تدبير امراة غلب تدبير الشيطان. عندما لقوا ابليس قاعد فى إشاره يشحت ولابس مقطع و ريالته نازلة وحالتة كرب ،

Tamer Azab

.......

بيقولك لقوا ابليس قاعد فى إشاره يشحت ولابس مقطع و ريالته نازلة وحالتة كرب ،، راحوا قالوله مالك يا ابو الأباليس إيه اللى جرالك ، هى مالها جارت عليك كده ؟! بصلهم بعيون كلها حزن وقال ،، أنا كنت شيطان نزيه وإبن أباليس محترامين ومركزى عالى وعايش فى بيت بتاع ناس ماكانوش مخلين فى نفسى ذنب الا وبيعملوه والراجل بيخون الست وهى نايمه على ودانها والعيال ماشاء الله عاقين والأشية معدن ، لحد ما فى يوم الست جابت صاحبتها تزورها وكانت ايه با بنى أدم يا أخويا .. طلقه ،، حاجة كده خليط ما بين هيفاء وهبى وياسمين صبرى ، تخيل أنت بقى !! ورجع الراجل من بره شاف الصاروخ ده وجاله إنهيار عصبى وقعد يتحجج بأى حاجة علشان يبص على رجلها .. لدرجه إنة رمى القلم على الارض ونزل يجيبه زى العيال بتوع ثانوى فى حصة أبله ميرفت مدرسة الموسيقى ...

وعلشان هو راجل عينه زايغه ووشه مكشوف قدر يعرف تليفون الست دى وبدأ يكلمها ويعاكسها ويتقرب منها وهى كان عندها إستعداد سيكولوجى للإنحراف ،، أصلاً هى إنحراف طلعله واحده ست ..

المهم .. يا بشوات علشان ماطولش عليكم أنا عارف أن عندكوا شغل وانا راجل فاضى لحد يوم القيامه ... يوم ورى التانى .. هووب ضرب معاها ورقه عرفى وعاشوا فى تبات ونبات ومخلفوش صبيان وبنات ولا حاجه علشان الست كانت بتاخد حبوب منع الحمل !! وانت عارف اهل الخير مابين البشر كتير ... المهم واحده كده كانت حاطة عنيها على جوزها وماكانش معبرها علشان كان فيها شبه من محمد هنيدى وهو عامل دور ست فى مسرحية حزمنى يا ،، اتصلت فاعلة الخير دى بمراته وقالتلها جوزك بيخونك ومتجوز عرفى صاحبتك فلانه واثبتتلها الموضوع ...

انا قولت هاتتعصب وتكسر الشقه على اللى فيها وليلتنا هاتبقى فل ،، ما انا بهيص فى الحاجات دى زى ما انتوا عارفين .. بس لقيتها قعدت على الكنبه وأخدت نفس عميق ولبست هدومها ونزلت ورجعت بعد ساعه فى اديها كيس اسود مش عارف فيه ايه .

ودخلت المطبع تطبخ عادى جدا بعد ما نادت على العيال وبعتتهم عن خالتهم ودخلت الاوضه لبست قميص نوم شيفتشى مابتلبسوش غير فى ليلة العيد الصغير ..

جوزها رجع لقى الشقة هادية وموسيقى رومانسية والأكل جاهز على السفره وورد بقى و مراته متزوقه ومستنياه .. قالها ايه الجو ده يا حبيبتى .. قالتلة اصلك واحشنى يا بيبى علشان كده بعت الولاد عن أختى ووضبتلك الجو .. صاحبنا كان طاير من الفرحه بقى وحاسس انه شهريار ،، قعد كل الاكل الطعم وحلى بالفاكهه الطعمة ودخل هو ومراتة عملوا ليلة دخله من اول وجديد وبعدها قالتله .. انا عاملة عصير فى التلاجه هاجيبلك معايا ،، قالها بيس يا حبيبتى

