الصراع على و في الشرق الأوسط... حرب الــغــاز.. الناحية الجيواقتصادية للصراع

Mohammed Haffz
الصراع على و في الشرق الأوسط... حرب الــغــاز.. الناحية الجيواقتصادية للصراع
==============================================
معلش استحملوني لأن المقال طويل شوية .. أنا كنت كتبت عنه بالتفصيل قبل كده ولكن المرة دي هنتكلم بلغة سهلة مبسطة بعيدا عن التعقيد علشان الناس تفهم .... المهم ،ياريت تحتفظوا بيها عشان كمان تفتكرونا بالخير .... و معلش تعالى على نفسك و إقراه على رواقة و واحده واحده مع كوباية شاي لأنه هيفرق معاك كتير جدا ....... و زي ما اتعودنا اننا بنبص على الصورة من فوق و بــ نجمع الأمور مع بعض زي البازل علشان الصورة كلها تبان لينا .... التفاصيل كتير لكن حــ حاول أختصر في النقاط على قد ما أقدر......
أولا ، لازم نضع في اعتبارنا استخدام الرئيس السيسي لمصطلح "معركة بقاء" بدلا من مصطلح "حالة حرب" .... يعني احنا في معادلة صفرية .... فلا وجود لمصر بوجود العدو .... و بقاء مصر يعتمد على القضاء تماما عليه ، و ليس فقط النصر عليه.
طيب عشان نعرف احنا رايحين على فين لازم نعيد شوية معلومات اتكلمنا عليها كتير قبل كده و بـ التفصيل في مقالات سابقة ..... لان تأصيل الامور هو أهم شيء في معرفه الحلول .... و لأن مهم جدا نربطها مع اللي الجاي علشان الصورة توضح و تعرفوا كان مصيرنا إيه و هيبقي إيه....؟؟؟
• بصوا بقي ..... اتكلمنا قبل كده ان أصل الموضوع هو التقاء مصالح أمريكا – اسرائيل من جهة مع أوروبا من جهه أخرى في الاصرار على تفتيت المنطقة .... أمريكا – اسرائيل ايدولوجيا في القضاء على العرب و روسيا في ضربة واحدة ، أما بالنسبه لأوروبا فهي في الاستيلاء على مصادر الطاقه (الغاز) و استبدال المصدر الروسي المحتكر للطاقه المغذية لاوروبا بالغاز القطري و مخزون غاز البحر المتوسط الواعد ( المصري – الاسرائيلي ) .... و بكده تستفاد ايضا امريكا بسقوط الاقتصاد الروسي المعتمد على تصدير مصادر الطاقه ...
• و اتفقنا إن ماسورة الغاز الأم اللى بتغذي اوروبا حاليا جايه من روسيا .... و الحاج بوتين لو زعل بس و حط ايده على محبس الغاز .... تترعب الحكومات الأوروبية لان المواطن الأوروبي حــ يموت متجمد من البرد في الشتا و المصانع هناك حتقف.
• فكان البديل أن يتم استبدال روسيا كمصدَر للطاقة و مد خط غاز من قطر عبر العراق و سوريا الى تركيا .... و من البحر المتوسط (مصر و اسرائيل) إلى سوريا ثم تركيا ..... ومن أذربيجان إلى تركيا .. يعني تركيا هتكون نقطة تجميع و تلاقي الثلاث خطوط أو (عقدة الغاز) زي ما بيسموها في المجال ده...
عشان كده كان التركيز على سوريا كبير جدا لأنها متحالفه مع روسيا و مش حتسمح بالخطة دي .... فكان لازم تدميرها و تغيير النظام فيها الى نظام مفكك لكن حليف ... و ده سبب استماتة روسيا في الدفاع عن سوريا و دعم بشار و النظام السوري .... لأن ما يحدث لسوريا موجه أصلا الى روسيا ...
• و زي ماهو باين من الخريطة كده ان الخط ده بجذوره التلاته بيتجمع في تركيا و ينتقل تحت مياه البحر الأسود عبر أنبوب إلى شبه جزيرة القرم ومنها الى أوكرانيا ثم الى أوروبا ..
• و عشان الموضوع يكمل كان لازم يتم تغير النظام في أوكرانيا أيضا .... فقاموا هناك بتطبيق خطة التخريف العربي والثورات المخلقة معمليا علشان تيجي حكومة حليفة للغرب .... و تدخل أوكرانيا حلف الناتو ..... و بكده يضربوا عصفورين بحجر .... منها إن الناتو يقوم بحماية خط الغاز رسميا ، و منها أنه يكون فيه قوات امريكية على الحدود الروسية لأول مرة في التاريخ ، وبشكل فهمي نظمي رسمي ...
