يا إبني ، يا بنتي ، ليه تخلونا نتكلم جد ؟ سامحني يارب ...مصر كيان واحد وعنصر واحد مش أتنين

يا إبني ، يا بنتي ، ليه تخلونا نتكلم جد ؟ سامحني يارب .
إحنا الناس اللي كنا بنبكي بدل الدموع دم على الأزهر في فترة حكم أنجاس الأرض أجمعين " الإخوان " . كانوا عايزين يدمروا الأزهر . خلاص ؟
إنما لازم الجميع يعرف إن الأزهر غافل عن صحيح الواقع ، وبالشكل ده بيخرج بكلام غافل عن صحيح الدين ، إللي بيعمل كده مش هما الشخصيات اللي بنحبها زي الدكتور الجميل المقرب لقلبي الشيخ علي جمعه ، ولا الدكتور الطيب ، ولا النماذج الجميله اللي زي الدكتور أحمد عمر هاشم ، إفهموا يا بشر بدون مزايده وبدون تطرف كمان .
محمد وجورج في كل حاره و شارع و بيت عايشين مع بعض ويعرفوا أسرار وحكاوي وظروف شخصيه وخاصه يمكن مايعرفهاش أهل الاتنين ، حد عارف مصاريف مدرسة إبن محمد مين دفعها ؟ حد عارف جهاز بنت جورج مين ساعد فيه ؟ مش هتلاقي حد عارف غير محمد وجورج " ستر وغطا على بعضهم "
محمد وجورج متعايشين بالشكل اللي ما ينفعش معاه إننا نقول لهم يقولوا إيه ومايقولوش إيه لأنهم بالأصل مؤمنين بعقائدهم الغاليه جداً عليهم !
يا إبني حاول تفهم إن الاتنين بيحبوا بعض وواخدين بعض على عيبهم أصلاً إن جاز التعبير !
الأزهر خطابه غايب عن الوعي ، بالأصل خطاب الأزهر مش علشان محمد وجورج ، الأزهر بيحاول يرد على المتطرفين ويُجيز تهنئة أقباطنا المسيحيين ، لكن انفصاله عن الواقع بيخليه زي الدِبَّـه اللي قتلت صاحبها ، إيه الجديد في إنه التهنئه واجبه بما لا يخالف العقيده ؟!!! هو محمد اللي لسه مصلي العشاء هايروح يقول لجورج كل سنه وانت طيب بمناسبة عيد ميلاد الرب ؟
بالذمة حد يكون عيده بكره وأخرج أقول كل سنة وانت طيب لكن بشروط ؟ يعني أقوله كل سنة وانت طيب وبعدها أقوله ويحك يا رجل ..؟!!!!
ده اللي وصل لأهالينا المسيحيين - خطاب جاهل وغايب عن الوعي ، ياريته ما قال حاجه لأن محمد وجورج مش محتاجين فتوى أو تصريح علشان يعرفوا يقولوا إيه وإمتى ، و إزاي ، الأزهر هو اللي محتاج يعرف محمد وجورج .