من قبل Mohammed Haffz.
.................................
من الأرشيف... في مايو 2011 وبعد 3 شهور فقط على أحداث يناير :
- الجيش يحذر من نفاذ احتياطي النقد الأجنبي بمصر خلال 6 أشهر
- المجلس العسكري : تدفق الاستثمار الأجنبي على مصر = صفر
.
قرارات امبارح ليها اصل وجذور كتيرة
جزء من جذورها الأخبار دي اللي في الصور
بس الناس بتنسي بسرعة
معلهش،، أحنا نسينا
نسينا الكهرباء اللي كانت بتقطع 12 ساعة كل يوم وكنا بنصوت من فواتيرها
نسينا طوابير العيش الغير آدمي أبو مسامير اللي كانت الناس بتدبح بعضها فيها
نسينا أيام أزمة البنزين وأزمة البوتاجاز لما كنا بنقول وفورولنا اللتر ولو حتى بعشرة جنيه بس يبقي متوفر وكنا بنجيب الأنبوبة بخمسين جنيه بالواسطة وبعد شحططة
نسينا العشوائيات ومرضي فيروس سي اللي كانوا بيموتوا كل يوم بالآلاف .
نسينا لما كنا نخاف نودي ولادنا مدارسهم و جامعاتهم
نسينا لما كنا بنخاف لما كان ننزل الشارع وكانت أقصى فسحة للواحد فينا من المطبخ للصالون
نسينا المدن الجديدة اللي مكانش حد عارف يروحها بسبب ان مفيش طرق توصل لها
نسينا الطوب و المولوتوف و ريحة الدم والخراب في الشوارع
هو مين ساذج كان متخيل أن الفوضي والتخريب وتعطيل الاقتصاد والاضطرابات المصاحبة للثورة .... هتمر بدون دفع تمن وتمن غالي جدا ؟!!
ومين مختل جاهل يتجرأ يقول ان الثورة ملهاش تبعات كارثية على الاقتصاد؟!!
الثورة ليها تكلفة لازم نتحملها ونتحمل مسئولية أفعالنا وتبعاتها
بس سيبك انت من الكلام التافه ده ، بلا اقتصاد بلا احتياطي بلا استثمارات بلا أسعار وتضخم وحياة شعب بأكمله مهددة ومستقبله في خطر...
كل دي كانت تفاهات طبعا في فترة الثورة ومبررات من الثورة المضادة لإجهاض ثورة يناير ... الخ من الكلام التافه الغبي
ومحدش كان حاسس بخطورة الموقف وآثاره المستقبلية المؤلمة ، وكنا شغالين تريقة على أي صوت عاقل بيحذر
ولما كنا بنقول كفايه بقى وسيبوا الناس تشتغل ، كانوا بيقولولنا.. ده تمن الحرية والخلاص من النظام الفاسد
.
احنا بنعيد ترميم وبناء اقتصاد بالكامل
اقتصاد حرفياً تم تدميره وتسويته بالأرض على أيدي أبنائه
اقتصاد اصلا كان ضعيف وهش رغم تحقيقه أرقام جيدة في قطاعات معينة قبل يناير 2011
إلا انه ع الناحية التانية ملئ بالعيوب والتشوهات والخلل بسبب تجاهل القيام بالإصلاحات الضرورية بالتدريج
وتهالك البنية التحتية وتربية المجتمع على قيم وأفكار اقتصادية خاطئة والاستهتار بمشكلة النمو السكاني وقضية الفساد... الخ
وكلنا للأسف هندفع التمن حتى لو انت لم تشارك في الثورة أو غير مقتنع بيها
وانا هنا مش بطعن في الثورة
لكن بفكر الكل بما ارتكبته أيديهم
وانهم لازم يتحملوا مسئولية قراراتهم وتصرفاتهم وافكارهم المراهقة والساذجة
.
ليه محسيناش بالآثار الكارثية دي غير دلوقتي؟
لأن الـ 9 حكومات اللي تولت المسئولية بعد يناير لم تتجرأ على علاج الخلل وتحميل الشعب المسئولية
وإنما اعتمدت كالعادة على ترحيل المشاكل خوفا من غضب الناس في وقت كان الشارع مشتعل وكل جمعة فيه مليونية وكل يوم اعتصامات
العكس هو الصحيح
الحكومات دي عينت مئات الآلاف في الجهاز الحكومي
قد يصلوا لمليون موظف إضافي
ودعمت الجنيه أمام الدولار
ولم تقترب من الدعم
وارتفع الاستيراد بدرجة مخيفة
واستمرت في الاستدانة بدون خطة لتخفيض الدين العام
وتدهور تصنيفنا الائتماني وترتيبنا في معظم المؤشرات الدولية
وعاشت الناس بنفس أسعار ومعدل تضخم ما قبل الثورة
.
كأن مصر لسه بتستقبل 15 مليون سائح
و13 مليار دولار استثمارات أجنبية
و7% نمو سنوي
وعجز موازنة تحت السيطرة
و36 مليار دولار احتياطي النقد الأجنبي
(ماسبق هي أرقام عن سنة 2010)
.
عشنا حياتنا ما بين 2011 - 2014 و كأن ثورةً لم تقم ، وكأن الاقتصاد مستقر
لكنه في الحقيقة كان بينزف وبيتدمر
كل ده بهدف تهدئة الناس وخوفا منهم
وبالتالي كل قدرات اقتصادنا على التحمل تم استنزافها في سنوات الاضطرابات من 2011 لـ 2014
لحد ما وصلنا لأول تجرؤ حكومي على خفض الدعم في 2014 وبدأنا الإصلاحات اخيرا وتحميل الناس مسئولية أفعالهم بجانب الحكومة لإنقاذ مستقبل البلد دي من الضياع بسبب شوية هواة أغبياء جهلة
.
من حقنا نعترض ونقول أن الأسعار أصبحت لا تطاق
كلنا موجوعين ومكويين بنار الأسعار
وبالتأكيد الحكومة الحالية ليها أخطاء
خاصة خطأ عدم تسويق قراراتها وفشل الإعلام الذريع الحكومي والخاص في الوصول للناس وشرح أسباب اللي احنا فيه
وده كان جزء من شروط نجاح الإصلاحات اللي قالهالنا د. محمد العريان الخبير الاقتصادي العالمي
حتى لو قراراتها الاقتصادية علمياً صائبة وضرورية ولا تحتمل التأجيل
.
دي الرؤية العلمية الكاملة والموضوعية لفترة ما بعد يناير 2011 بكل تغيراتها وآثارها وتبعاتها وعلاقتها الجوهرية والمباشرة بقرارات امبارح
.
--------------------------
By: Mohamed Negm