• و لو بصيتوا على الخريطة ..... هتلاقوا انه بالاستيلاء على أوكرانيا و خصوصا اقليم القرم ..... هيتم غلق المخرج الوحيد لروسيا بحريا من البحر الأسود على الشرق الاوسط .... يعني يقطعوا رجل روسيا تماما من التواجد في البحر المتوسط و الشرق الاوسط كله .
• طيب مين اللى حينفذ ده على الأرض ؟؟؟ ..... بفكر شيطاني استكملوا استثمار خطة بريطانيا الشريرة اللي زرعت محمد بن عبد الوهاب و الخوميني و حسن البنا في المنطقة اللى كان دورهم يتمثل في الأية " يحرفون الكلم عن مواضعه" ، و اتفقوا مع الاخوان و المتأسلمين و الشيعه كمقاولين أنفار من الباطن لتوريد المقاتلين اللى حيخلصوا على الارض ...... حـ نساعدكم و حـ نسيبكم تحكموا و نعترف بيكم و نديكم سلاح .... في مقابل انكم تدونا الغاز و النفط و تنفذوا اللى احنا عايزينه ... و تمويل الموضوع ده كله حيكون منكم فيكم .... يعني من قطر..... و علي فكرة .... بدأ بالفعل توريد البترول السوري و العراقي للغرب عبر تركيا من خلال تنظيم داعش.
• و طبعا المخطط كان تنفيذ النموذج الأفغاني في الدول العربية .... افتكروا كده لما طالبان مسكت الحكم هناك قامت الحروب الأهليه هناك و امراء الحرب دبحوا في بعض ..... فـي الأول يتم تفكيك الجيوش النظامية و تحويلها الى ميلشيات مسلحة .... و بعدين كله يدَبح في بعضه زي مهو حاصل دلوقتي في العراق و سوريا و ليبيا .... داعش بتضرب في النصرة و الاتنين بيضربوا في الشيعة و المسيحيين .... و الشيعة بتضرب في الاتنين .... و المسلمين كلهم يخلصوا على بعض .... و لاحظوا إن قادة كل التنظيمات دي يا إما كانوا ظباط مخابرات أو عملاء سابقين للغرب .... أو اتخرجوا من مدارس جوانتانموا لاعداد الارهابيين الغربيين ..... " كلهم أولادي "
• كده اسرائيل و امريكا استفادت بتنفيذ هدفهم الايدولوجي أيا كان المسمى بتاعه زي الماسونيه أو غيره بتدمير العرب..... و أوروبا أخدت الغاز و البترول برخص التراب و لعشرات السنين قدام
• الخطة كانت ماشيه زي الحلاوه و تم تدمير العراق و سوريا .... و تم تدمير ليبيا لتطويق مصر اللى تم الاستيلاء عليها بوصول مرسي العياط للحكم لتحييد أقوى دولة في المنطقه و تفكيكها ، و طبعا السعوديه و الخليج كانوا مرعوبين لأنهم بسقوط مصر كانوا مش حياخدوا في ايديهم غلوة ....
• كل ده يوضح ليكم ليه قطر بتستميت في دعم المشروع الاخواني لأن خط الغاز ده كان هيزود دخلها عشرات المرات وهيزود أهميتها السياسية ، وكمان كان المفروض إن الاسره الحاكمه هناك تاخد الجايزة الشخصية بتاعتها بانهم يحكموا الخليج العربي كله بعد تفتيت السعوديه و الإمارات و الكويت .... و يبقي البغل بتاعهم هو ملك الجزيرة العربية.
• و اللى يأكد ده ان قطر كسّبوها اقامة كاس العالم 2022 و تعهدت قطر باقامة البطوله على 12 استاد ..... و بعد 30 يونيو و لما لقوا ان الحكايه باظت ...... بعتت قطر خطاب للفيفا يترجوهم انهم يعملوا البطولة على 8 استادات فقط بحجة إن مساحة دولة قطر الحاليه لا تستوعب غير بناء 8 استادات فقط...... و ده يأكد انهم كانوا بيخططوا انه على ما يجي عام 2022 المفروض ان مساحة قطر كانت مش حتكون على المساحة الحالية و ان البطوله كانت حتقام على استادات في بلاد اخري في المنطقة تحت اسم قطر
• وكل ده معناه ان روسيا كانت حتواجه مصيرها لوحدها مع الصين و كوريا الشمالية ..... و افتكروا كده لما أوباما قال أنه هيضرب سوريا عسكريا علشان الموضوع طول و الوقت بيداهمه و عايز يخلص قبل ما روسيا تفوق ... قام بوتين خلَا الواد المجنون بتاع كوريا الشماليه يوجه صواريخه النوويه الى أمريكا و هدد بمحو أمريكا من الخريطة .... فأمريكا جابت المرشدير العظيم و تراجعت عن ضرب سوريا.....
