انور شحتو
********
في فرق كبير أوي بين حب الراجل وحب الست في الطريقة والتعامل وخصوصا لما الحب بيوصل لدرجة بنسميها شغف العشق ... ودي الصدام فيها بين الطرفين بيكون عنيف جدا ..
الراجل مشكلته أنه طالما قال واعترف بحبه وعشقة يبقي مفيش هزار فيها وحتة ان الست اللي معاه تفضل تشكك في النقطة دي بتوتره بالرغم ان تشكيكها بيكون رسالة منها ليه مضمونها وحشني أهتمامك .. وحشني وجودك ...
أما الست لما بتوصل لدرجة العشق فبتحب بطريقتين ...
الأولي كصديقة .. بتفهم وضعك واحتياجاتك وانشغالاتك وتسمع منك للأخر وحت لو بعدت عنها شوية بتعذرك ..
والتانية كحبيبة .. دايما مخنوقة وزعلانة وتعبانة وغيرتها بشعة وبتحقد عليك جدا ...
طب حد فكر ايه السبب في اللخبطة دي ؟؟!! ازاي فاهمة و بتحقد عليك .. منين بتعذر ومنين بتتخانق ...
الرد في كلمة واحدة بس هي الأمان ...
حبك ليها وعشقك هو البيت اللي قدرت تبنيه وتعبت في تأسيسه وعارفه كل ركن فيه لكن سكوتك بيكون مشكلة ... بيحسسها بالقلق وأن البيت في خطر وممكن ينهار .. وعلشان هي كمان بتعشقك فطبيعي انها تتوتر جدا ويحصل جواها صراع نفسي رهيب ياتري بيحبني لسه .. طب هو ساكت ليه .. زهق مني .... بيحب غيري ... وطبعا مع طول سكوت الراجل بيبتدي صراعها الداخلي يطلع في صورة اسأله ....
والمشكلة دي بتكون أكبر في العلاقات اللي بيكون فيها بعد مسافات أو راجل شغله بيخليه مشغول كتير ...
الراجل بيكون واثق من اللي بيحبها وهي مهما كانت واثقة .. سكوتك هيوترها وهيحسسها ان في حاجة غلط ..
المشكلة الاكبر اللي كل راجل مش بياخد باله منها هي انه في البدايه ضمها وقدم لها حاجات كتير اوي علشان يدخل قلبها ويبين درجة عشقه وحبه ... والحاجات اللي بيعملها في الفترة دي بتتسجل في عقل الواحدة ... بتحس ان مفيش راجل علي الارض جواه الحب ده ... وبتحس انها ملكة متوجة وبتفرح جدا ...
هنا الفرق بين الراجل والست بيسبب مشكله كبيرة ... الراجل حس بالامان فابتدي ياخد باله من حياته العملية علشان يكمل .. لكن الست بتحس بتوتر و بتحتاج لاثباتات متواصله علشان تشبع احساسها بالامان ... فطبيعي جدا تلاقيها مرة واحده عصبيه ومش مفهومه وبتتخانق معاك ...
وطبعا لانه بيحبها فعلا فبيستغرب ردود افعالها ويبتدي يضايق ويسأل نفسه انا قصرت في ايه .. وانا مبقتش عاجبها .... رغم ان الحل بسيط جدا وللأسف أغلبنا كرجاله مش واخدين بالنا منه ...
لما تلاقيها كدا ابتسم في وشها ... ضمها وطبطب عليها ... شبع احساسها بالامان .هديه... رساله حلوة ...
لو طبيعة شغلك صعبه فهمها ... وضحلها .. اياك تبطل اللي بتعمله فتره طويله لانها بتسال نفسها مرة واحده ازاي من كام يوم كان بيقولي بحبك وبيقرب ودلوقتي ساكت ومش بيسال عني ... الست بتفضل تفكر في مستقبلها معاك حتى لو متجوزين ومعاكم اطفال ... الاحساس ده طبيعي فيها من اول ما قلبها ينبض بالحب لحد ما يتوقف عن الحياة ...
والأهم من ده كله إياكم والصمت .. اياكم وكلمه اسيبه لما يحس بيا ... مهما كانت العلاقة في البداية او مخطوبين او متجوزين ... مهما كانت ... خلوا الوضوح و الصراحة والمواجهة والعتاب أول بأول لأن الطرف التاني انسان زيك مش ساحر ومطلوب منه يفهم لوحده ...
منقول
#كلام_اخر_الليل