Mohamed Hafez
.....................
من أحاديث عم مليجي في الرد على البلح الاستراتيجي
===============================
" أحدهم" من الكائنات الفيسبوكية الطحلبية الطفيلية اللزجة التي تعيش وتتعايش على اللايكات ، ويتناسب حجم تكاثرها طردياً مع زيادة عدد الشيرات ، تماما كالديدان الساكنة على حواف الترع والمستنقعات ؛ أولئك الزياطين في كل زيطة والناعقين في كل خرابة اللي بيقضوا ليلهم ونهارهم في البحث عن أي مواضيع يعملوا من خلالها أبطال بسيوف خشبية ، فإن لم يجدوا ما يهرون فيه أخترعوا هم أي فقاعة ونفخوا فيها لكي يعطون لأنفسهم حجما أكبر من حجمهم على طريقة " الهري في الأرضِ بعضٌ من تخيلنا ، إن لم نجده عليها لأخترعناه "
هذا الـ " أحدهم والشهير بالكائن الجوجلي والخبير الاستراتيجي بلحة السابع عشر ، تمطع وتنطع فجأة ثم تمخض وباض بوست من النوع الـ "سبايسي" اللي بيعجب الطفيليات الخرفانوكولجية فيجتمعوا عليه كما يجتمع الذباب على أكوام السباخ الطازجة ، إذ قال خبير الكُلّه - أدام الله ظله وقدّس سره - انه زعلان من الريس بسبب مقولة " احنا فقرا أوووي " .. ويكأننا كنا نسبح في أنهار العسل واللبن ، ثم أصبحنا نعيش في هم وضيق بسبب ما أسماه "سياسات الرئيس " ...وبيقول للريس ( لا يا ريس احنا مكناش فقرا ... احنا بقينا كده فى عصرك فقط )
.
فهل تفضل علينا سيادة الجناب الأعظم والفطحل الأفخم وقال لنا متى كنا أغنياء ثم افتقرنا ؟؟
- هل كنا أغنياء أيام جلالة الملك المفدى خازوق الأول الشهير بملك الكوليرا و الذي كان مشروع جلالته القومي هو مشروع مكافحة الحفاء ؟
- أم كنا أغنياء ونحن تحت الحماية البريطانية أثناء الحرب العالمية الأولى والتي وصلت حالات الفقر والجوع والمسغبة فيها إلى مستويات أسطورية خلقت لنا أشهر سفحاتين في تاريخ مصر المعاصر؟
- أم اننا كنا أغنياء ونرفل في النعيم المقيم ونحن نكافح من اجل نيل استقلالنا ونحارب تلاث قوى عظمى لنستطيع انتزاع حقنا المسلوب في قناة السويس ؟
- أم أننا كنا أثرياء ونحن نبني مصانعنا ونرسخ لقواعد نهضتنا في الستينات قبل أن توئد تلك النهضة على يد قوى الغدر في 67 ؟
نعم كنا نبني ونتحدى ونذهل العالم بقوتنا وصبرنا وعزيمتنا ، لكننا ابدا لم نكن أغنياء نعيش في الرخاء ، ومن شاء أن يتذكر فعليه ان يراجع خطابات الزعيم الخالد جمال عبد الناصر وهو يكافح الاستعمار ويرفض الرضوخ للسياسة الأمريكية التي هددت مصر بقطع المعونة عنها بالاستغناء عن شرب الشاي و القهوة واللحوم ..
الغريبة ان سيادة البلح الاستراتيجي بيدعي انه ناصري ، والمفروض انه عارف و "مذاكر" الفترة دي كويس .
