عبير زهير
دكتور الفيزياء
- مستعد يابني للشفوي ؟ 
= ان شاء لله يادكتور
- جاهز للسؤال الاول ؟
= جاهز يادكتور
- امك
= افندم !
- يابنى اصبر عليا ، امك عايشه ؟
= اه الحمد لله . بس ده ايه علاقته بالفيزيا حضرتك ؟
- يابني صبرك بس . تقدر تقوللى ايه احسن اكله امك طبختهالكو قبل كده ؟
= ده ليه علاقة بالامتحان برضه؟
- لاء طبعا داحنا بندردش
= لاء بقى لو بندردش بقى يادكتور ، فخد عندك ، فضلة خيرك مرة كان ابويا راجع من الكويت وامي بقى قامت عاملالنا عزومة فشيخه .
- ايوه كانت ايه بقى العزومة الفشيخة دى؟
= رز وبطاطس محمره وديك رومي كبير . وسلطات بقى وليلة كبيرة اوى
- الله . جميل اوى الاكل ده
= كانت ناقصاك والله يادكتور
- معلشى . نيجى بقى للامتحان . قولى بقى البوتجاز بتاع امك اللى طبخت عليه الحاجات دى . بيشتغل بايه ؟
= بالغاز طبعا
- ايوه ايه بقى نوع الغاز ده .
= غاز بوتجاز .
- يعنى مش غاز طبيعي؟
= لاء غاز بوتجاز . انبوبة حضرتك
- اسمه العلمى ايه الغاز ده
= اسمه . اسمه . اه اسمه بيوتان
- الله ينور عليك . تقدر تقولى بقى ايه هو المحتوى الحرارى لكل واحد متر مكعب من الغاز ده
= امممممم . المحتوى الحرارى . المحتوى الحرارى . ده له علاقة بالفيزيا يادكتور؟
- طبعا يابني .ولو مش عارف قول مش عارف . الاسئله لسه كتير . لسه فى رز وبطاطس وديك رومى وسلطات .
= بصراحه مش عارف
- اوك مافيش مشكله .. صفر فى السؤال الاول. ..نيجى بقى للاكل اللى امك عملته
= ايوة بس ده اتاكل حضرتك
- معلشى اعتبره لسه متاكلش . اولا بالنسبه للرز ياترى درجة حرارة الماء اللى كان بيغلي فوق سطح الرز اثناء الطهي كان كام درجه بالمقياس المئوى .؟
= 100 درجه
- وكام بالفهرنهايت
= 212
- برافو عليك . . كده جاوبت 1 من 2 يعنى تعتبر ناجح لحد دلوقتى . نيجى للسؤال للى بعده . انت قولتلى كان رز وايه معاه ؟
= هو كان رز بس يادكتور
- لاء كان فى بطاطس محمره . ماتكدبش
= اه اه . صح يادكتور صح .
- قولى بقى بالنسبة للبطاطس المحمره كانت صوابع ولا شيبسى ؟
= هى كانت صوابع . لاء شيبسى . بص هى كانت صوابع . اه خلاص صوابع .
- كلام نهائى ؟
= اه صوابع
- طيب ماعلينا من صوابع او شيبسى عشان هى مش هتفرق فى السؤال بصراحة . المهم بقى الزيت اللى امك قلت بيه البطاطس....
= مش فاكر نوعه
- يابنى انا لسه مسألتش . هعمل ايه انا بنوع الزيت . . انا اقصد . الزيت لما بيتحط ع النار قبل ما تقلي البطاطس لو امك اتاخرت عليه . بيحصله ايه ؟
= بيتحرق
- الله يفتح عليك وقبل ما يتحرق
= بيدخن
- تمام . قوللى بقى . ايه هى العلاقة بين شدة احتراق الغاز فى عين البوتجاز . وسرعة تصاعد بخار الزيت فى الهوا .؟. ولو مش عارف قول مش عارف
= اممممم . بصراحه مش عارف .