• الخلاصة ..... ان الموضوع كان هينتهي بمواجهة عسكرية حتمية ما بين روسيا و حلفاؤها من جهة .... و أمريكا و الغرب من جهه أخرى ..... يعني فناء العالم في حرب عالمية قد تكون نووية .... لأنها هتكون حرب بقاء بين قوى عظمى .
مين بقي اللى غير المعادله دي كلها و حمي العالم من مصير كارثي بسبب الحروب العسكريه ...... و خلا روسيا تتنفس من جديد .... ؟؟
هو تحالف الجيش و الشعب المصري في 30-6 و اللى بسببه تم تدمير المخطط ده بالكااااامل ..... و بدون حرب عسكرية مباشرة و لا حاجة ..... و هو اللى فرض أسلوب و شكل جديد في الحرب الدائرة ..... و التحرك الفجائي ده ضرب 100 عصفور بحجر واحد :-
• القضاء على المخطط الشيطاني الغربي للمنطقة.
• تحويل المواجهة من مواجهه عسكرية صريحة الى مواجهه مخابراتية خفية ، و ده حمى مصر و الخليج و روسيا من ويلات الحروب.
• الحفاظ على دول الخليج من مصيرها .... و ده يبين لينا سبب إستماتة السعودية و الامارات في دعم مصر ، لأنها حائط الصد ليهم حاليا و مستقبلا.
• تغيرت الاستراتيجيه الروسية من الإنزلاق في مواجه عسكرية مباشرة ومكلفة الى مواجهة سياسية و اقتصادية ..... فقام الحاج بوتن بضم اقليم القرم ذات نفسه باللى فيه لروسيا و قطع عليهم جغرافيا سكه خط الغاز من أصله .... ( روسيا ممكن تعمل تمثال للسيسي عندهم )
• مع اني متاكد إن التنسيق الأمني و المخابراتي مع روسيا كان من زمان ..بس تم الاعلان عن التحالف ضد امريكا رسميا في زيارة السيسي لروسيا و ارتداؤه الجاكيت العسكري الروسي .... الرسالة كانت الى أمريكا و انجلترا الخبيثة.... " نشكركم على حسن تعاونكم معنا " و كان فاضل يطلعولهم لسانهم في الصورة
• توسيع التحالف ضد الغرب لم يقتصر على الشرق الأقصى فقط ، و لكن أصبح على الأرض في الشرق الأوسط و تغيرت الاستراتيجية من المواجهه العسكريه الى المواجهه الاقتصادية و المخابراتية .
من الكلام اللى فات ده يبين لينا كمان حاجه مهمه جدا ..... و هو سر مرض اللوثة اللي أصاب الحاج أردوغان بفوبيا السيسي .... و كل ما يطلع في مكان لازم يشتم في السيسي و الجيش المصري .... الراجل بيمشي يكلم نفسه و بيشد في شعره زي المجنون ..... ليه ؟؟؟
لأنه بعد ما كان معشم نفسه و خلاص هتبقي الماسورة الأم بتاعة غاز أوروبا كلها عنده .... و هيبقي ليه مكاسب إقتصادية و أهميه استراتيجيه كبيرة و حيكون ليه دعم غربي و لمشروعه الاخواني و حلم الخلافة العثمانيه .... طلع له السيسي و الجيش المصري فجاةً و اداله صابونه لوكس حكاااااية
*طب احنا بقي داخلين على ايه ؟؟؟؟ و هل حيسيبونا في حالنا ؟؟؟؟
*و هل ممكن يتكرر تاني تجربة العدوان الثلاثي على مصر ؟؟؟
*و ازاي بيتم مواجهة المخططات دي ؟؟
*و إيه سبب اسقاط الطائرة الماليزية فوق أوكرانيا و بعدها الجزائرية و تأثير ده علينا إيه ؟؟؟؟
*و ايه قصة ضرب أمريكا لداعش في العراق ؟؟؟؟ و مين داعش و ماعش دول اصلا ؟؟؟
*و ليه دايما حاسيين ان مصر بطيئه جدا في التعامل مع الإخوان و مش بتخلص مع عناصرهم في الداخل ؟؟؟؟ ..... و كأن مصر بتتعامل معاهم زي ماتش كورة بتقتل في الوقت و بتضيع الوقت ؟؟؟؟
*و هل وضعنا زي زمان و اللا ضعيف و اللا أقوي ؟؟؟؟
*و إيه اللى مطلوب مننا كشعب و كأفراد ؟؟؟؟
ده بقي هنتكلم عليه بالتفصيل علي حلقات في المقالات القادمة بإذن الله لو لينا عمر و أجل
‫#‏تحيا_مصر‬
‫#‏كلام_فى_الصميم‬
Mohammed Haffz