Mohammed Haffz
............................
فـبــرايـــر السعيد
=========
امبارح كان ذكرى ما يعرف بثورة 17 فبراير الليبية
ليبيا ، الجارة الغربية لمصر واللي بتقع ضمن نطاق الأمن القومي المباشر لينا
ليبيا بيسكنها خمسة مليون نسمة ، ودخلها القومي يعادل 3 أضعاف الدخل القومي لمصر لأنها دولة نفطية غنية ، يعني الحسبة بالبلدي زي ما تجيب ربع سكان القاهرة وتسكنهم مساحة أرض هي ضعف مساحة مصر كلها وتوزع عليهم دخل يوازي 3 أضعاف الدخل القومي للدولة المصرية كلها.. تخيل مستوى معيشتهم يبقى إزاي
مع ذلك ثوار ليبيا الأحرار الأطهار قرروا يقوموا بثورة عشان تحسين أحوالهم المعيشية ، وعشان الديموقراطية يا كماحه
ليبيا يوم ما قامت بثورتها العظيمة كانت بتملك إحتياطي دولاري في البنك المركزي الليبي يقدر بـ 300 مليار دولار، دا غير استثمارات بمئات المليارات خارج ليبيا في كل قارات العالم تقريبا [ على سبيل المثال.. أسهم في شركة توتال الفرنسية ، وأسهم في مناجم الماس بجنوب أفريقيا ، وحقول نفط في فنزويلا ، وأسهم في العديد من الشركات الإيطالية والفرنسية والانجليزية ، ومشاريع عملاقة في التعدين والزراعة في دول وسط أفريقيا ، وحتى في مصر نفسها (شيراتون القاهرة مثالا) ]
والنهاردة ، و بعد 6 سنوات من الثورة الليبية ، أصبحت ليبيا بفضل ثوراها الأحرار الأطهار على شفا الإفلاس ، و فقدت كل احتياطيها النقدي ، وانتاجها من النفط تضاءل لأقل من الخمس ، بل وتوقف تماما في بعض الأوقات
الليبي كان زمان بيخاف يتكلم في السياسة لأحسن ما يرجعش بيته ، بس بفضل الثورة والديموقراطية ، الليبي ما بقاش عنده بيت من الأصل عشان يرجعله
الليبي الآن وبفضل الثورة والحرية أصبح حر تماما انه يقول رأيه ويمارس الديموقراطية على أصولها ، بس وهو نازح في خيمة في الصحراء أو لاجئ في دولة أخرى
الليبي كان زمان ممنوع يحمل مطواة في جيبه ... في الحقيقة هو ما كانش محتاج انه يشيل المطواه أصلا ، بس دلوقت وبفضل الحرية ، أصبح مضطر يشيل صاروخ جراد في عربيته عشان محدش يتعرض ويقتله له وهو ماشي
الليبي كان زمان بيشغل الأنجليز والأتراك والأمريكان والبريطانيين عنده كمهندسين وأطباء وخبراء من مختلف التخصصات ، ودلوقت بسبب الثورة والحرية والديموقراطية ، بقى كل دول بيروحوا ليبيا برضه ، بس عشان يقتلوا أهلها ، وحتى تمن الرصاص اللي بيستخدموه بيدفعه الليبيين من فلوسهم ، يعني بيدفعوا عشان يتقتلوا
هل تعلم ان ليبيا وبعد 6 سنوات من الثورة على الزولم والكمع ، و بعد 6 سنوات من تساقط ثمار الحرية والديموقراطية على رؤوس شعبها ، بقت محتاجة لأكتر من 250 مليار دولار و عشر سنوات على الأقل عشان ترجع زي ما كانت يوم 16 فبراير 2011 ؟
هل تعلم انه وبعد 6 سنوات من الثورة على الجهل والتخلف ، لم يُبنى في ليبيا ولا مدرسة واحدة .. ولا جامعة واحدة.. ولا طريق واحد ..، بل بالعكس تم هدم مئات المدارس والجامعات وتدمير عشرات الطرق وآلالاف المنازل والمنشأت تماما
هل تعلم ان الليبيين ماكانوش يسمعوا عن حاجة اسمها انقطاع التيار الكهربي ، وبعد 6 سنوات من الثورة على الظلم والظلامية ما بقاش فيه كهربا أصلا في ليبيا ؟
الثوار الأحرار في مصر زعلانين عشان معرفوش يكملوا المشوار زي رفاقهم في ليبيا ..
الثوار الأحرار في مصر كانوا عايزين يكرروا النموذج الثوري الليبي "الناجح جدا" ، بس يا خسارة ، الشعب المصري رفض النموذج ده.. معلهش أصله شعب ما يستاهلش الحرية والديموقراطية على الطريقة الليبية
موضوع: ليبيا التعيسة وفـبــرايـــر السعيد 
الأحد فبراير 19, 2017 5:52 am
