أربع هرمونات مسؤولة عن تحديد مستوى سعادة الانسان.

[ندعوك للتسجيل في المنتدى أو التعريف بنفسك لمعاينة هذه الصورة] ضاحك

‏Adel Ansary‏ إلى إدارة السكرى .. ما قل و دل

*************

#الطب_وسنينه

في أربع هرمونات مسؤولة عن تحديد مستوى سعادة الانسان.. و هُم الـ

1- هرمون ال Endorphins

2- هرمون ال Dopamine

3- هرمون ال Serotonin

4- هرمون ال Oxytocin

خلينا نبدأ بالـ Endorphins

لما بنروح الچيم أو نعمل رياضة .. الجسم بيفرز الهرمون ؛ ده علشان يتغلب على احساس الالم اللي بتسببه التمرينات .. علشان كدة ممكن نحس بمتعة في التمرينات اكتر من الالم.

الضحك بردو طريقة كويسة لإفراز الـ Endorphins ؛ فـ احنا محتاجين نقضي على الأقل ٣٠ دقيقة يوميا نعمل رياضة.. نقرأ أو نتفرج على حاجة مضحكة ومسلية علشان نقدر نحصل على جرعتنا اليومية من الاندروفينس.

تاني نوع هو الـ Dopamine

في رحلة الحياة كل واحد فينا بيحقق مهام كتيرة سواء كبيرة او صغيرة.. شعور الإنجاز دة بيتسبب في إفراز الدوبامين بنِسَب متفاوتة..

كمان لما بنلاقي تقدير مقابل اَي حاجة عملناها في الشغل او في البيت بيتولد جوانا شعور بالإنجاز والفخر وبالتالي جسمنا بيفرز كميات مناسبة من الدوبامين اللي بيعلي بدوره مستوى شعورنا بالسعادة..

و ده بيوضح ليه كتير من ستات البيوت ممكن يكونوا غير سعداء .. بما إنهم نادرا ما بيحصلوا على التقدير والعرفان المناسبين لكمية المجهودات اللي بيبذلوها كل يوم!

بمجرد ما ندخل شغل جديد..نشتري عربية أو بيت.. أو أجهزة حديثة... إلى آخره ، في كل مناسبة من دول الجسم بيفرز دوبامين اكتر وبنحس بسعادة اكبر.. وده يخلينا نفهم بردو ليه ستات كتيرة بتخرج من أي مود حزين بمجرد ما تعمل شوبينج..!

تالت نوع هو الـ Serotonin

و ده بيجي لما نتصرف بشكل فيه نفع للآخرين .. لما نتخطى نفسنا ونكون قادرين على العطاء.. للطبيعة.. او للمجتمع .. حتى مجرد مشاركة معلومة مفيدة مع الغير.. أو كتابة بوست مفيد على الانترنت.. أو إجابة حد بيسأل على جروب أو مواقع تبادل الخبرات زي Quora.. كل دي حاجات بتفرز السيروتونين وبالتالي بتزود احساسنا بالسعادة..

النوع الرابع والأخير هو الـ Oxytocin

و ده بيتم إفرازه لما بنقرب من ناس تانيين.. مثلا لما نحضن حد من أهلنا أو صحابنا.. أثناء المصافحة باليد.. لما نحاوط حد بدراعنا.

علشان كدة المفروض نحضن طفل صغير مزاجه مش مظبوط.. علشان نزود عنده الهرمون دة ويقدر يحس بسعادة من تاني.

فـ ببساطة ضرورى

(نعمل رياضة) كل يوم علشان الاندروفينس.

(نحقق إنجازات) ولو صغيرة جدا علشان الدوبامين.

(نكون نافعين لغيرنا) علشان نقدر ناخد حصتنا من السيروتونين.

(نحضن ولادنا وصحابنا واهلنا علشان ناخد كفايتنا من الاوكسيتوسين..

.........

محتاجين نعمل الحاجات البسيطة دي علشان نكون مبسوطين..

و لما نكون مبسوطين هنقدر نتعامل مع مشاكلنا وتحدياتنا بقوة اكبر..!

فـ السعادة مش شعور معقد ولا تكمن في حدثً عظيم او صعب المنال .. السعادة ممكن تكون قدامنا وحوالينا وفِي كل مكان.. بس احنا ناخد القرار!

» هرمونات الغدة النخامية*بقلم الأستاذ/فاخر الكيالى*
» اختلال هرمونات الغده الدرقيه ...الاعراض والعلاج*بقلم الأستاذ/فاخر الكيالى*
» البيت الواسع من سعادة المسلم..
» 4 أشياء تجعلك أكثر سعادة
» البيت الواسع من سعادة المسلم*****