Mohammed Haffz.
............................
يُحكى أن
في بلاد بعيدة .. بعيدة أوي .. بعد سريلانكا بمحطتين تلاتة ، كان عايش واحد اسمه عوضين
عوضين ده وعي عالدنيا و لقى نفسه بيشتغل كلاف في سراية واحد من الباشوات .. زيه زي ألاف الكلافين في نفس الوسية بتاعة الباشا ده ، وزي ملايين غيره شغالين في باقي الوسيات بتوع باقي الباشوات .
عوضين كان بيصحى من النوم كل يوم في الفجر وينزل يشتغل في الأرض .. بنظام السخرة .. يرجع المغرب مهدود زي القتيل ، أجرته متاكلهوش عيش حاف .. ماعندوش بلغه يلبسها في رجله ، وحتى جلابيته فيها أخرام بقى يتوه في عددها ...بس للأمانة عوضين كان لابس لباس تحت الجلابية دي ، هو أصلا لباس قديم ومقطع لقيه بالصدفة في الزبالة اللي بتترمي من سراية الباشا فأخده ولبسه .. وعشان كده كان بيتعايق بيه وسط أصحابه الكلافين ، ومن يومها أصحابه سموه عوضين أبو لباس
.
عوضين وقتها كان عنده عشرين سنة ، بس الفقر والمرض كانوا ماصين دمه ، وفي يوم من الأيام و هو شغال في الوسية سرح بذهنه شوية و قعد يسأل نفسه .. هو مش بأتجوز ليه زي أي شاب من سني .. بس رجع وقال لنفسه .. طاب وانا اتجوز ليه وإزاي ومنين ؟ وبعدين انا لو اتجوزت و خلفت عيالي هيعيشوا في نفس الهم والفقر .. ده لو عاشوا أصلا و مماتوش من كوليرا واللا طاعون كأنهم جوزين فراخ .. طاب لو عاشوا .. عيالهم برضه يعني أحفادي هيعيشوا في نفس الهم ؟! طاب خلاص بلاش أتجوز أحسن .. عوضين فاق من خياله في لحظة على لسعة كرباج الخولي وصوته وهو بيقوله اشتغل يا بهيم .. ماتسرحش يا حيوان .
.
و فضل عوضين على دا الحال لحد مافي يوم من الأيام كأن طاقة القدر اتفتحت له .. لقى واحد موظف جاي بيقوله يا عوضين فيه ثورة قامت في البلد عملها واحد اسمه جمال ، والثورة دي أخدت أراضي الوسية ووزعتها على الفلاحين الغلابة ، وانت واحد منهم .. ياللا خد حتة الأرض دي ازرعها بايدك و لنفسك وهات لك جلابية و بلغة و عيش زي البني أدمين .. عوضين سأل الراجل ليه أعيش زي البني ادمين ؟ الراجل جاوبه : عشان انت بني أدم يا عوضين .. ربنا خلقك بني ادم .
.
عوضين رجع يفكر و يسرح في حلمه تاني ، بس المرادي ماكنش فيه كرباج مستنيه .. و قرر انه مدام بقى عنده حتة أرض هيعيش منها يبقى من حقه يتجوز و يخلف و مايخافش على عياله .. ده بقى يحلم انه يعلم عياله و يدخلهم جامعة و لما عياله يكبروا و يخلفوا يعيشوا برضه من خير حتة الأرض و يتعلموا .
.
عوضين ماكدبش خبر وراح إتجوز بهانة بنت حميدة العجانة ، وشويتين وخلف كام عيل و لبس هدمة جديدة وحالته زهزهت والأشية بقت معدن ..وبسرعة عياله كبروا و نصهم راح مدارس ، و اتجوزوا كلهم ، وفي اللحظة دي مات عوضين .. مات على سريره و هو مبتسم بعد ما قضى أغلب عمره بينام على حصيرة ع الأرض .. باختصار مات زي البني أدمين .
.
تفوت الأيام وتيجي الأيام و أحفاد عوضين يكبروا و يتعلموا و يبقى عندهم أكاونتات عالفيس بوك , و كل سنة في نفس الميعاد يدخلوا يلعنوا سلسفيل الراجل اللي جه لجدهم و إداله حتة أرض و قاله انت بني أدم يا عوضين .. و يقولو الراجل ده خربها .. و الله يرحم أيام جدو الباشا عوضين أبو لباس لما كنت الخدامه فرانساويه و بتاعة البليله من سويسرا .
.
و في يوم من الأيام نام الحفيد بعد ما كتب بوست عن جمال الملك و كاريتة الملك و غمازات الملك .. و لقى باب الشباك بيتفتح ..أتاري جده عوضين أبو لباس خد خبر بالموضوع و طلع من قبره و نط من الشباك و نزل ضرب في حفيده بالجزمة و هو على كلمة واحده ..يابن الكلب .. يابن الكلب .. يابن الكلب .
.
أبو الحفيد ( اللي هو ابن عوضين ) و أمه نطوا من سرايرهم على صراخ ابنهم و شافوا المنظر بعنيهم .. الأم سألت الأب ، مين الراجل ده ؟ قال لها ده أبويا .. قالت له بيضرب حمادة ابننا ليه ؟ قال لها بيربيه .. قالت له و ليه أبوك اللي يربيه ؟ قال لها عشان انا وانتي ماعرفناش نربيه .
.
و توته توته خلصت الحدوته .
....................................
أصدقائي الحلوين الطعمين .. اتضايقتو ليه بس ؟ دانا بحكي حكاية راجل من بلاد بعيدة .. بعد سريلانكا بمحطتين تلاتة .. هو انتو ليكوا قرايب في نواحي سريلانكا ؟
.
-----------------------------
By: Mohamed Hussein