- أم أننا كنا أغنياء بعد نكسة 67 ونحن نستعد لمعركة الثأر والكرامة في أكتوبر 73 ، ونضع القرش فوق القرش لنوفر المال لشراء السلاح ؟ ألا يذكر الأخ ترعة المفهومية و شمس المعارف الخرفانية كيف كانت سيدات وفنانات مصر يتبرعن بمصاغهن للمجهود الحربي ، بل وكن يطفن العالم لجمع التبرعات ؟
- أم أننا كنا أغنياء في عصر الإنفتاح السداح مداح الذي زاد الغني غنا والفقير فقراً في عهد الرئيس المؤمن ، ومن فرط ثراءنا كنا ومازلنا نهاجر هجرة شبه جماعية لبلاد النفط لكي يوفر كل منا لبيته الحياة الكريمة ؟
- أم أننا كنا من المرفهين في عهد مبارك والذي امتد لثلاث عقود كاملة ؟
- أم اننا كنا أغنياء ونحن نعيش أجواء أخطر مؤامرة الربيع العبري في يناير2011 ؛ تلك المؤامرة التي أهلكت الزرع والضرع ، وقضت على السياحة تماما ، وكذلك قضت على جزء كبير من تحويلات العمالة المصرية في الخارج بسبب أحداث ليبيا ؟ والتي أدت ايضا لهروب المستثمرين وغلق أكثر من 4500 مصنع وتسريح عمالهم وموظفيهم ؟
- أم ربما يقصد فضيلته أننا كنا أغنياء ونحن نعيش تحت جناحي طائر النهضة الأسطوري ، وتحت حكم أقذر وأنجس جماعة إرهابية عرفها التاريخ ؟ والتي مازلنا نعاني من ارهابها وننزف من دمائنا ومن أموالنا الغالي والنفيس لكي نواجه مخططاتها القذرة وعملياتها الإرهابية الخسيسة ؟
- هل يحب سيادة الكهف الأظل والجناب الأجل أن أعود في التاريخ لما قبل الحملة الفرنسية ؟ هل يذكر سيادته الشدة المستنصرية و عشرات المجاعات العديدة التي ضربت مصر منذا الاحتلال العثماني الذي استمر على مصر لخمسمائة عام كاملة ؟ أم اننا كنا في تلك الأيام الخوالي من دول العالم الغنية ونحن لا ندري..؟ هل أتعب سيادة الخابور الجوجلي نفسه قليلا وبحث عند حبيبه وأثيره المستر جوجل عن تلك الفترة المفقودة التي كانت مصر فيها غنية وكان أهلها من الأثرياء المرفهين ؟ طاب اسأل صاحبك يا راجل.. دي حتى تبقى عيبه في حق صديقك الحميم ؟
.
الحقيقة يا سيادة الفيلد مارشال بلحة السابع عشر اننا لم نكن يوما أغنياء على مدار الستمائة عام الأخيرة وتحديدا منذ اكتشاف طريق رأس الرجاء الصالح وتدهور دولة المماليك ، فلماذا تريد أنت أن تحمل الرئيس السيسي بفاتورة حساب كل هذه القرون الطويلة من المعاناة والضعف الاقتصادي؟
.
واللي بيقولوا لا يا ريس ما يصحش تتكلم كده عن مصر .. دا إحنا التاريخ والجغرافيا واسم النبي حارسنا !
هو الراجل اتكلم عن " تاريخ مصر ؟ .. عن جغرافيا مصر وموقعها الاستراتيجي ؟ .. عن كرامة مصر " ؟!
بقى الراجل اللي كل مرة يطلع يقول " مصر تستحق مكانة مختلفة ، مصر تستحق الكثير " ! هيقول إن مصر فقيرة بالمعنى اللي حضراتكم تقصدوه ده ؟! .. إحنا فعلاً لو كان مصيرنا في إيدكم كنتوا " ضيعتونا حرفياً " .. الناس اللي ممكن تقتنع إن السيسي باع الميسترال لروسيا بقيمة رمزية " واحد دولار " .. الناس اللي كانت مقتنعة إن عندنا " 32 مليار ضاعوا من الميزانية " !... الناس اللي مقتنعة إن الملك سلمان قال " الجُزر مصرية والسيسي هو اللي عايز يرد الجميل " !
بقى انتوا اللي ممكن ناخد منكم كلام ؟ .. ونمشي وراكم ؟! إنتوا اللي هتعلموا السيسي إن مصر دولة مش فقيرة ؟
هو انت ترتيبك في وسط دول العالم اقتصادياً رقم كام ؟
هي موارد الدولة المصرية تُمثل كام من الناتج القومي المصري ؟
هو انت تعرف تعمل إحصائيات مبنية على معلومات مُسجلة على برامج وحاسبات آلية وأساليب حَوكَمَة لكام ملف ؟ .. ده انت يا دوب أعلى إمكانية تكنولوجية للإحصاء عندك هتلاقيها في ملف المواليد والوفيات وخلاص ، وكمان فيها أخطاء !
إنت لسه بتعمل شبكات صرف صحي " جديدة " لمدن الصعيد والنوبة ، لأ وكمان في محافظات القاهرة واسكندرية وغيرها من المحافظات " العواصم وأهم المواني " .. شبكات جديدة حرفياً ! تخيل دولة عمرها أكتر من 7 آلاف سنة ولسه ماعندهاش صرف صحي في بعض العواصم والمحافظات " من أصله " ! وكذلك الكهرباء يا فندم .
