Mohammed Haffz
......................
نتائج الجولة الثانية من انتخابات اليونسكو.. السبوبة تحكم :
================================
مرشح قطر "الكواري" : 20 صوت - يعني زاد صوت عن الجولة الأولى
مرشحة فرنسا "أودريه أزولاى": 13 صوت - نفس عدد أصوات الجولة الأولى
مرشحة مصر "مشيرة خطاب": 12صوت - زادت صوت واحد عن الجولة الأولى
مرشح فيتنام "فام سان شاو" : 5 أصوات
مرشح الصين "كيان تانج" : 5 أصوات
مرشحة لبنان "فيرا خورى لاكويه": 3 أصوات - أقل من الجولة الأولى بثلاثة أصوات
جدير بالذكر أن الفائز يحتاج للحصول على 30 صوتا من بين الدول الأعضاء بالمجلس التنفيذى للمنظمة الدولية والبالغ عددهم 58 دولة ، ومن المقرر عقد الجولة الثالثة من الانتخابات مساء غد، الأربعاء، خاصة أنه من الصعب أن يحصل أى من المرشحين على عدد الأصوات المطلوبة للفوز وهى 30 صوتا، فى ظل تعدد المرشحين وتفتت الأصوات.
.
تعالى بقى قولي إيه علاقة خيمة إرهابية بنت امبارح بمنظمة التربية و العلم و الثقافة ؟ ايه علاقتها بالتربية ؟ بالعلم ؟ بالثقافة ؟ .. علاقتها بالظبط زي علاقة ستي الله يرحمها بنظرية النسبية لأينشتاين ، بس الفلوس تبني في البحر طريق
.
مجلة جون أفريك الفرنسية تحدثت بالأمس عن زكايب الأموال اللي تم شحنها من الدوحة لعواصم عدد من الدول لشراء أصواتها ، وعن السادة المرتشين من مندوبي اليمن والجزائر والسلفادور وجزر مورشيوس وماليزيا ونيبال والكاميرون وتوجو وكينيا و السنغال وبنجلاديش اللي زاروا قطر الأسبوع الماضي وتلقوا هدايا وساعات ثمينة ، وأخرها كان العشاء الفاخر اللي طفحوه في مطعم (لاتيراس) الفخم الذي يبعد خطوات عن مقر اليونسكو بباريس قبل جلسة التصويت بساعات قليلة
.
كلام المجلة الفرنسية ده ونتائج انتخابات اليونسكو اللي بنشوفها بيأكدوا الكلام اللي قولناه هنا كتير.
.
كل المنظمات و الكيانات و الحبشتكانات العالمية اللي بنشوفها ونسمع عنها دي فستك.. يعني بلح ، من أول الأمم المتحدة و مجلس الأمن و انت نازل... حتى الجرايد و القنوات العالمية و مراكز حقوق الإنسان و الجامعات اللامؤاخذة العريقة .. كله بلح .. كله قابل للتسييس .. كله قابل للرشوة ... كله بيتباع و يتشري إما بالعصاية ( الدول العظمى ) أو بالجزرة ( الدول اللي طفح فيها البترول ) أو بكلاهما معا .
.
قطر دفعت مليارات الدولارات رشاوي عشان تفوز بتنظيم كاس العالم .. و احتمال كبير تتفضح و يتسحب منها حق التنظيم ، بس المعنى إن الإتحاد الدولي لكرة القدم - اللي هو الفيفا - برضه بلح .. أعضاؤه قابلين للرشوة عادي ... بلا فخامة الإسم بلا فخامة البتنجان ، يابني ماتبقاش داقق عصافير على دراعك و تمشي في الدنيا اللي رايح واللي جاي يركبك و يسرح بيك .
.
الأمم المتحدة هتلاقي في أدراجها شخروميت ألف إدانة للكيان الصهيوني ... ورق بيلمع ومتستف و زي الفل ، وابقى سلّم لي على أممك المتحدة ياسماعيل بيه .
.
جامعة هارفارد بجلالة قدرها اكتشفت فجأة مواهب أسطورية خارقة في واد صايع اسمه نادر بكار كان أخره يشتغل كاشير في التوحيد و النور ، و اكتشفت برضه مواهب عظيمة في كام خروف من خرفان الجماعة اللي بيفكّوا الخط بالعافية .. جامعة عريقة بقى وكدهون
.
طب فين المصداقية و الشفافية و القيم و المبادئ للمؤسسات العريقة ؟ ابقى تعال بكره الصبح بدري و هات معاك 4 سلطانيات .. سلطانية تاخد فيها مصداقية ، و سلطانية شفافية ، و سلطانية للقيم ، و واحدة للمبادئ ...بس ابقى هات حد يشيل معاك بدل ما تدلدق في الشارع و انت ماشي .
.
مصر بقى على المستوى الرسمي مضطرة تتعامل مع الكيانات و المؤسسات دي اللي هي بتتحول وقت الجد لـ ( بيوت دعارة ) .. بنضطر نتعامل عشان دي طبيعة السياسة الدولية و الدبلوماسية .. بتضطر تتعامل لأن كوكب الأرض البائس مفهوش منظمات بديلة تكون أكتر ( نضافة ) .. دي البضاعه اللي موجودة و انت مضطر للتعامل معاها ، و بتتعامل بشرف مع إنك بتبقى عارف انك واقف في بيت دعارة عالمي .
.
شخصيا و بصفتي مواطن مصري مش دبلوماسي ولا حاجة ، بس مواطن من أرض عمرها 10 ألاف سنة ، من أرض الفراعنة و العلم و التحنيط و الأهرامات و الحضارة والطب و الفلك و الكيميا ... يعني من مهد التربية و العلم و الثقافة ( اللي اختصارها اليونسكو ) ... شخصيا بتمنى إنسحاب مشيرة خطاب بس بشرط .. قبل ماتنسحب تجيب 3 حاجات و تحطهم عالترابيزة قدام رئيس المنظمة الحالي ..نموذج مصغر لقنبلة ، و هيكل لكشك.. و تمثال لعاهرة أو راقصة استربتيز ، و تسيب السادة الحضور يفكّروا براحتهم مين القنبلة و الكشك و مين راقصة الاستربتيز .. أو تكتب لهم بقلم ماركر عالحيطة ( أنتم بنات عائلات محترمات !! ) .
.
------------------------------
By: Mohamed Hussein
موضوع: نتائج الجولة الثانية من انتخابات اليونسكو.. السبوبة تحكم : 
الأربعاء أكتوبر 11, 2017 10:48 am