- طيب يامحمد . انت كده جاوبت سؤال من 3 يعنى سقطت . اتفضل مع السلامه
= لاء يادكتور لسه فى سؤال
- سؤال ايه يابنى ,, انت مش قولت رز وبطاطس بس
= لاء لسه فى ديك رومي حضرتك
- اه والله يابنى صحيح .. ده لسه فى ديك رومى ..طب قولى . ايه هى سرعة صوت الديك الرومى فى الفراغ
= حوالي 343 متر فى الثانية
- متأكد ؟
= ايوه زى سرعة صوت اى كائن تاني
- متاكد ؟
= جدا يادكتور . وكده انا انجح
- لاء تسقط يامحمد .
= ليه بس يادكتور؟!!
- عشان الصوت مابيتنقلش فى الفراغ يامحمد . اللى انت قولتها دى سرعة الصوت فى الهوا . معلشى يامحمد . كده 1 من 4 يعنى ساقط برضه . ها تحب نخش ع السلطات ؟
= لاء مالوش لزوم بقى يادكتور اصل حتى لو جاوبتها برضه ساقط هيبقوا 2 من 5 . . يلا سلامو عليكم
.
- مع السلامه يامحمد ..اللى بعده . اسمك ايه يابنى
= محمود على ابراهيم
تمام . قوللي يامحمود . ، امك
= ماتت
ياحرام الله يرحمها . طب فاكر قبل ما تموت . ايه اخر طبخه طبختهالكو
= كانت عيانه ومابتطبخش
- طب فاكر اى طبخه طبختهالكو فى حياتها ؟
= مكانتش بتعرف تطبخ . عمرها ما طبخت . وابويا كان مطلقها اساسا
- لا حول ولا قوة الا بالله . شكلك كده هتنجح بالرأفه عشان حالتك دى ، فاكر يوم جنازتها يابنى ؟
= طبعا يادكتور ودى حاجه تتنسي
- شلت النعش مع الناس يامحمود ؟
= طبعا يادكتور
- راجل يابنى والله . قوللى مشيتو كتير ولا خدتوا عربيه ؟
= خدنا عربية وبرضه مشينا
- تمام كان فى ستات بيصوتوا ؟
= طبعا . ده عمتى خربتها
- وانت عيطت يوميها ؟
= اكيد يادكتور ودى عايزه كلام
- تمام .. كده يبقى معانا 4 أسئلة .
= اسئلة ايه دى يادكتور!! .
- اولا رد فعل الحمل على كتفك يساوي كام من وزن والدتك لما شلت مع الناس النعش
وثانيا
ايه هى العلاقه بين معدل احتراق البنزين فى العربية اللى نقلتوها بيها وبين سرعة وصولكم لمكان الدفن . واكتب معادلات السرعة .
وثالثا ايه هو المدى السمعي للصوت المسموع فى الصويت والصراخ والعويل . اللى بيقترب من حدود الموجات الفوق صوتيه . الالترا سونيك يعنى .، وامتى نقول ان الصويت ده سونيك او سوبر سونيك او الترا سونيك .
والسؤال الاخير . . بالنسبة للبكاء . ايه هى سرعة سقوط الدموع من العين فى اتجاه عجلة الجاذبية الارضيه وما مدى تأثير الضغط الجوى على تكون الدمعة فى شكل كروى يشبه الفقاعه ؟
جاهز تجاوب ع الاسئلة دى يامحمود . ولا اعتبرك ساقط وخلاص ؟
= طبختلنا اول امبارح ملوخيه وفراخ وجابت عيش بلدى م الفرن وباتنين جنيه مخلل .
- ايوه كده اظبط يانصاب ، اقعد بقى عشان نبدأ الامتحان . #منقوووووول
موضوع: دكتور الفيزياء ظريفة ومسلية 
الإثنين نوفمبر 19, 2018 4:55 pm
