تطبيع تركيا لعلاقتها مع إسرائيل لماذا الأن؟

بمناسبة تطبيع تركيا لعلاقتها مع إسرائيل .. الحدث ده كنت مستنيه من فترة، و خاصة بعد إسقاط تركيا لقاذفة السوخوي الروسية و اشتعال حرب قرة باغ و دعم تركيا و اسرائيل لأذربيجان ضد أرمينيا ..و تعثر المشروع التركي أمام الصمود السوري، و الأهم بعد الكماشة اللي بتعملها مصر ضد تركيا في عمقها الإستراتيجي في منطقة شرق المتوسط بمشاركة قبرص و اليونان .. كل ما زاد الخناق علي تركيا ، كل ما اتضحت العلاقة اكتر بينها و بين اسرائيل .. لأن الاتنين دول بتجمعهم أهداف ومصالح أكتر ما بتفرقهم ..
.
لفت نظري في بروتوكولات اتفاق التطبيع التركي الاسرائيلي النقاط دي ، و أرجوا أنكوا تركزوا شوية هنا، عشان كل بند أخطر من التاني.
1ـ التطبيع يعني شراكة استراتيجية بالنسبة لإسرائيل و لأمنها و اقتصادها و مرهون بالدرجة الأولى بمشاريع الغاز الاسرائيلية التركية و تدفقها نحو السوق الأوروبية، و اه والله تركيا هي اللي هتتولي مهمة تصدير الغاز الإسرائيلي نحو أوروبا
.
2 ـ الاتفاق بيحمي جنود و جنرالات الجيش الاسرائيلي من أي دعاوى قضائية جنائية ومدنية بحقهم، حالياً و في المستقبل كمان .. يعني الاتفاق بيضمن بأن جنود و جنرالات الجيش الاسرائيلي السفاحين لن يتعرضوا لدعاوى قضائية من قبل تركيا ، وسيتم تمرير قانون في البرلمان التركي يلغي الإجراءات القانونية بحقهم التي تجرى حاليا. غصب عن أم الاتراك 
.
3ـ الاتفاق بيخلي الحصار البحري المفروض على قطاع غزة على حاله. اه والله، و بيجبر تركيا علي عدم المساس بيه، لأن ده مصلحة عليا لاسرائيل بحسب بنيامين نتنياهو، اللي قال إن الطوق الأمني ـ الحصار يعني ـ ضروري لأنه يهدف إلى منع حماس من تعزيز قدراتها العسكرية وهو سيبقى على حاله.
.
4 ـ الاتفاق يلزم تركيا بمساعدة إسرائيل على الانضمام إلى جميع المنظمات الدولية اللي تركيا عضو فيها، و على فكرة بسرعة شديدة سحبت تركيا رفضها لفتح مكتب إسرائيلي في مقر الناتو.
.
5ـ تركيا التزمت بمنع أي نشاط إرهابي أو عسكري من قبل حركة حماس ضد إسرائيل من الأراضي التركية، بما في ذلك جمع الأموال لهذه الأغراض، يعني بالعربي كده الحكومة التركية هتصادر اموال و هتمنع حنفية الفلوس لارهابيي حركة حماس و ده من حسن الحظ هيصب في مصلحة مصر من شقين، أولاً: انهيار حلف انقرة الدوحة لدعم القضية الفلسطينية ، و اللي موجود بالأساس عشان يحجم و يحيّد دور مصر في القضية الفلسطينية ، و التاني: هو استفراد مصر بالقضية و محاولة تأديب و تهذيب عاهرة المقاومة "حماس" ..اللي خانت دمشق و راحت لأنقرة و في النهاية اتباعت برخص التراب أهو.. و في طريقها لطهران كمان قبل ما مصر تقوم بتقليم أظافرها و إخضاعها أخيراً لمصلحة القضية بما لا يهدد أمننا القومي.
.
خلي بالكم، لما بنتكلم عن تركيا ف احنا مش بنتكلم عن دولة فقط، إحنا بنتكلم عن عقيدة اخوانية بتحكم هناك من الألف للياء .. بنتكلم عن جحافل من الاخوان في منطقة الشرق الأوسط اللي صدعونا بشعارات ع القدس رايحين شهداء بالملايين، و اللي زكوا أنفسهم بتحرير فلسطين و الجهاد فيها .. و زايدوا علي مصر بضمير في مواقفها ..
اخواننا النشطاء و معاهم جحافل الاسلاميين: تركيا الآن في شراكة استراتيجية اقتصادية مع اسرائيل، ما نسمعش حد فيكم يزايد على اتفاقيات الغاز المصري اللي تم الغائها و تجميدها مع اسرائيل .. تركيا دلوقتي مشتركة بمالا يخالف شرع الله في حصار قطاع غزة بحرياً ...ما نسمعش حد فيكم يزايد على موقف مصر و اجراءات حماية أمننا القومي بطول الشريط الحدودي لقطاع غزة
تركيا الآن ..مرتع الاخوان .. مصلحة تل أبيب عندها أهم من مصلحة دمشق و القاهرة .. و من المعادلة البسيطة دي هتقدروا تعرفوا دور الاسلاميين في المنطقة حالياً إيه ..والأهم ..وظيفة وجود جماعة الاخوان المسلمين في اوطاننا .. 
‫#‏مصر_باقية‬ .
.
-------------
لـ محمد حسن