أزمة السكر دى حدوته وحكاية ومحتاجة بحث فعلا من الباحثين

Hassan Margawy

الآن ·

أزمة السكر دى حدوته وحكاية ومحتاجة بحث فعلا من الباحثين نشوف مين السبب ومين المستفيد ومين اللى وصلنا للحالة المزرية دى انا شخصيا والحمد لله عايشت حروب وعايشت تدهور إقتصاد مصر وعايشت حلاوتها ومرارتها وأمانة المخلصين وفساد اللصوص المجرمين ودرست علم الإقتصاد والإدارة المالية ودرست علم الإدارة منذ نشأ الإنسان حتى اليوم وكيف هدمت دول وكيف قامت دول لم اجد مثيل لما وصلنا له اليوم ففى أزمة السكر كمثال بس عشان مايجيش واحد يهرى ويتكلم بكلام هو نفسه مش عارفه ولاعارف معانية بنفند مع بعض كده شوية الأوراق واقول لكم فى شهر مايو الماضى رفض البقال التموينى صرف الأصناف للناس وصرف لهم سكر فقط قال هو كده مفيش عندى غير السكر ياعم عاوزين زيت ورز قال مفيش كله ياخد سكر طب حنعمل بيه إيه ده كتير علينا قال الدولة صرفت لنا سكر بس عندهم كتير فى المخازن وحيبوظ من الركنة أنا بصراحة فلت م المطب ده وفكرته إن إمبارح لسه واخد منه بكينة سكر 10 كيلو عشان عندى صنايعية فى البيت وهم يحتاجون لشرب الشاى بإستمرار فعافانى من شراء السكر ومن تحت لتحت صرف لى زيت ورز يعنى الأصناف موجودة ولاتصرف إلا برشوة أو سوق سودة او مجاملة عموما ده الوضع اللى كان قائم وبعدين...

الكيلو كان ب 4.5 فى التموين وفى خارج التموين.

المصانع المصرية كانت بتشتكى من تكدس المخزون الذى اثر على الإنتاج .

فى اغسطس تقريبا وبعد خروجنا من شهر رمضان والعيد قامت الحكومة بعدة ضربات قاتلة للشعب منها رفع جمارك ورفع اسعار ونهتها بمايسمى ضريبة القيمة المضافة ساعتها السكر كان عليه 10% ضريبة مبيعات أعفت الحكومة مشكورة السكر والشاى من ضريبة المبيعات ومش كده وبس لأ أعفتهم كمان من ضريبة القيمة المضافة بما يعنى نزول السعر مش رفع السعر وهب أطلقت الحكومة رصاصة الرحمة علينا بتعويم الجنيه فين السكر يامؤمن مانعرفش طب فين المخزون الله أعلم طب فين الإنتاج المحلى أبو كام و70% من مجمل الإستهلاك راح فى الكازوزا طب مين اللى بيستور مانعرفش طب السكر سعره أصبح نار ليه حتى فى التموين سيادة الحكومة بتمن علينا أى والله بتمن علينا أنها رفعت دعم الفرد من 18 جنيه غلى 21 جنيه فى التموين اللى اصلا مابقاش فى تموين السكر كان ب 4.5 وصلوه ل 7 جنيه ويقال والله اعلم إنه ب 10.5 داخل البطاقة وخارجها والرز ب 7 بعد 4.5 والزيت ب 12.5 بعد 9 يعنى مافيش 3 جنيه زيادة ولاحاجة دول خدوا منا نص اللى بيقدموه طب السكر فين ياعم الحج دور عليه تلقاه دور عليه دور بكام ياعمنا أنت وحظك فى القاهرة من 13 & 15 فى المحافظات ربنا معاهم وصل ل 20 فى بعض الأماكن طب والحل كل يوم يقولوا وصول 25 ألف طن من البرازيل وصول ماعرفش إيه طب فين ياعم وحيتوزع أزاى وبكام لانعرف وفين الرقابة وفين القوانين وفين الحكومة مش موجودة ويطلع وزير الزراعة بتاع الحكومة يتوعد برفع سعر كيلو السكر عشان زود الفلاحين الغلابة بضع جنيهات على طن قصب السكر نعمل إيه نعمل إيه أقول للحكومة تيجى نشحت سوى والا اقول لكم ياريت الشعب كله يبقى زيى بأشرب شاى مرة واحدة فى اليوم وبملعقة سكر صغنطوطة بس الحمد لله دى نعمة من ربنا عشان مايحوجناش لحكومة..

by:hassnmargawy.

» في ظل أزمة السكر التي تشهدها البلاد، تقوم مواني السويس بتصدير نحو 1500 طن يوميًّا
» أزمة الصواريخ الكوبية ... مثال لما سيتم بين روسيا وتركيا
» سد النهضة فكرة هرتزل وبن جوريون والسفيرالإسرائيلي وراء أزمة تدويل الصراع
» يسمع الكثير عن مرض عمى الألوان، لكن لا أحد يعرف هل هو فعلا شخص مصاب بهذا النوع من العمى أم لا.
» أزمة الحسم في عاصفة الحزم