بتعمل شبكات طرق " جديدة " علشان تربط محافظات مصر ، ده غير الطرق المتهالكة القديمة الفرعية !
ماعندكش " حاجة " تبني عليها " أي حاجة " ! هي القاهرة واسكندرية اللي ممكن يكونوا مقبولين في خدماتهم وانتهينا ، لكن انت اللي ما تعرفش مصر ، ولا معاناة مصر على طول وعرض مساحتها ومحافظاتها وأوجاع شعبها واحتياجاتهم .
مصر كريمة ، وعظيمة ، مصر هي التاريخ وأصل الأرض والحضارات ، لكن فقيرة .
مصر عندها كنوز لم يتم استغلالها في السابق ، عندها موارد تخليها في الزراعة " غول " ...في السياحة " أكبر الدول السياحية ... في وسائل التعدين والمشتقات البترولية بسم الله ما شاء الله " حوت قادم "
ده انت عايش من سنين وسنين على المنح والقروض والإعانات ، جاي تقولي " مصر مش فقيرة " !
مصر فقيرة يا ابني لحد الآن ، واللي بيحصل بمشيئة الله هيخليها دولة " مش أشلاء " ويخليها ضمن أكبر الاقتصاديات العالمية " مش فقيرة " ... الراجل قال وكرر كتير " مصر تستحق مكانة غير كده " يعني اعتراف منه بإهدار مواردها وعدم تنميتها واستغلالها سنين طويلة .
من المستحيل ، بل ومن العبث أنك تكون فقير على مدار 600 سنة ، ثم تطلب من رئيس لسه مكملش سنتين في الحكم انه يخلي مصر زي سلطنة بروناي
.
سيادته بيقول في البوست الفشيخ ..فيما معناه إن القناة الجديدة مكانش وقتها .. طب وهو انت أو أي حد كان ممكن يعرف ويتنبأ انه هايكون فيه كساد اقتصادي عالمي ؟؟؟
سيادته بيقول كمان عشان عملنا مؤتمر اقتصادي كلفنا 30 مليون جنية والعائد صفر !! ومن ساعتها عمالين نعمل مؤتمرات بلا أي عائد !!! وبيضرب أرقام خرافية لا أساس لها من الصحة ..يعنى عاوز السيسى اللى بيفطر الصحفيين فول وطعمية يصرف 240 مليووون جنيه على احتفال فى يوم واحد ؟؟ مش شايف انها وسعت منك دي ؟ يا واااسع العلم ..يا بحر النباهة وبلاص المفهومية 
لكن انا هرد عليه بلغة الأرقام يمكن يفهم... فنتائج المؤتمر الاقتصادي وعلى سبيل المثال لا الحصر ، و في مجال البناء فقط ....
1- 45 مليار دولار لإنشاء العاصمة الإدارية الجديدة مع شركة “كابيتال” الإماراتية.
2- 24 مليار جنيه اتفاقية لإنشاء مشروع “تنمية جنوب مارينا” بين وزارة الإسكان والشركة العربية.
3- 4 مليارات دولار استثمارات لاتحاد شركات عربية للتنمية والتطوير العقاري وشركة “سي آر بي أي” الإنجليزية.
4- 2.5 مليار دولار لإقامة مشروع عمراني سكني متكامل الأركان فى مدينة 6 أكتوبر.
5- 3.5 مليار دولار مشروع سكني لبالم هيلز بمدينة 6 أكتوبر.
6- 3.5 مليار دولار مشروعات عقارية للقابضة السعودية على الأراضي المصرية.
7- 2.5 مليار جنيه استثمارات لشركة “ماجد الفطيم العقارية” بالمحافظات.
.
ثم يضيف جنابه ..كل ده عشان مش بنحارب الفساد بجد ... ده الحرامية الصغيرين اللى بنكشف عدد قليل منهم بيطلعوا سارقين ملايين .. أومال الحيتان الكبار سارقين كام ؟!
هو لما بلد تشيل وزير الزراعة وتقبض عليه بفضيحة وجرسة...ولما وزير التموين يتم اقالته وبيتحقق معاه...ولما مستشار وزير الصحة بيتم التحقيق معاه ..ولما مستشار وزير المالية يتقبض عليه ... ولما نائب مستشار ورئيس مجلس الدولة يتقبض عليه ... فين يا دكتور الحيتان اللى لسه لم يتم القبض عليهم ..فيه إيه أكبر من الوزير غير رئيس الوزراء ورئيس الدولة ؟؟ فهل حضرتك شايف انهم حيتان وفاسدين ؟
يقول الدكتور...أيوه فعلا احنا بقينا فقرا وبالأرقام كمان ... وانه في آخر 3 سنين تضاعف الدين الخارجي والداخلي (يعنى اللى استلفناه في 3 سنين اكبر من كل اللى استلفناه في تاريخنا منذ الفراعنة) وانهارت العملة الى ثلث قيمتها وتضاعفت الاسعار (التضخم اصبح 24.3%) وكل الخراب ده حصل فى اخر 3 سنوات فقط !
