في حادث متحف اللوفر الإرهابي الكوميدي

Mohammed Haffz

***************

في حادث متحف اللوفر الإرهابي الكوميدي

========================

.

بص يا سيدي ، و بحسب تصريحات الشرطة الفرنسية ، واحد مشتبه فيه حاول يقتحم متحف اللوفر ... يعني ايه يقتحم ؟ يعني يدخل بسرعة كداهو من غير تفتيش أو مثلا نادو عليه و ما رضيش يقف ... طب اشتبهوا فيه ازاي ؟ عشان حاول يقتحم و مايقفش و بعدين كان معاه شنطه شكوا انه يكون فيها متفجرات .. طب لما اشتبهوا فيه عملوا ايه ؟ ضربوا عليه نار و أصابوه اصابة خطيرة ، و هو عمل ايه بقى ؟ قال الله أكبر ( حلوة جملة الله اكبر دي لازم تترشق في كل حادثة ..بتجيب زباين ) .

.

طب و حصل ايه كمان ؟ الجندي اللي ضرب عليه نار اتعرض لاصابة !! اتعرض لاصابه ليه هو المقتحم ده كان معاه كلاشينكوف ؟ لا أبدا دا كان معاه سلاح أبيض ، يعني مطوة قرن غزال مثلا أو ( كذلك ) من بتاع السلطة ، و جايز قصافة ضوافر ، و معقول واحد معاه سلاح أبيض يصيب واحد معاه سلاح ألي ؟ وفي الأصل معقولة في حد عاقل عايز يقتحم متحف اللوفر بجلالة قدره بحتة مطوة قرن غزال ؟ والله اسأل سعادة الباشا رئيس الشرطة الفرنسية ... طب لما فتشوا شنطته لقو فيها متفجرات و قنابل نووية ؟ لا خالص ، ملقيوش حاجة .. كل اللي لقيوه فيها كان تقريبا فانله و لباسين و شبشب بلاستيك من أبو 8 جنيه ... طب و بعدين الشرطة الفرنسية عملت ايه ؟ أبد.. بعد ما ضربوا أخونا أبو مطواه خمس رصاص في بطنه ، قفلوا متحف اللوفر و محطات المترو ، و قالوا ان الحدث خطير و تقريبا الباريسيين نامو من المغرب النهارده .. ليه كل ده ؟ عشان الراجل أبو مطوه و فانلة و لباسين و قال الله اكبر ؟ أه و عهد الله زيمبئولك كده

.

هي الميزة بس إن فرنسا مفيهاش خرفان ولا كولجية ولا ناس قاعدة تهري في السياسة ، و أي حاجه بتيجي من الحكومة و المسئولين عندهم بيقولوا نعم و حاضر و أمين ، مع إن الحادث و وصفه و التعامل معاه أقرب ما يكون لمسرحية كوميدية هزلية ، و لو صدق الحادث و اعتبروا ده إرهاب يبقى اللي في سينا اسمه ايه ؟! ده اللي معاه ربنا بيمشي عالمايه فعلا .

.

عندنا في مصر بقى ، الإرهابي بيتصور وهو ماسك القنبلة أو العبوة الناسفة و يبقى قتل و حرق أو نزل فيديو على صفحته عن طريقة تحضير قنبلة بدائية الصنع أو متسجل له مكالمة نص ساعة بيتكلم فيها عن الدولارات و القتل و مبايعة البغدادي ، و في الأخر لما يتقبض عليه و يعترف نفضل نحاكم فيه سنين و نعالجه و نعلفه ، و الخرفان و الكولجية يتعاطفوا معاه و يعتبروه بطل قومي و أيقونة ، و الخواجات بتوع حقوق الإنسان يطلعوا من العلبه بتاعتهم و يتكلمو عن حقوق الإرهابي الكيوت الرقيق زي الفراشة .

.

----------------------------

By: Mohamed Hussein