دخلت الست جابت كوبايتين عصير مشبرين من المطبخ ،، شرب صاحبنا وبعد كام دقيقه حس بدوخه غريبة وجسمه بينمل ،، بص لمراته قالها .. ايه ده يا حبيبتى هو العصير ده فيه حاجة ؟ ضحكت وقالتلة .. بقى انا تتجوز عليا يا عرة الرجاله ، اه العصير ده فيه مخدر والجرعه مش هاتخليك تنام إنما هاتبقى مشلول ولا هاتقدر تنطق ولا تصرخ علشان تتفرج عليا هاعمل فيك ايه وانت صاحى .. ونيمته على السرير ودخلت جابت الساطور وسكينة تقطيع اللحمه من المطبخ وقطعته حتت وهو باصص عليها لحد ما اتكل على الله وجابت الاكياس السوده وعبته فى كام كيس وسابت حتة لحمه كبيره بره الاكياس وجمعت الاكياس وسابتهم على السرير ،، وخدت حتة اللحمه ودخلت المطبخ ،، وطلعت بعد شويه اتصلت بصاحبتها اياها وقالتلها تيجى تتغدى معاها ويتكلموا مع بعض ... نص ساعه وصاحبتها الصاروخ وصلت ،، قعدوا يتغدوا قالتلها .. كلى يا حبيبتى دا انا عاملالك صنيه بطاطس باللحمه فى الفرن من اللى انتى بتحبيها ،، صاحبتها اكلت وملت بطنها وشربت من نفس العصير ،، نملت وهى قاعده على الكرسى ،، بصتلها الست وقالتلها .. بقى انا تخونينى ومع جوزى ، بس ايه رأيك طعمه حلو مش كده ، والتانية وشها احمر دم ومش قادرة تصرخ ،، شديتها الست من شعرها على الارض دخلتها اوضة النوم اللى فيها الاكياس ونيمتها جانب الاكياس وانا ركبى بتخبط فى بعضها .. أه والله كنت مرعوب أصلى برضو مهما رحت والا جيت شيطان غلبان ماوصلش انا للمراحل دى ،، المهم دخلت غيرت هدومها ومسحت اديها وغسلت السكاكين كويس وأزالت كل الاثار وبعتتله رساله على الواتس بتقولة انت اتأخرت كده ليه يا حبيبى وحشتنى ،، ودخلت اشترت طلبات بالفيزا الشخصيه بتاعته وحطيتها جانبة على السرير وأخدت علبة كبريت وولعت فى السرير باللى عليه ووقفت لحد ما اتأكدت ان النار مسكت فى السرير والاوضه بحالها ولا يمكن تنطفى وكلت كل اللى فيها وبعدين قفلت الباب ولمت دهبها وفلوسها وأخدت شنطتها ونزلت راحت النادى واتصلت بالاولاد حصلوها واكلوا بيتزا واتصلت بالشغل بتاعه على الارضى تسألهم هو نزل والا لسه لان تليفونه خارج نطاق الخدمه وبهد شوية جالها اتصال بيقول النار أكلت الشقه باللى فيها ، قالت يالهوى وسمعت النادى كله وأخدت ولادها وجريت على الشقه لقت البوليس واقف بره والمطافى بتحاول والشقة بقت على الارض وهى على كلمه واحده يا ترى انت فين يا حبيبى يا جوزى تيجى تشوف المصيبة اللى احنا فيها .. يا خراب بيتك يا شوشو .. وهى فى سرها بتقول ... ( انا مستعده اولع فى العالم كله !! أنا يتجوز عليا ! )

بس يا سيدى منك له .. ومن ساعتها وأنا جالى المرض وبقيت بأتخض من اقلها حاجة والدكاتره قالولى لازم ارتاح وابطل شغل لان الصدمه كانت اقوى من احتمالى الشيطانى بكتير وبقيت بأشحت لقمتى علشان اقدر اعيش .[ندعوك للتسجيل في المنتدى أو التعريف بنفسك لمعاينة هذه الصورة]

» عندما يسأل الطفل عن الشيطان .. :)
» الشيطان عدو الاءنسان (¯`*• هل استحوذ عليك الشيطان !!؟؟ ,, اكتشف بنفسك•*´¯)
» يقول الله تعالى في محكم كتابه {{ إن كيد الشيطان كان ضعيفا }}إن السبب في المعاصي والذنوب إما من الشيطان ، وإما من النفس الأمارة بالسوء ،
» عندما يعى الزعيم قدرة امتة عندما يكون للزعيم محبة فى قلوب الجميع ﻻنة منهم ويعمل من اجلهم تحيا شعوب وعمال العرب
» قصة رااااااااااائعة جدا جدا من كتاب تلبيس ابليس ( لابن الجوزي)