والرد.. فعلا اللى استلفناه أكبر ، .. والمشروعات والتجديدات التى بتتم الأن اكبر من 30 سنة مش من 3 سنوات... بس أحب أوضح لحضرتك شىء مهم
هو تطوير العشوائيات ببلاش....
هي المليون ونصف فدان بيتم زراعتهم ببلاش....!
هي محاربة الأرهاب فى سيناء ببلاش...!
هو تطوير الموانىء والطرق وانشاء الكبارى ببلاش...!
هي تنمية خليج السويس ببلاش...!
هو مشروع هضبة الجلالة وانفاق قناة السويس والمزارع السمكية ببلاش...!
هكتفى بهذه المشروعات فقط معان لسه فيه غيرها كتير
أما معدل التضخم فهو .20.7% وليس 24%
نسبة التضخم بالأرجنتين، القوة الاقتصادية الثانية بأمريكا الجنوبية، ارتفاعا بواقع 29 %
ونيجيريا اللي كنت نشرت بوست بتشيد بالتجربة النيجيرية معدل التضخم فيها هو 18 %
.
ثم حضرتك جبت منين ان عجز الموزانة في 2016 هو نفسه تكلفة حفل افتتاح ( تفريعة) قناة السويس على حد قولك انت والاخوان ؟؟ مش أي أرقام تضربها تبقى اقتصادي محصلتش ، وإلا يبقى طارق عامر ده بتاع بليلة .. وهو مبيعرفش وانت اللى بتعرف ..
والمؤتمر الاقتصادي اللى بتقول انه لم يسفر عن شىء ، أرجوك تقوللي انت ، هي اتفاقيات شركات سيمنس وشركات التنقيب عن البترول والغاز وأيضا الدهب مع روسيا دي إيه ؟؟ الشركات الهولندية والمجرية واليابانية والصينية اللي بتفتح عندك مصانع فى محور قناة السويس دي إيه ؟؟
.
الفساد يا حاج بلحة مش وليد 70 أو 80 سنة فاتوا .. الفساد وليد مئات السنين .. ولو مكانش فيه فساد عمرنا ما كنا هانبقى دولة فقيرة .. وهو اللى حرك الرقابة الادارية اللي عمرنا ما كنا بنسمع عنها وحاليا بتجيب قضايا بالملاييين في الخبطة الواحدة ..
.
البلد بتحارب الارهاب وبتواجه مخطط عالمي بيتم تنفيذه بأيدي داخلية قذرة .. وارجع ايها الرجل الجوجلى لجوجل .. هايقولك ان أي بلد بتحارب ارهاب اقتصادها بيكون متدهور .. نسيب بقى الارهاب يخبط على بابك ، وندور ازاي نخليك مليونير في سنتين ، واللا اقول زي الناس انك طمعان في منصب عشان تقول الحق ؟؟
يا أخي ده الاصلاحات فى سينا عشان ينتهى منها الارهاب له تمن فى المال والأرواح .. مش عاوزالاصلاح الاقتصادي يبقى له تمن ؟؟
يا أخي انت مش خبير اقتصادى
يا أخي انت مش قبطان بحري ولا انت رئيس هيئة قناة السويس
يا أخي انت مش جنرال ولا انت وزير دفاع
يا أخي انت مش مجموعة وزراء في بعض بتفهم ف كل حاجة
يا أخي لك حق العتاب ع الريس في آخر فترته ونعدد انجازاته وإخفاقاته ، ونحكم بما له وما عليه بالحق
ويا أخي متقعدش تقوللي انا مع الدولة جيش وشرطة وقضاء وأزهر وكنيسة بس .. و الأشخاص لا .. هو كل دوووووووووول برعاية مين يا عم الجهبذ ؟؟
يا أخي ارحم أمي العيانة بقى ..
بس حبيبي ..
بس يا بابا
#الخابور_الاستراتيجي_بلحه_السابع_عشر
موضوع: من أحاديث عم مليجي في الرد على البلح الاستراتيجي 
الثلاثاء يناير 31, 2017 10:56 am
