Adel Ansary
15 يناير
#معلومات_هامة
أرسلتها ابنتى نوران .. ابن الوز عوام
هذه هى القواعد ال ٤٠ لدكتور الباطنه و الطوارئ
١- مفيش حاجه اسمها برد في المعده ؛ كلها نزلات معويه والتهابات في الأمعاء من العك اللي بتاكلوه في الشارع منك ليها ...
٢- مفيش حاجه اسمها اخد المضاد يومين ؛ فا اخف و أقوم .. بطلوا أبوس ايديكوا البكتريا جالها مناعه بسبب الحركه دي .
٣- مفيش حاجه اسمها أبره تخففني من البرد ؛ هو فيروس هياخد وقته و هيعدي ..
٤- عمر اللي بيستعمل جهاز البخار مره واحده ما هيفضل طول حياته ماشي عليها ؛ مش كوكايين هوه .
٥- مش معني ان الضغط واطي ترزع العيان ٢ لتر محاليل ؛ العيان ممكن يفطس منك ركز و شوف السبب الاول .
٦- بلاش تستسهل اول ماتشوف بنت ((مغمن)) عليها تقول حاجه نفسيه !!! .. في خمسين حاجه خطر بتعمل كده ...
٧- الكورتيزون مش بيتخن من اول حبتين ؛ لازم فتره طويله .
٨ - بردوا أبره الكورتيزون بتاعت الحساسيه مش بتخن ؛ أبوس ايديكوا بلاش نهري في اي كلام ..
٩- تعقيبا ل النفط 7 و 8 .. تخن الوش والحمار من الكورتيزون ؛ مش من علامات الجمال ، دي مصيبه حضرتك ده ممكن يعمل هشاشه عظام .
١٠- مش معني ان المضاد الحيوي عملك إسهال إنّو وحش او ان الدكتور حمار ، ابسلوتلي معظم المضادت بتعمل تعب المعده ، و الجهاز الهضمي .
١١- المسكنات مش كلها مضرة للكلاوي ، و حتي المضر بيبقي للناس اللي عماله تسفوا عمال علي بطال ، بغير جرعاته الموصوفة .. جرعه البنادول المضره للكبد ٤ جم يعني اكتر من ٨ حبات مره واحده
١٢- مش نصاحه منك ان يبقي عندك الضغط و السكر ، و مش بتعالجهم .. صدقني هتندم ؛ ( السكر بيدمر الكلي ، الاعصاب و العين .. و الضغط بيضيع القلب و ممكن يجيلك نزيف في المخ )
١٣- الاسبرين مهم ناس معينه تاخده فا متهملوش ...
١٤- معظم البنات وجع العضم عندهم وسقوط الشعر و عدم التركيز من نقص فيتامين دال ، شيكي عليه دلوقتي .
١٥- السونار مش بيبن ايه جوه المعده و الله ...
١٦- الزايده ناحية اليمين ، و تحت مش شمال ...
١٧- مش اي وجع في الصدر تبقي جلطه ؛ الجلطه ليها أعراض زي وجع ناحية الشمال و الكتف و الرقبه و الدراع الشمال ، أو احساس طوبه فوق صدرك مع بروده في الأطراف و عرق ، و ساعات وجع في فم المعده ، و ساعات من غير اي ألم في الناس اللي عندها سكر
١٨- ما تقعدش تحش و تاكل كل حاجه ، و في الآخر تشتكي من القولون انوا تاعبك ؛ ده كويس انوا مشتمكش .. و مفيش علاج جزري ليه ؛ كلها مسكنات و أدوية نفسيه
١٩- الحرقان في البول عند البنات في الاساس من قلة شرب الميه ؛ بلاش تضربي مضاد من دماغك اعملي تحليل بول و مزرعه الأول عشان الموضوع ده مهم و متكرر و بيعمل مشاكل .
٢٠- مصل الانفلونزا مش بيمنع الانفلونزا
٢١- بتشرب سجاير ؟ لا يادكتور طبعا .. يا ابن الكدابه ده أنت شفايفك زرقه ، و رائحة بقك مميزة ، و أسنانك مدمره منها .. بلاش تصتنصحوا...
٢٢ - اكيد هتاخد بنج و انت بتعمل منظار المعده ؛ يعني هعذبك ليه !!! .. فبلاش السؤال الوجودي هاخد بنج و لا لأ
٢٣- بلاش تمليني الأدوية لعلاج حالتك اومال انت جايلي انا ليه يا عم الدكتور .
٢٤- و الله ما فيه حاجه اسمها كشف بالتليفون ، او قولي حاجه نجيبها من الصيدليه
٢٥- مش اي وجع في البطن ناحية اليمين تحت تبقي زايده .. ممكن حصوه ، أو ممكن التهاب عادي في القولون .
٢٦- الاشعه المقطعية و الرنين أنا مش بعاقبك بيهم ؛ دي أدوات تشخيصيه لابد منها لتشخيص حالتك .
٢٧- مش اي صداع يبقي صداع نصفي .. الصداع النصفي ليه أعراض ؛ منها الزغلله و رشح ساعات و انوار و ألوان في العين و بيطول ، و العيان هيجي يقولك بخبط راسي في الحيط .
٢٨- تعقيبا على ٢٧ ؛ في صداع أسموا cluster headaches ، و ده بيجي للمدخنين و علاجه اكسجين
٢٩- فيروس الكبد A بيتنقل بالأكل ، و ال ( B , C ) بالدم و الادوات الغير معقمة .. و B أغلس من C جدا .
٣٠ - اي واحده عندها حد في عيلتها اتشخص ورم في الثدي ؛ لازم تشيك دوريا
٣١- مش كل حراره يتاخدلها مضاد حيوي ، الفيروسات مش علاجها مضاد ( شير في الخير )
٣٢- قزازه الخافض ( البرلفجان ) = حبايتين بنادول بس في الوريد