .. وزي ما احنا شايفين اليوم بقينا مضطرين نجادل في بديهيات ومستحيلات .. وصلنا اليوم لدرجة ان فيه ناس متعلمين ومسئولين ومثقفين يصدقوا كلام مستحيل زي البالونة اللي لقيوها في رغيف العيش ! أو الطيارة اللي فتحت بابها في الجو !!
.
* على مدار أكتر من 4 سنوات ، أغلب ما يتم نشره هنا على هذه الصفحة المتوضعة بيتكلم عن الجزئية دي بعينها... الحرب النفسية والاشاعات... الموضوع مزعج فعلا ومدمر... ويمكن للراصد المدقق أن يكتشف بوضوح حجم التدليس والكذب والفجر في الخصومة في كل ما يتم اطلاقه من اشاعات...
.
* المذهل ان الوقاية من الشائعات والحد من أثرها موجود في وصفة تبلغ من العمر 14 قرنا من الزمان (ان جائكم فاسق بنبأ فتبينوا) ! ومعها وصفة نبوية أخرى شديدة البساطة (كفي بالمرء كذبا ان يحدث بكل ما سمع) !
ايه ده ؟؟ المسألة بهذه البساطة ؟؟
أينعم يا فندم ... لو فقط بذلت جهدا قليلا في التأكد من المعلومة قبل نشرها، فاذا لم تصل لاصل امتنعت عن تكرار الكلام تكون قد أسديت خدمة عظيمة لوطنك
* وزي كل مرة أذكر نفسي واياكم... علي الرغم من عنف وصعوبة وضراوة المعركة ، إلا ان الحل بسيط وعتيق...الحل ضارب في القدم من اكتر من 14 قرن من الزمن .. (فتبينوا)
فيه كلمة ابسط من كده ؟!
فيه تكليف أسهل وأوضح من كده ؟!
* مش كل ما واحد ينعق بكلمة تنعق انت كمان وراه ! لو سكت شوية محدش هيشاور عليك ويقول اللي ما اتكلمش أهو ! دور على أصل الموضوع وبعدين ابقى قول رأيك فيه... ولو لم تبدي رأيك أصلا فمش مهم على الاطلاق ... انت مش نبي هذا الزمان علشان يكون لك في كل مسألة رأي !
أبسطهالك اكتر ؟!
(كفي بالمرء كذبا أن يحدث بكل ما سمع)
أبسط من كده ايه يعني ؟!
* وافتكر دايما ان الاشاعة يؤلفها (الحاقد) ، وينشرها (الأحمق) ، ويصدقها (الغبي)
فحاول ألا تكون واحدا من هؤلاء الثلاثة
موضوع: هـــــااـااااام : حروب الشائعات ..ااا 
الأربعاء يوليو 25, 2018 7:23 am
